މާމެންދޫ ޕޮޒިޓިވް ކޭސް: ގުޅުންހުރި 13 މީހަކު ކަރަންޓީނުކޮށްފި
މާލެއިން ފަސް މީހަކު ވަނީ ކަރަންޓީނު ކޮށްފައި
ހޮނިހިރު ދުވަހުގެރޭ އެންއީއޯސީގައި ބޭއްވި ނޫސްވެރިންގެ ބައްދަލުވުމުގެ ތެރެއިން
ގއ. މާމެންދޫން ކޮވިޑް-19 އަށް ޕޮޒިޓިވްވި ފުރަތަމަ ކޭސްއާ ގުޅިގެން ހެދި ކޮންޓެކްޓް ޓްރޭސިން ތެރެއިން 13 މީހަކު ކަރަންޓީނުކޮށްފައިވާ ކަމަށް ނޭޝަނަލް އިމަރޖެންސީ އޮޕަރޭޝަން ސެންޓަރު (އެންއީއޯސީ) އިން ބުނެފިއެވެ.
މާމެންދޫން ތިން މީހަކު ކޮވިޑަށް ވަނީ ޕޮޒިޓިވްވެފައެވެ. މި ތިން މީހުންނަކީ ވެސް މާލެއިން އެ ރަށަށް ގޮސް ހޯމް ކަރަންޓީނުގައި ތިބި މީހުންނެވެ. އެ މީހުން މާމެންދޫ އަށް ގޮސްފައިވަނީ ކޫއްޑޫ މަގުންނެވެ.
ހޮނިހިރު ދުވަހުގެރޭ އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވީ، ކަރަންޓީނުކުރި ތޭރަ މީހުންނަކީ މާމެންދޫ އެކަކާއި، މާލެއިން ފަސް މީހެއްގެ އިތުރުން ގެމަނަފުށިން ފަސް މީހުން ކަމަށެވެ. އޭގެ ތެރޭގައި އެއާޕޯޓުގައި މަސައްކަތްކުރާ މުވައްޒަފަކު ހިމެނޭ ކަމަށް އޭނާ ވިދާޅުވިއެވެ.
މާމެންދޫން ކަރަންޓީނު ކުރި ހަތަރު ވަނަ މީހާއާ ގުޅޭ ގޮތުން ނޫސްވެރިއަކު ސުވާލުކުރުމުން މަބްރޫކް ވިދާޅުވީ، އެމީހާ އަކީ ރިސޯޓު ކަރަންޓީނުގައި 14 ދުވަސް ހޭދަކުރުމަށް ފަހު ޕޮޒިޓިވްވި ތިން މީހުންނާ އެއް ފްލައިޓެއްގައި ދަތުރުކުރި މީހެއް ކަމަށެވެ. މަބްރޫކް ވިދާޅުވީ، ކަރަންޓީނު ނިންމާފައިގޮސް އެ ރަށުގައި ބޭއްވި ޖަނާޒާއެއްގައި އޭނާ ބައިވެރިވި ކަމުގެ މައުލޫމާތު ލިބިފައިވާ ކަމަށެވެ.
މަބްރޫކް ވިދާޅުވީ، މާމެންދޫ މޮނީޓަރިންގެ ހާލަތަށް ގެންނަން ނިންމާފައިނުވާ ކަމަށާއި، ސަބަބަކީ އެ ރަށަށް ދިޔަ އެންމެންނަކީވެސް ރަށަށް ދިޔުމަށް ފަހު ހޯމް ކަރަންޓީނުގައި ތިބި މީހުން ކަމަށްވާތީ އެވެ.
