ޖޫން މަހުގެ ރީޑިން ނަގަން ސްޓެލްކޯއިން ގޭގެއަށް ދާން ފަށަނީ

ކޮވިޑް-19 ގެ ސަބަބުން މާލޭގައި ކޮށްފައިވާ ލޮކްޑައުން އަށް ލުއިތަކެއް ދޭން ފެެށުމާއި ގުޅިގެން ޖޫން މަހުގެ ބިލް ހެދުމަށްޓަކައި ކުރިންވެސް އަމަލު ކުރަމުން އައިސްފައިވާގޮތަށް ގޭގެއަށް ގޮސް މީޓަރުތަކުގެ ރީޑިން ނަގަން ނިންމާފައިވާ ކަމަށް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ބުނެފި އެވެ.

މާލޭގެ ލޮކްޑައުންއާއި އެކު ސްޓެލްކޯގެ ކަސްޓަމަރުންނާއި، މުވައްޒަފުންގެ ސަލާމަތާއި ރައްކާތެރިކަމަށްޓަކައި، ފާއިތުވި ދެ މަހުވެސް ބިލް ހަދަމުން އައިސްފައިވަނީ އެ ކުންފުނީގެ ވެބް ޕޯޓަލް މެދުވެރިކޮށް ލިބެމުން ދިޔަ މީޓަރުގެ ފޮޓޯތަކަށެވެ.

އެކަމަކުވެސް ވެބް ޕޯޓަލް މެދުވެރިކޮށް މީޓަރުގެ ފޮޓޯ ފޮނުވުމުގައި ކަސްޓަމަރުންނަށް ދަތިތަކެއް ހުރިކަން އެ ކުންފުންޏަށް ފާހަގަކުރެވިފައިވާ ކަމަށް ބުދަ ދުވަހުގެރޭ ސްޓެލްކޯއިން ނެރެފައިވާ ބަޔާނެއްގައި ބުންޏެވެ. އެ ކުންފުނިން ބުނީ، ފާއިތުވި ދެ މަހުވެސް ގިނަ މީޓަރުތަކެއްގެ ފޮޓޯ ނުލިބިހުރުމުން ފޮޓޯ ނުލިބޭ މީޓަރުތަކަށް ކުންފުނިން ބިލް ހަދާފައި ވަނީ ފާއިތުވެ ދިޔަ މަސްތަކުގައި ކަރަންޓު ބޭނުން ކޮށްފައިވާ މިންވަރަށް ބަލައި އެވްރެޖަށް ކަމަށެވެ. އެހެން ކުރިޔަށް ގެންދިޔަ ނަމަވެސް ލޮކްޑައުން އަށް ލުއިތަކެއް ދޭން ފެށުމާއި ގުޅިގެން މި މަހުގެ ބިލް ހެދުމަށްޓަކައި ކުރިންވެސް އަމަލު ކުރަމުން އައިސްފައިވާގޮތަށް ގޭގެއަށް ގޮސް މީޓަރުތަކުގެ ރީޑިން ނަގަން މިހާރު ވަނީ ނިންމާފަ އެވެ.

އެގޮތުގެ ބުދަ ދުވަހުން ފެށިގެން މުވައްޒަފުން ގޭގެއަށް ގޮސް ރީޑިންގ ނަގަމުންގެންދާނެ ކަމަށް ސްޓެލްކޯއިން ވަނީ ބުނެފައި އެވެ. ލޮކްޑައުންއަށް ލުއިތަކެއް ދިން ނަމަވެސް މިހާލަތުގައިވެސް ކުންފުނީގެ ކަސްޓަމަރުންނާއި މުވައްޒަފުންގެ ސަލާމަތާއި ރައްކާތެރިކަމަށް އިސްކަމެއް ދޭންޖެހޭތީ، މިހާލަތާ ގުޅިގެން ވަދެ ނުކުމެވުމުގައި ދަތި ތަންތަނަށް ބިލް ހަދަމުން ދާނީ ކުންފުނީގެ ވެބް ޕޯޓަލް މެދުވެރިކޮށް ލިބޭ ފޮޓޯއަށް ކަމަށެވެ.

ފޮޓޯ ނުލިބޭ ތަންތަނަށް ކުރީގެ މަސްތަކުގެ އެވްރެޖަށް ބިލް ހަދަމުން ގެންދާއިރު ފޮޓޯ ފޮނުވަން ޖެހޭ ކަސްޓަމަރުންނަށް އެސްއެމްއެސް މެދުވެރިކޮށް އެކަން ސްޓެލްކޯއިން އަންގަމުން ދާނެ އެވެ. އޭގެ އިތުރުން ރީޑިންގ ނަގަން ފެށުމާއެކު، ކުރިންވެސް އިއުލާންކޮށްފައިވާ ގޮތައް އެވްރެޖް ބިލް ފޮނުވާފައިވާ ކަސްޓަމަރުންގެ ބިލްތަކަށް ގެންނަން ޖެހޭ އެޖަސްޓްމަންޓް ނުވަތަ ބަދަލުތައް ގެންނަމުން ގެންދާނެ ކަމަށްވެސް ސްޓެލްކޯއިން ވަނީ ބުނެފައި އެވެ.