ރަޝިއާގައި ކޮވިޑް ޖެހުނު މީހުންގެ އަދަދު ބައި މިލިއަނަށް
11 ޖޫން 2020 | ބުރާސްފަތި 11:00މި ހިނގަމުންދާ 24 ގަޑި އިރު ތެރޭގައި ރަޝިއާއިން ވަނީ 8 ހާހަށްވުރެ ގިނަ ޕޮޒިޓިވް ކޭސް ރިޕޯޓްކޮށްފަ
ރަޝިއާގެ ހޮސްޕިޓަލެއްގައި ކޮވިޑް ޖެހުނު މީހުންނަށް ފަރުވާ ދެމުންދަނީ
ރަޝިއާގައި ކޮވިޑް-19 ޖެހުނު މީހުންގެ އަދަދު ބައި މިލިއަނަށް އަރައިފިއެވެ.
މި ހިނގަމުންދާ 24 ގަޑި އިރު ތެރޭގައި ރަޝިއާއިން ވަނީ 8000ށް ވުރެ ގިނަ ޕޮޒިޓިވް ކޭސް ރިޕޯޓްކޮށްފައެވެ. މިއާއިއެކު އެގައުމުގައި ވައިރަސް ޖެހުނު މީހުންގެ އަދަދު ވަނީ 502،000ށް ވުރެ މައްޗަށް އަރާފައެވެ. ފާއިތުވި 24 ގަޑި އިރު 174 މީހަކު ވަނީ އެގައުމުން މަރުވެފައެވެ. ރަޝިއާއިން މަރުވީ މީހުންގެ ޖުމްލަ އަދަދަކީ 6532 އެވެ.
ރަޝިއާގެ ވެރިރަށް މޮސްކޯއިން ވަނީ މެއި މަހު ކޮވިޑް ޖެހިގެން މަރުވި މީހުންގެ ތަފާސްހިސާބުތައް އާންމުކޮށްފައެވެ. މި ތަފާސް ހިސާބުތައް ދައްކަގޮތުން 5260 މީހަކު ވަނީ މެއި މަހު މަރުވެފައެވެ. މި ހަފުތާގެ ކުރީކޮޅު މޮސްކޯގެ މޭޔަރ ވަނީ ގޭގައި ތިބުމަށް އަންގާފައިވާ އެންގުން ނިމުމަކަށް ގެނެސްފައެވެ. އަދި މި މަސް ނިމޭ އިރު ސިޓީ އަލުން ހުޅުވުމަށް ދަނީ މަސައްކަތް ކުރަމުންނެވެ.
ނިމިގެންދިޔަ ހަފުތާގައި ރަޝިއާގެ ރައީސް ވްލަޑިމިއަރ ޕޫޓިން ވަނީ ގާނޫނު އަސާސީ އިސްލާހުކުރުމަށް ބޭއްވުމަށް ނިންމާފައިވާ ވޯޓުލުން ފަސްކޮށްފައެވެ. މި އިސްލާހަކީ 2036 ވަނަ އަހަރާ ހަމައަށް ޕޫޓިން ވެރިކަމުގައި ހުރެވޭ ގޮތަށް ނަގަން އުޅޭ ވޯޓެކެވެ. މީގެ އިތުރުން މެއި 9 ގައި ބާއްވާ ނަސްރުގެ ދުވަހުގެ ސިފައިންގެ ޕެރޭޑް ވެސް ވަނީ ފަސްކޮށް ޖޫން 24 ގައި ބާއްވާ ގޮތަށް ހަމަޖައްސާފައެވެ.
