ކ. މާލެ
|
18 ޖޫން 2020 | ބުރާސްފަތި 09:00
މާލޭގެ ވިޔަފާރި ބަނދަރު
މާލޭގެ ވިޔަފާރި ބަނދަރު
ޔޫސުފް ސޮފްވާން ރަޝީދު
މެއި މަހު ދައުލަތަށް ލިބުނު އާމްދަނީ
އިމްޕޯޓް އަދި އެކްސްޕޯޓް ޑިއުޓީން ދައުލަތަށް ލިބުނު އާމްދަނީ 59 އިންސައްތަ ދަށަށް!
 
ކޮވިޑް-19އާ ގުޅިގެން ރާއްޖެއަށް އެތެރެ ކުރެވޭ ބާވަތްތަކުން 16.2 މިލިއަން ރުފިޔާގެ ޑިއުޓީ މައާފް ކޮށްދީފައިވޭ
 
373 މިލިއަން ރުފިޔާގެ ކާބޯތަކެތި ރާއްޖެއަށް އެތެރެކޮށްފައިވޭ
 
149 މިލިއަން ރުފިޔާގެ މުދާ އެކްސްޕޯޓްކޮށްފައިވޭ

ފާއިތުވި މެއި މަހު އިމްޕޯޓް އަދި އެކްސްޕޯޓް ޑިއުޓީން ދައުލަތަށް ލިބުނު އާމްދަނީ 59 އިންސައްތަ ދަށަށް ގޮސްފައިވާ ކަމަށް މޯލްޑިވްސް ކަސްޓަމްސް ސަރވިސްގެ ތަފާސްހިސާބުތަކުން ދައްކައިފިއެވެ.

ކަސްޓަމްސްގެ ތަފާސް ހިސާބުތައް ދައްކާގޮތުން މެއިމަހު ދިވެހިރާއްޖެއަށް 1.5 ބިލިއަން ރުފިޔާގެ މުދާ އިމްޕޯޓު ކޮށްފައިވެއެވެ. އެއީ 57 އިންސައްތަ ދަށްވުމެކެވެ. އަދި 149 މިލިއަން ރުފިޔާގެ މުދާ އެކްސްޕޯޓްކޮށްފައިވާ ކަމަށާއި، އެއީ 73 އިންސައްތަ ދަށްވުމެއް ކަމަށް ކަސްޓަމްސްގެ ތަފާސްހިސާބުތަކުން ދައްކައެވެ.

އިމްޕޯޓް އަދި އެކްސްޕޯޓް ޑިއުޓީގެ ގޮތުގައި މެއިމަހު ލިބިފައިވަނީ 117 މިލިއަން ރުފިޔާއެވެ. މިއީ މިދިޔަ އަހަރުގެ މިމުއްދަތާ އަޅާބަލާއިރު 59 އިންސައްތައިގެ ދަށްވުމެއް ކަމަށް ކަސްޓަމްސްއިން ބުނެއެވެ. މެއި މަހުގެ ތެރޭގައި 373 މިލިއަން ރުފިޔާގެ ކާބޯތަކެތި ރާއްޖެއަށް އެތެރެކޮށްފައިވާއިރު، އެންމެ ގިނައިން މުދާ އެތެރެކޮށްފައިވަނީ އިންޑިއާއިންނެވެ.

މިދިޔަ މަހު ރާއްޖެއަށް އިމްޕޯޓްކުރި ތަކެތީގެ ތެރެއިން އެންމެ ގިނައީ ކާބޯތަކެތީގެ ބާވަތްތައް ކަމަށްވާއިރު އިންޑިއާއިން 17 އިންސައްތަ މުދާ ރާއްޖެއަށް އެތެރެކޮށްފައިވެއެވެ. އަދި ރާއްޖެއިން އެންމެ ގިނައިން އެކްސްޕޯޓް ކޮށްފައިވަނީ ތައިލެންޑަށެވެ. އެއީ ޖުމްލަ އެކްސްޕޯޓުގެ 46 އިންސައްތައެވެ.

ކަސްޓަމްސްއިން ވަނީ ކޮވިޑް-19އާ ގުޅިގެން ރާއްޖެއަށް އެތެރެ ކުރެވޭ ބާވަތްތަކުން 16.2 މިލިއަން ރުފިޔާގެ ޑިއުޓީ މައާފް ކޮށްދީފައެވެ.

ކޮވިޑް-19އާ ގުޅިގެން ރާއްޖޭގެ އިގްތިސާދަށް ބޮޑެތި ގޮންޖެހުންތަކެއް ކުރިމަތިވަމުން އަންނައިރު، އިގްތިސާދީ ހަރަކާތްތަކުގެ ތެރޭގައި އެކްސްޕޯޓް ކުރެވޭ މުދާ އިތުރުކުރުމަށާއި، ކާނާގެ ޔަގީންކަން ކަށަވަރުކުރުމަށް ސަރުކާރުން ވަނީ ހާއްސަ ޕްރޮގްރާމްތަކެއް ފަށާފައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އަމަން ހަލީމް
0%
0%
0%
0%
0%
0%
ކޮމެންޓް