ކޮވިޑް-19ން ރައްކާތެރިވުމުގެ ގޮތުން ރަށްރަށުގައި އެޅި ފިޔަވަޅުތައް ބާތިލްކޮށްފި އެވެ.
ބާތިލްކޮށްފައިވަނީ މޭ މަހުގެ 29 ވަނަ ދުވަހު މާލެ ސަރަހައްދު ފިޔަވައި ރާއްޖޭގެ ހުރިހާ ރަށެއްގައި ހާއްސަ ފިޔަވަޅުތައް އެޅުމަށް އެންގި އެންގުމެވެ.
އެ އެންގުމުގައިވާ ގޮތުން، ޒަރޫރީ ބޭނުންތަކަށާއި ސިއްހީފަރުވާ ހޯދުމަށްޓަކައި މެނުވީ، އެއް ރަށުން އަނެއް ރަށަށް ދަތުރުކުރުން ހުއްޓާލުމާއި، ރައްޔިތުންނަށް ބޭނުންވާ ކާބޯތަކެއްޗާއި އެނޫންވެސް ޒަރޫރީ ތަކެތި ފޯރުކޮށް ދިނުމުގެ މަސައްކަތް، ލޯކަލް ކައުންސިލްތަކާއި ކަމާބެހޭ އިދާރާތައް ގުޅިގެން ވިލަރެސްކުރުމާއި، މޮނިޓަރިންގެ ހާލަތަށް ގެނެވޭ ރަށްތަކާއި މޮނިޓަރިންގެ ހާލަތު ނިމުމަކަށް ގެނެވިފައިވާތާ 14 ދުވަސްވެފައި ނުވާ ރަށްތައް ފިޔަވައި ރާއްޖޭގެ އެހެން ރަށްރަށުގައި، ބަލިން ރައްކާތެރިވުމުގެ ފިޔަވަޅުތައް އެޅުމެވެ.
ނަމަވެސް އާދިއްތަ ދުވަހުގެރޭ ޑިރެކްޓަރ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރު ސޮއިކުރައްވާ ނެރުއްވާފައިވާ ބަޔާނެއްގައި ވިދާޅުވީ، މާލެ ސަރަހައްދު ފިޔަވައި ރާއްޖޭގެ ހުރިހާ ރަށެއްގައި ހާއްސަ ފިޔަވަޅުތައް އެޅުމަށް މޭމަހުގެ 29 ވަނަ ދުވަހުކުރި އިއުލާން ބާތިލްކޮށްފައިވާ ކަމަށެވެ. އެއާއި އެކު ރަށްރަށުގައި އެޅި ހުރިހާ ފިޔަވަޅުތައް ވަނީ ބާތިލްވެފައި އެވެ.
ނަމަވެސް މާލެ އޮތީ އަދިވެސް ލޮކްޑައުންގެ ހާލަތުގައި އެވެ. ލޮކްޑައުން އަށް ބޮޑެތި ލުއިތަކެއް ދޭން ފަށާފައިވިޔަސް، ބޭރު ތެރޭގައި އުޅޭ އުޅުން މަދުކޮށް ރައްކާތެރިކަމުގެ ފިޔަވަޅުތައް އެޅުމަށް އެޗްޕީއޭއިން ދަނީ ހުރިހާ ފަރާތްތަކަށް އިލްތިމާސް ކުރަމުންނެވެ.
