ބްރިޖު މަތިން ފުންމާލި މީހަކު ސަލާމަތްކުރި ފުލުހުންނަށް ސީޕީ ޝުކުރު އަދާކުރައްވައިފި
އެމީހާ ސަލާމަތްކޮށްފައިވަނީ ޖޫން 6 ގައި
ބްރިޖް މަތިން ފުންމާލި މީހުން ސަލާމަތްކުރި ފުލުހުންނާއި ސީޕީ ބައްދަލުކުރެއްވުން
ސިނަމާލެ ބްރިޖުން މޫދަށް ފުންމާލި މީހަކު ސަލާމަތްކުރުމުގައި ހަރަކާތްތެރިވި މެރިން ޕޮލިސްގެ ފުލުހުންނާ ކޮމިޝަނަރ އޮފް ޕޮލިސް މުޙައްމަދު ހަމީދު ބައްދަލުކުރައްވައި އެ ފުލުހުންގެ މަސައްކަތަށް ހިތްވަރުދެއްވައި ޝުކުރު އަދާކުރައްވައިފިއެވެ.
ސިންމާލެ ބްރިޖުން މީހަކު ފުންމާލި ކަމުގެ މައުލޫމާތު ޖޫން 06 ވަނަ ދުވަހު 15:46 އެހައިކަންހާއިރު ފުލުހުންގެ ކޮމާންޑް ސެންޓަރަށް ލިބުމާއެކު އެ މައުލޫމާތު ފުލުހުންނާއި ވަނީ ހިއްސާ ކުރެވިފައެވެ. އަދި މައުލޫމާތު ލިބުމާއެކު، 15:53 ހާއިރު މެރިން ޕޮލިސްގެ ފުލުހުންނަށް ހާދިސާ ހިނގައިގެން އުޅޭ ސަރަހައްދަށް ގޮސް އޭނާ ވަނީ ސަލާމަތް ކޮށްފައެވެ.
ބްރިޖު މަތިން ފުންމާލި މީހާ ސަލާމަތްކުރުމުގައި ހަރަކާތްތެރިވި ފުލުހުންނާއި ބައްދަލު ކުރައްވާ ކޮމިޝަނަރ އޮފް ޕޮލިސް ވިދާޅުވީ އެމީހާ ސަލާމަތް ކުރުމުގައި، ހާދިސާ ހިނގި ސަރަހައްދަށް ދިޔަ ފުލުހުން ދެއްކެވި ސާބިތުކަމަށާއި ހިތްވަރަށް ޝުކުރު ދަންނަވާކަމަށެވެ.
މީގެ އިތުރުން، މީހެއްގެ ފުރާނަ ސަލާމަތް ކުރެވުމަކީ ރައްޔިތުންނަށް ޚިދުމަތް ކުރުމުގައި ލިބޭނެ އެންމެ ބޮޑު އެއް ޝަރަފާއި ފަޚުރު ކަމަށާއި ހުރިހާ ފުލުހުންވެސް، ރައްޔިތުންނަށް ޚިދުމަތް ކުރުމުގައި، ރައްޔިތުންގެ ސަލާމަތާއި ރައްކާތެރިކަމަށް މަސައްކަތް ކުރުމަކީ އެންމެ އިސް ވާޖިބު ކަމުގައި ދެކެން ކޮމިޝަނަރ އޮފް ޕޮލިސް އެދިލެއްވިއެވެ.
ފުލުހުންގެ އަގު ވަޒަންކުރުމަށް ބޭއްވި ބައްދަލުވުމުގައި ކޮމިޝަނަރ އޮފް ޕޮލިސް މުޙައްމަދު ހަމީދުގެ އިތުރުން، ޑެޕިއުޓީ ކޮމިޝަނަރ އޮފް ޕޮލިސް އާބްދުލް މަންނާން ޔޫޞުފާއި އެސިސްޓެންޓް ކޮމިޝަނަރ އޮފް ޕޮލިސް ޢަބްދުﷲ ފައިރޫޝް އާއި ޗީފް ސުޕްރިންޓެންޑެންޓް އޮފް ޕޮލިސް ޔޫނުސް ޞަބާޙާއި މެރިން ޕޮލިސްގެ އިސްވެރިން ބައިވެރިވެލެއްވިއެވެ.
