އީޕީއެސް ފައުންޑޭޝަނުން އިމާދުއްދީން ސްކޫލަށް 1000 ފޭސް މާސްކް ހަދިޔާކޮށްފި
21 ޖޫން 2020 | އާދީއްތަ 08:211000 ފޭސްމާސްކް ހަދިޔާ ކުރެއްވީ އީޕީއެސް ސްކޫލްގެ 52 ވަނަ އަހަރީ ދުވަހުގެ މުނާސަބަތުގައި
އީޕީއެސް ފައުންޑޭޝަންގެ ފަރާތުން 1000 ފޭސްމާސްކް އިމާދުއްދީން ސްކޫލަށް ހަދިޔާ ކުރަނީ: މި ފޭސް މާސްކްތައް ހަދިޔާ ކޮށްފައިވަނީ އީޕީއެސް ސްކޫލަށް 52 އަހަރު ފުރުމުގެ މުނާސަބަތުގައި
އީޕީއެސް ފައުންޑޭޝަނުން އިމާދުއްދީން ސްކޫލަށް 1،000 ފޭސްމާސްކް ހަދިޔާ ކޮށްފިއެވެ.
އީޕީއެސް ފައުންޑޭޝަނަކީ، މާލެ ކުރީގެ މަޝްހޫރު ސްކޫލެއް ކަމަށްވާ އިންގްލިސް ޕްރެޕަރޭޓަރީ އެންޑް ސެކަންޑަރީ ސްކޫލް (އީޕީއެސް) ސްކޫލުން ކިޔެވި ދަރިވަރުން، ނުވަތަ އިސް ދަރިވަރުން އުފައްދާފައިވާ ފައުންޑޭޝަނެކެވެ.
އާދިއްތަ ދުވަހު، އީޕީއެސް ސްކޫލްގެ ފައުންޑޭޝަނުން މި 1،000 ފޭސް މާސްކް އިމާދުއްދީން ސްކޫލާ ހަވާލުކޮށްދެއްވީ، ރައްޔިތުންގެ މަޖިލީހުގެ ކުރީގެ މެމްބަރު އަހުމަދު ހަމްޒާއެވެ. މި 1،000 ފޭސް މާސްކަކީ އީޕީއެސްގެ 52 ވަނަ އަހަރީ ދުވަހުގެ މުނާސަބަތުގައި، އީޕީއެސް ސްކޫލްގެ ކުރީގެ ދަރިވަރުންގެ އެހީތެރިކަމާއެކު، އިމާދުއްދީން ސްކޫލަށް ހަދިޔާކުރި ފޭސް މާސްކުތަކެކެވެ.
އީޕީއެސް ފައުންޑޭޝަނުން އެ ސްކޫލްގެ ނަން ދިރުވުމަށްޓަކައި، ސްކޫލްގެ އަހަރީ ދުވަސް ފާހަގަކުރުމާއި އަދި ބައެއް ހަރަކާތްތައް ހިންގަމުން ދެއެވެ.
އީޕީއެސް ސްކޫލުން ކިޔެވި ބައެއް ބޭފުޅުން މިހާރުވެސް ދައުލަތުގެ އިސް މަގާމުތަކުގައި ތިއްބެވިއިރު، ދައުލަތަށް ގިނަ ހިދުމަތްތަކެއް ކުރެއްވި އަދި ހިދުމަތް ކުރައްވަމުން ގެންދަވާ ބޭފުޅުންގެ ތެރޭގައި ވެސް އީޕީއެސް ސްކޫލްގެ އިސްދަރިވަރުން ހިމެނެއެވެ.
