މާފުށި ބިން ހިއްކުމުގެ މަޝްރޫއުގެ ތެރެއިން 25 ހެކްޓަރު ބިން ހިއްކައި ނިމިއްޖެ
މި މަޝްރޫޢު ފަށާފައިވަނީ މިދިޔަ އަހަރުގެ ޑިސެމްބަރުގައި
ކ. މާފުށި ފަޅުތެރެއިން ހިއްކާފައިވާ ސަރަހައްދު: 25 ހެކްޓަރުގެ ބިން ހިއްކާ ނިމިއްޖެ
ކ. މާފުށި ބިންހިއްކުމުގެ މަޝްރޫއުގެ ތެރެއިން އެ ރަށު ފަޅު ތެރެއިން ހިއްކަން ނިންމި 25 ހެކްޓަރުގެ ބިން ހިއްކާ ނިމިއްޖެއެވެ.
މިދިޔަ އަހަރުގެ ޑިސެމްބަރު މަހުގެ 25 ގައި ފެށި މި މަޝްރޫޢަކީ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ރަށެއްގެ ބިން ހިއްކުމަށް އިއުލާންކޮށް ފެށި ފުރަތަމަ މަޝްރޫއެވެ. އެގޮތުން މިނިސްޓްރީ އޮފް ނެޝަނަލް ޕްލޭނިން އެންޑް އިންފްރާ ސްޓަރަކްޗަރއިން އެމްޓީސީސީއާ މި މަސައްކަތް ހަވާލުކުރީ 249 ދުވަހުގެ ތެރޭގައި މަސައްކަތް ނިންމާ ގޮތަށެވެ.
ދައުލަތުގެ ބަޖެޓުން 99،981،373ރ. ހަރަދުކޮށްގެން ހިންގާ މަޝްރޫއުގެ ދަށުން 25 ހެކްޓަރުގެ ބިން ހިއްކާ 1110 މީޓަރުގެ ރިވެޓްމަންޓް ގާއިމްކުރުމަށް ވަނީ ނިންމާފައެވެ.
ގެސްޓްހައުސްގެ ވިޔަފާރި އެންމެ ފުރަތަމަ ތައާރަފްކުރެވުނު އެއް ރަށްކަމުގައިވާ މާފުއްޓަށް ދިމާވެފައިވާ ގޯތި ގެދޮރާއި، ބިމުގެ ދަތިކަމާއި ގޮނޑުދޮށް ސަރަހައްދުގެ ކުޑަކަމާއި، ތޮއްޖެހުމުގެ މައްސަލައަށް ލުއި ހޯދުމަށްޓަކައި މާފުށި ފަޅުން ބައެއް ހިއްކުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދެކެވެ.
