ފުރަބަންދަށް ލުއިތަކެއް ދިނުމަށް ފްރާންސްގެ ސަރުކާރުން ނިންމައިފި

ކޮވިޑް-19 އާ ގުޅިގެން އިއުލާން ކޮށްފައިވާ ފުރަބަންދަށް އިތުރު ލުއިތަކެއް ދިނުމަށް ފްރާންސްގެ ސަރުކާރުން އިއުލާން ކޮށްފިއެވެ.

ފްރާންސްގެ ރައީސް، އިމެނުއެލް މެކްރޮންއާ ހަވާލާދީ ބައިނަލްއަގުވާމީ މީޑިއާތަކުގައި ރިޕޯޓުކޮށްފައިވާ ގޮތުން، ފްރާންސްގެ އެކި ކަންކޮޅުތަކުގައި ހިންގާ ކެފޭ، ރެސްޓޯރަންޓްތައް މި މަހުގެ ތެރޭގައި ހުޅުވުމަށް ހުއްދަ ދޭނެއެވެ. މީގެ އިތުރުން ޔޫރަޕްގެ އިތުރު ސަރަހައްދުތަކަށް ވައިގު ދަތުރުފަތުރު ކުރުމުގެ ހުއްދަ ދިނުމަށް ނިންމާާފައިވާއިރު، އުމުރުން ދުވަސްވީ މީހުން ބަލަހައްޓާ މަރުކަޒުތަކަށް އާއިލާއަށް ޒިޔާރަތް ކުރުމުގެ ހުއްދަ ދިނުމަށްވެސް ވަނީ ނިންމާފައެއެވެ.

އަދި ހައި ސްކޫލުތައް ފިޔަވައި އެހެން ސްކޫލުތައް ޖޫން މަހުގެ 22 ވަނަ ދުވަހު ހުޅުވާނެ ކަމަށް އިމެނުއެލް މެކްރޮން ވަނީ ވިދާޅުވެފައެވެ.

ފްރާންސަށް ކުރިމަތިވެފައިވާ އިޤުތިޞާދީ ހީނަރުކަމުން އަރައިގަތުމަށް، އެ ގައުމުގެ ވިޔަފާރިތަކާއި އެހެނިހެން މަސައްކަތަކަށް ނިކުތުން އަވަސްކުރަންޖެހޭ ކަމަށް ފިނޭންސް މިނިސްޓަރު ބްރޫނޯ ލިމެއާވެސް ވަނީ ވިދާޅުވެފައެވެ. އަދި ކޮވިޑް-19 އާ ގުޅިގެން ފުރަތަމަ ކުއާޓަރުގެ ތެރޭގައި އެކަނިވެސް، އެގައުމުގެ އިޤުތިޞާދު ދަށަށް ގޮސް ބައި މިލިއަނެއްހާ މީހުންގެ ވަޒީފާ ވަނީ ގެއްލިފައެވެ.

ފްރާންސްގެ އެންމެ ފަހުގެ ތަފާސްހިސާބުތަކަށް ބަލާއިރު، ޖުމްލަ 157،220 (އެއް ލައްކަ ފަންސާސް ހަތް ހާސް، ދުއިސައްތަ ވިހި) މީހަކަށް ބަލިޖެހިފައިވާއިރު، 29،402 (ނަވާވީސް ހާސް، ހަތަރުސަތޭކަ ދެ) މީހަކު ވަނީ ބަލިޖެހިގެން މަރުވެފައެވެ.