ހައިޑްރޮކްސިކްލޮރޯކުއިންގެ "ފޭކު ބޭސް" މާރކެޓުގައި ވިއްކަމުންދާތީ ސަމާލުވުމަށް އެދިއްޖެ
21 ޖޫން 2020 | އާދީއްތަ 07:57މިއީ ކޮވިޑް-19 ގެ ފަރުވާއެއްގެ ގޮތުގައިވެސް ބައެއް ޤައުމުތަކުން ބޭނުންކުރާ ބޭހެއް
ހައިޑްރޮކްސިކްލޮރޯކުއިން - މި ބޭހަކީ ކޮވިޑް-19ގެ ފަރުވާއަކަށް ބައެއް ޤައުމުތަކުގައި އަޖުމަ ބަލަމުންދާ ބޭހެއް
މެލޭރިއާ ބައްޔަށް ދޭ ފަރުވާގެ ގޮތުގައި ބޭނުންކުރާ ގުޅަ ބޭހެއް ކަމުގައިވާ ހައިޑްރޮކްސިކްލޮރޯކުއިންގެ "ފޯލްސިފައިޑް" ބޭހެއް މާރކެޓުގައި ވިއްކަމުންދާތީ އެކަމަށް ސަމާލުވުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން އިލްތިމާސް ކޮށްފިއެވެ.
ކޮވިޑް-19 ގެ ފަރުވާއެއްގެ ގޮތުގައިވެސް ބައެއް ޤައުމުތަކުން އަޖުމަ ބަލަމުންދާ މި ބޭހާއި ގުޅިގެން ހޮނިހިރު ދުވަހު އެމްއެފްޑީއޭއިން ނެރުނުއިއުލާނެއްގައިބުނީ، ހައިޑްރޮކްސިކްލޮރޯކުއިން އަކީ ޕްލާސްމޯޑިއަމް ވައިވެކްސް އިންފެކްޝަން (މެލޭރިއާ) ގެ ފަރުވާ އަކަށް ބޭނުން ކުރާ ބޭހެއް ކަމަށެވެ. އަދި މިއީ ދުނިޔޭގެ ޞިއްޙަތު ޖަމްޢިއްޔާގެ އަސާސީ ބޭސް ލިސްޓްގައިވެސް ހިމެނޭ ބޭހެއްކަން ފާހަގަކޮށްފައިވެއެވެ.
އެމްއެފްޑީއޭއިން ބުނީ، ހައިޑްރޮކްސިކްލޮރޯކުއިންގެ "ފޭކް ބޭސް" އެފްރިކާ އާއި ޔޫރަޕްގެ ގައުމުތަކުގައި ދައުރުވަމުންދާ ކަމަށް ދުނިޔޭގެ ޞިއްޙަތު ޖަމިއްޔާއިންވެސް އިންޒާރު ދީފައިވާ ކަމަށެވެ. އެގޮތުން މި 2 ބައްރުގެ ޤައުމުތަކުގެ ތެރޭގައި ހިމެނޭ ބުރްކިނާފަސޯ، ކެމަރޫން، ޑިމޮކްރެޓިކް ރިޕަބްލިކް އޮފް ކޮންގޯ، ފްރާންސް، އަދި ނިގާރ އިންވެސް މި ފޯލްސިފައިޑް ބޭސް ފެނިފައިވާކަން ޑަބްލިއުއެޗްއޯއާ ޙަވާލާދީ އެމްއެފްޑީއޭއިން ފާހަގަ ކޮށްފައިވެއެވެ.
އޭގެ އިތުރުން، މިބޭހަކީ ރާއްޖެއަށް އިމްޕޯރޓް ކުރުމާއި ވިއްކުމަށް ހުއްދަ ކުރާ ބޭހުގެ ތެރޭގައި ހިމެނޭ ބޭހެއް ކަމަށާއި، ޕްރީ-އޮތޮރައިޒޭޝަން ނަގައިގެން އެތެރެކުރާ ބޭހެއްކަމަށް އިއުލާނުގައި ބުނެފައިވެއެވެ. އެހެން ނަމަވެސް މި އެލަރޓްގައި ފާހަގަކޮށްފައިވާ ފޯލްސިފައިޑް ބޭސް އުފައްދާ ކުންފުނިތަކަކީ، ރާއްޖެއަށް ބޭސް އިމްޕޯޓް ކުރުމަށް ހުއްދަ ދީފައިވާ ކުންފުނި ތަކުގެ ތެރޭގައި ހިމެނޭ ކުންފުނިތަކެއް ނޫންކަމަށް އެމްއެފްޑީއޭއިން ބުނެއެވެ.
އެއާއެކު ރާއްޖެއަށް އިމްޕޯރޓް ކުރާ ބޭސް ހާއްސަ ސަމާލު ކަމެއްދީގެން ޕޯރޓްތަކުގައި ބަލައި ފާސް ކުރަމުން ގެންދާނެ ކަން އެ އޮތޯރިޓީން ފާހަގަ ކޮށްފައިވެއެވެ. އަދި މިބޭހާއި ގުޅޭގޮތުން އެއްވެސް މަޢުލޫމާތެއް ލިބިއްޖެ ނަމަ އޮތޯރިޓީގެ ހޮޓްލައިން ނަންބަރ 7200321 އަށް ގުޅައި މަޢުލޫމާތު ހިއްސާ ކުރުމަށްވެސް އެދިފައިވެއެވެ.
