މޮނިޓަރިންގެ ހާލަތުގައި މިހާރު ހުންނެވީ އެންމެ މެންބަރެއް
ޖަލްސާ ފެއްޓެވިއިރު 31 މެންބަރުން ތިއްބެވި
ރައްޔިތުންގެ މަޖިލީހުގެ ޖަލްސާއެއްގެ ތެރެއިން: މިހާރު މޮނިޓަރިންގެ ހާލަތުގައި މިހާރު ހުންނެވީ އެންމެ މެންބަރެއް
ކޮވިޑް-19 އާ ގުޅިގެން ކަރަންޓީން ނުވަތަ މޮނީޓަރިންގެ ޙާލަތަށް ގެނެވިފައިވާ ގޭތަކުގައި މިހާރު ހުންނެވީ އެންމެ މެންބަރެއް ކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.
ހޯމަ ދުވަހުގެ ޖަލްސާ ފައްޓަވަމުން ޖަލްސާގެ ހާޟިރީ އިއްވަވާ ދެއްވަމުން ރައީސް ނަޝީދު ވިދާޅުވީ ޖަލްސާ ފެށިއިރު، 31 މެންބަރުން ޖަލްސާއަށް ހާޟިރު ވެވަޑައިގަންނަވާފައިވާ ކަމަށެވެ. އަދި މިހާރު މޮނިޓަރިންގެ ހާލަތުގައި ވަނީ އެންމެ މެންބަރެއް ކަމަށް މަޖިލީހުގެ ރައީސް ވިދާޅުވިއެވެ.
މިދިޔަ ހަފުތާގެ ހޯމަ ދުވަހުގެ ޖަލްސާގައި ވާހަކަ ދައްކަވަމުން ރައީސް ނަޝީދު ވިދާޅުވީ މޮނިޓަރިންގެ ހާލަތުގައި ދެ މެމްބަރަކު ތިއްބެވި ކަމަށެވެ. އޭގެކުރިން މިދިޔަ މެއި މަހުގެ 27 ވަނަ ދުވަހު އޮތް ޖަލްސާގައި ވާހަކަ ދައްކަވަމުން ރައީސް ނަޝީދު ވިދާޅުވެފައި ވަނީ މޮނިޓަރިންގެ ހާލަތުގައި 7 މެންބަރުން ތިއްބެވި ކަމަށެވެ. މޮނިޓަރިންގެ ހާލަތުގައި ތިއްބެވި މެމްބަރުންނަކީ ކޮބައިކަމެއް ރިޔާސަތުން ހާމައެއް ނުކުރައްވައެވެ.
ހޯމަ ދުވަހުގެ ޖަލްސާގައި ވަނީ އުނގޫފާރު ދާއިރާގެ އެމްޑީޕީ މެމްބަރު މުހައްމަދު ވަހީދު ހުށަހަޅުއްވާފައިވާ ކުއްލި މައްސަލައެއް ކުރިޔަށް ގެންދަވާފައެވެ. މީގެއިތުރުން އިބްތިދާޢީ ބަހުސްގައި ގަލޮޅު އުތުރު ދާއިރާގެ މެންބަރު އީވާ ޢަބްދުالله ހުށަހަޅުއްވާފައިވާ، ދިވެހިރާއްޖޭގައި އަންހެނުންނާ މެދު ކުރާ ތަފާތު ކުރުންތަކަށް ހުއްޓުމައް ގެނައުމަށްޓަކައި، ކަމާ ގުޅޭ ސިޔާސަތުތަކާއި، ނިޒާމާއި ޤާނޫނުތަކާއި ގަވާއިދުތަކުގައި ހުރި ހުރަސްތަކާއި ތަފާތުކުރުންތައް ދެނެގަތުމަށްޓަކައި ޕާލިމަންޓަރީ އިންކުއަރީއެއް ހެދުމަށް ގޮވާލައި ހުށަހަޅުއްވާފައިވާ ޤަރާރު ކުރިޔަށް ގެންދިޔުމަށް ވަނީ އެޖެންޑާކޮށްފައެވެ. މީގެއިތުރުން ކޮމިޓީތަކުން ހުށަހަޅާ ދެ ރިޕޯޓެއްވެސް ވަނީ އެޖެންޑާކޮށްފައެވެ.
