އަންގާރަ ދުވަހުގެ ކުރިން މާރުކޭޓްގެ ގޮޅިތައް ހުސްކުރަން އަންގައިފި
20 ޖޫން 2020 | ހޮނިހިރު 13:06ލޯކަލް މާރުކޭޓް ދެން ހުޅުވޭނީ އައު އާންމު ހާލަތާ އެއްގޮތަށް
ލޯކަލް މާރުކޭޓް، ގޮޅިތައް ހުސްކުރަން އެންގި މުއްދަތުގައި ހުސްނުކުރާ ކަމަށް ކައުންސިލުން ބުނޭ
މިމަހުގެ 23ވާ އަންގާރަ ދުވަހުގެ ކުރިން ލޯކަލް މާރުކޭޓް، ވަޅޯމަސް މާރުކޭޓް އަދި އިމްޕޯޓް މުދާވިއްކާ (ގަޑިކަމަރު) ގޮޅިތައް ހުސްކުރުމަށް މާލޭ ސިޓީ ކައުންސިލުން އަންގައިފިއެވެ.
މާލެ ސިޓީ ކައުންސިލުން ބުނީ ކޮވިޑް-19އާ ގުޅިގެން ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ނެރިފައިވާ ސިއްހީ ކުއްލި ނުރައްކަލުގެ ހާލަތުގެ ދަށުން މާލެ ސިޓީ ފުރަބަންދު ކުރުމާއި ގުޅިގެން މާރުކޭޓުތައް ބަންދު ކޮށްފައިވާ ކަމަށެވެ. އަދި މާރުކޭޓުތަކުގެ ގޮޅިތަކުގައި ހުރި ތަކެތި ހުސްކުރުމަށް ދީފައިވާ މުއްދަތުގައި އަދިވެސް ބައެއް ގޮޅިތަކުން މުދާ ހުސްކޮށްފައިނުވާ ކަމަށް ކައުންސިލުން ބުނެއެވެ.
ކައުންސިލުން ބުނީ 23 ޖޫން 2020 ގެ ހަވީރު 18:00ގެ ނިޔަލަށް އެ ގޮޅިތަކުގައި ހުރި ހުރިހާ ތަކެތި ނަގަން ޖެހޭ ކަމަށާއި، ގުދަނުގެ ގޮތުގައި ހަދާފައި ހުރި ގޮޅިތައް ވެސް ރޫޅާ ހުރިހާ ތަކެތި ގެންގޮސް ގޮޅިތައް ހުސްކުރުމަށް އެދޭ ކަމަށެވެ.
މީގެ އިތުރުން ކައުންސިލުން ބުނީ މި މުއްދަތުގެ ނިޔަލަށް ނުގެންގޮސް ހުރި އެފަދަ ތަކެތި ގޮޅިތަކުން ނަގާ ގޮޅިތައް ހުސްކޮށް ގުދަނުގެ ގޮތުގައި ހަދާފައިހުރި ގޮޅިތައް ރޫޅާލާ މުޅި މާރުކޭޓް، ދޮވެ ސާފުކުރުމަށް ފަހު ޑިސްއިންފެކުޓް ކުރުމުގެ މަސައްކަތް ކުރިއަށްގެން ދިއުމަށް ހަމަޖެހިފައިވާ ކަމަށެވެ.
މާރުކޭޓުން ތަކެތި ނެރުމަށް ހުޅުވަން ހަމަޖެހިފައިވާ ގަޑިއަކީ ހުކުރު ދުވަސް ފިޔަވައި ކޮންމެ ދުވަހަކު ހެދުނު 8:00ން 18:00ށް ކަމަށް ކައުންސިލުން ބުނެއެވެ. މާލެ ސިޓީ ސަރަހައްދު ފުރަބަންދު ކޮށްފައިވަނީ އޭޕްރީލް މަހުގެ 15 ވަނަ ދުވަހުއެވެ.
އައު އާންމު ހާލަތާ އެއްގޮތަށް، މާލޭގެ ލޯކަލް މާރުކޭޓްތައް ހުޅުވުމަށް ތައްޔާރު ވަމުންދާއިރު، ޚިދުމަތް ދިނުމުގައި އަމަލު ކުރަންޖެހޭ އުސޫލުތައް މާލޭ ސިޓީ ކައުންސިލުން ވަނީ އާންމުކޮށްފައެވެ.
