ކުދި ވެލާތަކެއް މަގުއޮޅި ރަށު ތެރެއަށް އެރުމުން އެތަކެތި ސަލާމަތްކޮށް މޫދަށް ދޫކޮށްލައިފި
ގިނަ ވެލާތައް ފެނިފައިވަނީ މަގުގައި ހެދިފައިވާ ފެންގަނޑުގެ ތެރެއިން
މ. މުލީ ރަށުތެރެއަށް އެރި ކުދި ވެލާތައް މޫދަށް ދޫކޮށްލަނީ
ވެލާބިސްވަޅަކުން ނުކުތް ކުދި ވެލާތަކެއް މަގުއޮޅި މ. މުލީ މަގުތަކަށް އެރުމުން އެވެލާތައް ސަލާމަތްކޮށް މޫދަށް ދޫކޮށްލައިފި އެވެ.
އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ) އިން ބުނެފައިވާ ގޮތުގައި، ވެލާ ބިސްވަޅަކުން ނިކުތް ވެލާތަކެއް މަގުއޮޅި، އެ ވަލާތައް، މުލީ މަގުތަކަށް އަރާފައިވާ ކަމަށާއި، އެ ވެލާތައް ފެނުނީ ވެލާ ބިސްވަޅާ ގާތްގަނޑަކަށް 150 މީޓަރު ދުރު ހިސާބަކުން ހޮނިހިރު ދުވަހުގެ ރޭގެ ވަގުތެއްގައި ކަމަށެވެ. އަދި އެ ވެލާތައް މަގުތަކުން ނަގައި، ރައްކާތެރިކަމާއެކު، ފުލުހުން މެދުވެރިކޮށް، މޫދަށް ދޫކޮށްލާފައިވާ ކަމަށްވެސް އީޕީއޭއިން ބުނެއެވެ.
މިދުވަސްވަރަކީ ވިއްސާރަ ދުވަސްވަރެއް ކަމުން މުލީ މަގުތަކުގައި ފެން ހެދިފައިވާތީ އެ ކުދި ވެލާތަކުގެ ތެރެއިން ގިނަ ވެލާތައް ފެނިފައިވާނީ ހެދިފައިވާ ފެންގަނޑުތަކުގެ ތެރެއިން ކަމަށްވެއެވެ.
ވެލާ ހިފުމާއި އެތަކެއްޗަށް އަނިޔާވާ ފަދަ ކަންކަން ކުރުމަކީ މަނާ ކަމެކެވެ. ރާއްޖޭގައި ހިމާޔަތްކޮށްފައިވާ ވެލައާއި ކަހަނބު ހިފުން މަނާކޮށްފައިވާތާ ގިނަ އަހަރުތަކެއް ވެފައިވާތީ، ރާއްޖޭގައި ގިނަ އަދަތަކަށް ވެލާ ކަހަނބު އުޅެއެވެ.
ވެލާ ހިފުން މަނާކޮށްފައިވީނަމަވެސް، ބައެއް ރަށްރަށުގައި ވެލާ ހިފައި، އޭގެ ބޭނުން ކުރަމުންދާކަން ބައެއް ފަރާތްތަކުން ބުނަމުން ދެއެވެ.
ރާއްޖޭގެ ވެލިގަނޑު އޮންނަ ވަރަށް ގިނަ ރަށްރަށަށް ވެލާ ބިސްއަޅަން އަރަ އެވެ. އެގޮތުން މީހުން ދިރިއުޅޭ ރަށްރަށަށްވެސް ވެލާ ބިސްއަޅަން އަރައެވެ. ވެލާ ބިސްއަޅާއިރު، ވަރަށް ގިނަ އަދަދަކަށް ބިސްއަޅައެވެ. އެގޮތުން 100 އިން 200 އިން ބިސްޅާއިރު، އެބިސްތަކުން ވެލާ އުފައްވެ، މޫދަށްގޮސް، ރައްކާތެރިކަމާއެކު އުޅެބޮޑުވަނީ ވަރަށް މަދު ވެލާތަކަކަށް ކަމަށް ވެއެވެ.
