އިންޑަސްޓްރިއަލް ވިލެޖުގައި ހުރި ވެހިކަލްތައް ނަގަން އަންގައިފި
19 ޖޫން 2020 | ހުކުރު 12:38ހަތް ދުވަހުގެ ތެރޭގައި ވެހިކަލްތައް ނެގުމަށް ވަނީ އަންގާފައި
މާލޭ އިންޑަސްޓްރިއަލް ވިލެޖް ސަރަހައްދު: އެ ސަރަހައްދުގައި ހުރި ވެހިކަލްތައް ނަގަން ވަނީ އަންގާފައި
މާލޭ އިންޑަސްޓްރިއަލް ވިލެޖު ސަރަހައްދުގައި ޕާކް ކޮށްފައި ހުރި ވެހިކަލްތައް ނަގަން އަންގައިފިއެވެ.
މާލޭ ސިޓީ ކައުންސިލުން ބުނީ މާލޭގެ ހުޅަނގު ފަރާތުން ހިއްކައިގެން ހަދާފައިވާ ސަރަހައްދު (އިންޑަސްޓްރިއަލް ވިލެޖު) އެ ކައުންސިލާއި ވެމްކޯ ގުޅިގެން ސާފުކުރުމުގެ މަސައްކަތް ކުރަމުންދާ ކަމަށެވެ.
އެހެންކަމުން އެސަރަހައްދުގައި ޕާކް ކޮށްފައި ހުރި ހުރިހާ ވެހިކަލްތަކެއް މި މަހުގެ 18 ދުވަހުން ފެށިގެން ހަތް ދުވަހުގެ ތެރޭގައި ނެގުމަށް އެތަކެތީގެ ވެރިފަރާތްތަކަށް އަންގާ ކަމަށެވެ.
އަދި މި މުއްދަތުގެ ތެރޭގައި އެތަކެތި ނުނަގައިފިނަމަ، އެ ކައުންސިލްގެ ފަރާތުން ފުލުހުން މެދުވެރިކޮށް ވެހިކަލްތައް ނެގުމުގެ މަސައްކަތް ކުރާނެ ކަމަށާއި އެތަކެތި ނެގުމުގައި ތަކެއްޗަށް ލިބޭ ގެއްލުމުގައި ކައުންސިލުން ޒިންމާ ނުވާނެ ކަމަށްވެސް ވަނީ ބުނެފައެވެ.
މީގެ އިތުރުން އެ ސަރަހައްދުގައި ހުރި އިންޖީނު ނެތް ވެހިކަލްތައްވެސް މި މުއްދަތުގެ ތެރޭގައި ނުނަގައިފިނަމަ، އުކާލެވޭނެ ކަމަށް މާލޭ ސިޓީ ކައުންސިލުން ބުނެއެވެ.
