ކަރަންޓީނު ފެސިލިޓީއެއްގެ ގޮތުގައި ފަން އައިލެންޑް ރިސޯޓު ބޭނުން ކުރުން ހުއްޓާލައިފި
19 ޖޫން 2020 | ހުކުރު 07:01ކަރަންޓީން ކެޕޭސިޓީ ގޮތުގައި ހުރީ 2،531 އެނދު
ވިލާ ރިސޯޓްސްއިން ހިންގާ ފަން އައިލެންޑް ރިސޯޓު
ކަރަންޓީނު ފެސިލިޓީއެއްގެ ގޮތުގައި ފަން އައިލެންޑް ރިސޯޓު ބޭނުން ކުރުން ހުއްޓާލައިފިއެވެ.
ބުރާސްފަތި ދުވަހުގެރޭ ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް ވިދާޅުވީ ފަން އައިލެންޑް ކަރަންޓީނު ފެސިލިޓީ މިހާރު ކަރަންޓީނު ފެސިލިޓީއެއްގެ ގޮތުގައި ބޭނުން ކުރުން ހުއްޓާލެވިފައިވާ ކަމަށެވެ.
އެގޮތުން މިހާރު ކަރަންޓީނު ކެޕޭސިޓީ ގޮތުގައި ހުރީ 2،531 އެނދު ކަމަށް މަބްރޫކް ވިދާޅުވިއެވެ. އަދި ޓްރާންސިޓް ކަރަންޓީނުގެ ގޮތުގައި 438 މީހުން އެބަތިބިން މަބްރޫކް ފާހަގަކުރެއްވިއެވެ.
ކޮވިޑް-19 މުޅި ރާއްޖެއަށް ފެތުރިއްޖެ ހާލަތެއްގައި އެކަހެރި ކުރަންޖެހޭ މީހުން ބައިތިއްބުމަށްޓަކައި ރާއްޖޭގެ ހުރިހާ އަތޮޅެއްގައި ކަރަންޓީނު ފެސިލިޓީ ގާއިމްކުރިއެވެ. އެގޮތުން، 600 ށްވުރެ ގިނަ ތަންތަން އަތޮޅުތަކުގައި ހަދާފައިވާ ކަމަށް މީގެ ކުރިން ސަރުކާރުން ހާމަކޮށްފައިވެއެވެ.
ރާއްޖޭގެ ކޮވިޑް-19ގެ ހާލަތަށް ބަލާއިރު 2،137 ޕޮޒިޓިވް ކޭސް ވަނީ ރިޕޯޓުކޮށްފައެވެ. އަދި 1،759 މީހަކު ވަނީ ބަލިން ފަސޭހަވެ، ދޫކޮށްލާފައެވެ. ބަލިޖެހޭ މީހުންގެ އަދަދު ދަށްވެ އެކްޓިވް ކޭސްތަކުގެ އަދަދު މިހާރު އުޅެނީ 368 ގައެވެ.
