މިދިޔަ އަހަރު އެމްޓީސީސީއަށް ސާފު ފައިދާގެ ގޮތުގައި 53 މިލިއަން

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ށް މިދިޔަ އަހަރުގެ ސާފު ފައިދާގެ ގޮތުގައި 53,318,631.00 (ފަންސާސް ތިން މިލިއަން ތިން ލައްކަ އަށާރަ ހާސް ހަ ސަތޭކަ ތިރީސް އެއް ރުފިޔާ) ލިބިއްޖެ އެވެ.

އެ ކުންފުނިން އާއްމުކޮށްފައިވާ ބަޔާނެއްގައި ބުނީ، މިދިޔަ އަހަރުގެ ބެލެންސް ޝީޓާއި ފައިދާ އާއި ގެއްލުމުގެ ހިސާބު މި މަހުގެ 17 ވަނަ ދުވަހު ބޭއްވި ކުންފުނީގެ ޑިރެކްޓަރުންގެ ބޯޑުގެ ޖަލްސާއިން ފާސްކޮށްފައިވާ ކަމަށެވެ.

އެ ކުންފުނިން ބުނީ، ހިއްސާދާރުންނަށް މިދިޔަ އަހަރުގެ ހިއްސާގެ ފައިދާގެ ގޮތުގައި މޫނުމަތީ އަގު ފަސް ރުފިޔާގެ ހިއްސާއަކަށް ދެ ރުފިޔާ ބަހާގޮތަށް 2019 ވަނަ އަހަރުގެ އަހަރީ އާންމު ޖަލްސާއަށް ހުށަހެޅުމަށް ބުދަ ދުވަހު ބޭއްވި ޖަލްސާގައި ނިންމާފައިވާ ކަމަށެވެ. ހިއްސާގެ ފައިދާ ލިބޭނީ، 2019 ވަނަ އަހަރުގެ އަހަރީ އާންމު ޖަލްސާގެ ނޯޓިސްގައި ބަޔާންކުރާ ބުކްކްލޯޒްކުރާ ތާރީހާ ހަމައަށް ކުންފުނީގެ ރަޖިސްޓްރީގައި ހިމެނޭ ހިއްސާދާރުންނަށް ކަމަށް އެކުންފުނިން މައުލޫމާތުދެ އެވެ.

ބުދަ ދުވަހުގެރޭ ރާއްޖެޓީވީގެ ފަލަސުރުހީ ޕްރޮގްރާމްގައި އެމްޓީސީސީގެ ސީއީއޯ އާދަމް އާޒިމް ވިދާޅުވީ، އެކި ތަންތަނުން އެ ކުންފުންޏަށް ލިބެންޖެހޭ ފައިސާ ހޯދުމަށް ރަނގަޅަށް މަސައްކަތް ނުކުރެވުމުގެ ސަބަބުން 800 މިލިއަން ރުފިޔާ ނުލިބި އެބަހުރި ކަމަށެވެ. އެގޮތުން އެކި އެކި ކޯޓު މަރުހަލާގައި 38 މިލިއަނަށް ވުރެ ގިނަ ރުފިޔާ ހޯދުމަށް އެބަހުރި ކަމަށް އާޒިމް ވަނީ ވިދާޅުވެފައެވެ.