ނޭޕާލުން އަންނަން ބޭނުންވެފައި ތިބި ދިވެހިންނަށް ފްލައިޓުތަކެއް ހަމަޖެހިއްޖެ
13 ޖޫން 2020 | ހޮނިހިރު 12:04އެ ފްލައިޓުތަކަކީ ރާއްޖޭގައި ތިބި ނޭޕާލް ރައްޔިތުން އަނބުރާ ގެންދިއުމަށް ބާއްވާ ދެ ފްލައިޓް
ަބަންގްލަދޭޝްގެ އަސްކަރީ މަތިންދާބޯޓެއްގައި ގެނައި ދިވެހިންތަކެއް: ނޭޕާލުން ގެނައި 18 ކުއްޖަކު ހިމެނޭ
ނޭޕާލުން ރާއްޖެއަށް އަންނަ ފްލައިޓްތަކުގައި ރާއްޖެ އަންނަން ބޭނުންވާ ދިވެހިންނަށް އެ ފުރުސަތު އެބައޮތް ކަމަށް ފޮރިން މިނިސްޓްރީން މައުލޫމާތު ދީފިއެވެ.
މި ފްލައިޓުތައް އަންނަން ހަމަޖެހިފައިވަނީ ޖޫން މަހުގެ 15 އަދި 16 ވަނަ ދުވަހެވެ. މިއީ ގައުމަށް ނުދެވި ރާއްޖޭގައި ތާށިވެފައި ތިބި ނޭޕާލްގެ ރައްޔިތުން އަނބުރާ ގައުމަށް ގެންދިއުމަށް ބާއްވާ ފްލައިޓުތަކެކެވެ.
ފޮރިން މިނިސްޓްރީން މައުލޫމާތު ދީފައިވާ ގޮތުގައި، މި ފްލައިޓުތަކުން އަންނަން ބޭނުންވާ ފަރާތްތަކަށް ރާއްޖެ އައުމަށް ބޭނުންވާ ހުއްދަ ދިނުމުގެ މަސައްކަތް ސަރުކާރުން އަންނަނީ ކުރަމުންނެވެ. މި ވަގުތު ރާއްޖެ އަންނަން 8 މީހަކު އެދިފައިވާކަން ފާހަގަކޮށް، ފޮރިން މިނިސްޓްރީން ވަނީ، ނޭޕާލުން ރާއްޖެ އަންނަން ބޭނުންވާ އިތުރު ދިވެހިން ތިބިނަމަ، ޕާކިސްތާނުގައި ހުންނަ ދިވެހިރާއްޖޭގެ ހައިކޮމިޝަނަށް އެންގުމަށް އެދިފައެވެ.
ކޮވިޑުގެ ހާލަތާއި ގުޅިގެން ބޯޑަރުތައް ބަންދުކުރުމާއި ގުޅިގެން ނޭޕާލުގައި ތާށިވެފައި ތިިބި ދިވެހިންތަކެއް އެންމެ ފަހުން ރާއްޖެ ގެނައީ އޭޕްރިލް މަހުގެ ތެރޭގައެވެ. ބަންގްލަދޭޝްގެ އަސްކަރީ މަތިންދާބޯޓެއްގައި ރާއްޖެއަށް އެފަހަރު ގެނެސްފައިވަނީ 18 ދިވެހިންނެވެ. އޭގެ ތެރޭގައި ގިނައީ ނޭޕާލުގައި ތިބި ކިޔަވާ ކުދިންނެވެ.
