އެކްސްޕޯޓް، އިމްޕޯޓްގެ އާމްދަނީ އިތުރުވެއްޖެ
އެކްސްޕޯޓް ކޮށްގެން ލިބުނު އާމްދަނީ އިތުރުވީ ޑޮމެސްޓިކް އެސްޕޯޓުންނާއި ރީއެކްސްޕޯޓް ކޮށްގެން ލިބުނު އާމްދަނީ އިތުރުވުމުން
މަރުކަޒީ ބޭންކް އެމްއެމްއޭ
އެކްޕޯސްޓްކޮށްގެންނާއި އިމްޕޯޓް ކޮށްގެން ސަރުކާރަށް ލިބުނު އާމްދަނީ 2016 ވަނަ އަހަރުގެ ޖޫން މަހާ އަޅާބަލާއިރު މިއަހަރު ޖޫން މަހު އިތުރުވެފައިވާ ކަމަށް މަރުކަޒީ ބޭންކް އެމްއެމްއޭއިން ބުނެފިއެވެ.
އެމްއެމްއީން ނެރުނު އޮގްސްޓް މަހުގެ އިގްތިސާދީ ރިވިއުގައި ބުނެފައިވާ ގޮތުގައި މިދިޔަ އަހަރުގެ ޖޫން މަހާ އަޅާ ބަލާއިރު މިއަހަރު ޖޫން މަހު އެކްސްޕޯޓް ކޮށްގެން ސަރުކާރަށް ލިބުނު އާމްދަނީ ވަނީ 19.3 މިލިޔަން ޑޮލަރު އިތުރުވެފައެވެ.
އެމްއެމްއޭގެ ރިވުގައި ބުނެފައިވާ ގޮތުގައި އެކްސްޕޯޓް ކޮށްގެން ލިބުނު އާމްދަނީ އިތުރުވެފައި މިވަނީ ޑޮމެސްޓިކް އެސްޕޯޓުންނާއި ރީއެކްސްޕޯޓް ކޮށްގެން ލިބުނު އާމްދަނީ ފާހަގަ ކޮށްލެވޭ މިންވަރަކަށް އިތުރުވުމާ ގުޅިގެންނެވެ.
އެކްސްޕޯޓް މައިގަނޑު ގޮތެއްގައި އިތުރުވެފައި ވަނީ ގަނޑުކުރި ކަޅުބިލަމަހުން ލިބުނު އާމްދަނީ އިތުރުވުމާ ގުޅިނެންވެ. ނަމަވެސް މި މުއްދަތުގައި ތާޒާ ނުވަތަ ފިނިކުރި ކަންނެލި އެކްސްޕޯޓް ކޮށްގެން ލިބުނު އާމްދަނީ ދަށްވެފައިވާ ކަމަށް އެމްއެމްއޭގެ އިގްތިސާދީ ރިވިއުގައި ވަނީ ފާހަގަ ކޮށްފައެވެ.
އެމްއެމްއޭގެ ރިވިއުގައި ބުނެފައިވާ ގޮތުން އިމްޕޯޓަށް ކުރެވުނު ހޭދަ އިތުރުވެފައި ވަނީ 11.6 މިލިޔަން ޑޮލަރަށެވެ. މީގެ މައިގަނޑު ސަބަބަކީ ތެލުގެ ބާވަތްތަކުގެ ތެރޭގައި ހިމެނޭ ޑީސެލް ވަރަށް ބޮޑުތަން އިތުރުވުމާއި ޕެޓްރޯލް އިމްޕޯޓް ކުރި މިންވަރު އިތުރުވުމެވެ.
މީގެއިތުރުން އިމާރާތް ކުރަން ބޭނުން ކުރާ ސަމާނު އިމްޕޯޓް ކުރި މިންވަރު ވެސް ވަނީ އިތުރުވެފައެވެ. ނަމަވެސް ކާބޯތަކެއްޗާއި ފަރުނީޗަރު އަދި ދަތުރުފަތުރުގެ އިކުއިޕްމެންޓް އިމްޕޯޓްކުރި މިންވަރު މި މުއްދަތުގައި ދަށްވެފައިވާކަން އެމްއެމްއޭގެ ރިވިއުގައި ވަނީ ފާހަގަ ކޮށްފައެވެ.
އެމްއެމްއޭގެ އިގްތިސާދީ ރިވިއުގައި ބުނެފައިވާ ގޮތުގައި ޖުލައި މަސް ނިމުނުއިރު ރާއްޖޭގެ ރަސްމީ ރިޒާވްގައި ހުރީ 571.8 މިލިޔަން ޔޫއެސްޑޮލަރެވެ. މިއީ އަހަރުން އަހަރަށް ބަލާއިރު ހަތް ޕަސެންޓްގެ ދަށްވުމެކެވެ. އަދި މަހުން މަހަށް ބަލާއިރު ފަސް ޕަސެންޓްގެ ދަށްވުމެކެވެ.
މި މުއްދަތުގެ ނިޔަލަށް ރަސްމީ ރިޒާވްގެ ތެރެއިން ޔޫޒަބަލް ރިޒާވްގެ ގޮތުގައި ހުރީ 207.6 ޔޫއެސްޑޮލަރެވެ. މިއީ އަހަރުން އަހަރަށް ބަލާއިރު ކުޑަ މިންވަރެއްގެ ދަށް އަދަދެކެވެ. މަހުން މަހަށް ބަލާއިރު މިއީ 17 ޕަސެންޓުގެ ދަށް އަދަދެއް ކަމަށް ރިވުގައި ވަނީ ބުނެފައެވެ. މީގެއިތުރުން މަހުން މަހަށް ބަލާއިރު ރާއްޖޭގެ ޔޫޒަބަލް ރިޒާވް ދަށްވެފައި ވަނީ އެމްއެމްއޭ އިން ބޭރުފައިސާ ވިއްކާފައިވާ އަދަދު އިތުރުވުމުން ކަމަށް ވެސް އެމްއެމްއޭއިން ނެރުނު އޮގަސްޓް މަހުގެ އިގްތިސާދީ ރިވިއުގައި ވަނީ ބުނެފައެވެ.
