ބްރޯޑްކޮމްއަށް ބަލައިގަންނަ ފީތައް ދެއްކުމުގެ ސުންގަޑިއަށް ބަދަލު ގެނެސްފި
16 ޖޫން 2020 | އަންގާރަ 08:07ބްރޯޑްކާސްޓަރުން ފީ ދެއްކުމުގެ މުއްދަތު އިތުރުކޮށް ދިނުމަށް އެދިފައިވޭ
މޯލްޑިވްސް ބްރޯޑްކާސްޓިންގ ކޮމިޝަން، ފީތައް ދެއްކުމުގެ ސުންގަޑިއަށް ބަދަލު ގެނެސްދިނީ ބްރޯޑްކާސްޓަރުން އެދެމުންދާތީ ކަމަށް ކޮމިޝަނުން ބުނޭ
މޯލްޑިވްސް ބްރޯޑްކާސްޓިންގ ކޮމިޝަން ބަލައިގަންނަ ފީތައް ދެއްކުމުގެ ސުންގަޑިއަށް ބަދަލު ގެނެސްފިއެވެ.
ބްރޯޑްކޮމްއިން ބުނީ ކޮމިޝަނުން ދޫކޮށްފައިވާ ބްރޯޑްކާސްޓިންގ އާއި ރީބްރޯޑްކާސްޓިންގ އަދި ފްރީކުއެންސީ ލައިސަންސްގެ އަހަރީ ފީ ގެ ގޮތުގައި މި ކޮމިޝަނަށް ދައްކަންޖެހޭ ފީތައް ބަލައިގަތުމަށް ކޮންމެ އަހަރަކު ވެސް ހަމަޖައްސާފައިވާ އެންމެފަހުގެ ތާރީޚަކީ އެ އަހަރެއްގެ މާރިޗު މަހުގެ 31 ވަނަ ދުވަސް ކަމަށެވެ.
ކޮވިޑް-19 އާ ގުޅިގެން އިއުލާނު ކޮށްފައިވާ ސިއްހީ ކުއްލި ނުރައްކަލުގެ ހާލަތުގައި، މި ދުވަސްކޮޅު އަޅާފައިވާ އެކި ފިޔަވަޅުތަކުގެ ސަބަބުން، ކޮމިޝަނަށް ދައްކަންޖެހޭ ފައިސާ ދެއްކުމުގައި ދިމާވެދާނެ ދަތިތަކެއް ހުރެދާނެކަމަށް ގަބޫލުކުރެވޭ ކަމަށް ބްރޯޑްކޮމްއިން ބުނެއެވެ. އަދި ލައިސަންސް ލިބިފައިވާ ފަރާތްތަކުން ކޮމިޝަނަށް ދައްކަން ޖެހޭ 2020 ވަނަ އަހަރުގެ އަހަރީ ފީ ޖޫރިމަނާއަކާނުލައި ބަލައިގަތުމުގެ އެންމެ ފަހުގެ ތާރީޚަކީ 30 ޖޫން 2020 ކަމަށް ނިންމާފައިވާ ކަމަށެވެ. ނަމަވެސް ރާއްޖޭގެ ކޮވިޑް-19 ގެ ޙާލަތާ ގުޅިގެން، ބްރޯޑްކާސްޓަރުންނަށް މާލީގޮތުން ދަތިތަކާ ކުރިމަތިލާން ޖެހިފައިވާކަން ފާހަގަކޮށް ބްރޯޑްކޮމްއިން ބުނީ ބައެއް ބްރޯޑްކާސްޓަރުން ފީ ދެއްކުމުގެ މުއްދަތު އިތުރުކޮށް ދިނުމަށް އެދެމުންދާ ކަމަށެވެ.
އެގޮތުން ލައިސަންސް ލިބިފައިވާ ފަރާތްތަކުން ކޮމިޝަނަށް ދައްކަންޖެހޭ 2020 ވަނަ އަހަރުގެ އަހަރީ ފީ ދެއްކުމުގެ މުއްދަތު އިތުރުކޮށްދީފައިވާ ކަމަށާއި، ފީތައް ޖޫރިމަނާއަކާނުލައި 31 އޮގަސްޓް 2020ގެ ނިޔަލަށް ދެއްކޭނެ ކަމަށް ބްރޯޑްކޮމްއިން ބުނެއެވެ.
ބްރޯޑްކޮމްއިން ބުނީ ސުންގަޑިއަށް ބަދަލު ގެނައީ ބްރޯޑްކާސްޓަރުންގެ ލުއި ފަސޭހަ ކޮށްދިނުމުގެ ގޮތުން ކަމަށެވެ.
