ދައުލަތުގެ 13 އިދާރާއެއްގައި ވަނީ އެދިފައި
މޯލްޑިވްސް މީޑިއާ ކައުންސިލްގެ މެންބަރުން މަޖިލީހުގެ ކޮމިީޓީއެއްގައި
ކޯވިޑް-19އާ ގުޅިގެން މީޑިއާތަކަށް ކުރިމަތިވާ ގޮންޖެހުންތައް ހައްލުކޮށްދޭން ދައުލަތުގެ ކަމާގުޅޭ އިދާރާތަކުގައި މޯލްޑިވްސް މީޑިއާ ކައުންސިލުން އެދިއްޖެއެވެ.
އާދިއްތަ ދުވަހުގެ ރޭ އެމްއެމްސީން ނެރެފައިވާ ބަޔާނެއްގައި ވަނީ، ކޯވިޑް-19 ރޯގާގެ ސަބަބުން މީޑިއާތަކަށް ކުރިމަތިވެފައިވާ ގޮންޖެހުންތައް ބެލުމަށް އެ ކައުންސިލުގެ ފަރާތުން ކުރެވުނު ސާވޭއިން ހޯދުނު ހޯދުންތަކުގެ މައްޗަށް ބިނާކޮށް މި ހާލަތުގައި މީޑިއާތަކަށް ދިމާވެފައިވާ ގޮންޖެހުންތަކާއި ހުރަސްތައް ނައްތާލަ ދިނުމަށް، ފިޔަވަޅު އަޅައި ދިނުމަށް، ދައުލަތުގެ 13 އިދާރާއެއްގައި ކައުންސިލުގެ ފަރާތުން ރަސްމީކޮށް އެދިފައިވާނެ ކަމަށެވެ.
ސިޓީއާ އެކު ސާވޭ، އެމްއެމްސީގެ ސަރވޭ ރިޕޯޓްވެސް އެ އިދާރާތަކާ ވަނީ ހިއްސާކޮށްފައިވާ ކަމަށެވެ. އެމްއެމްސީގެ ފަރާތުން ވަނީ މި ސަރވޭ ރިޕޯޓް ރައީސުލްޖުމްހޫރިއްޔާގެ އޮފީހާއި މިނިސްޓްރީ އޮފް ހޯމްއެފެއާޒްއާ ހިމެނެއެވެ.
އެމްއެމްސީގެ ފަރާތުން އެ އިދާރާތަކަށް ފޮނުވި ސިޓީގައި، އެދިފައިވާ ކަންކަން ހައްލުކޮށް ދިނުމަށް އިދާރާތަކުން އަޅާނެ ފިޔަވަޅުތައް ކައުންސިލަށް އަންގައިދިނުމަށް އެދިފައިވާނެ ކަމަށެވެ. އެ ކަންކަން އިސްލާހުވަމުން އަންނަ މިންވަރު ކައުންސިލުން ބަލަމުން އަންނާނެ ކަމަށްވެސް އެމްއެމްސީގެ ބަޔާނުގައި ވެއެވެ.
މި ހާލަތުގައިވެސް މައުލޫމާތު ފޯރުކޮށްދިނުމުގައި ހަރަކާތްތެރިވާ ނޫސްވެރިންނަށް ހިތްވަރުދެމުން، އެމްއެމްސީން ވަނީ ނޫސްވެރިންގެ ހައްގުތައް ދިފާއުކުރުމުގައި އެ ކައުންސިލުން މަސައްކަތް ކުރަމުންގެންދާނެ ކަމުގެ ޔަގީންކަން އަރުވާފައެވެ.
