މައިނޯރިޓީގެ އަޑުނެތި މަޖިލިސް ހިންގަން އުޅޭ ކަމަށް ވިދާޅުވެ، ނާޒިމްގެ ކަންބޮޑުވުން
އެހެން ވިދާޅުވާން ޖެހުނު ސަބަބެއް ނާޒިމް ހާމައެއް ނުކުރައްވާ
ދަނގެތި ދާއިރާގެ މެމްބަރު ނާޒިމް އަދި މަޖިލީހުގެ ރައީސް ނަޝީދު
މައިނޯރިޓީގެ އަޑު ނެތި މަޖިލީސް ހިންގަވަން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އުޅުއްވަން އުޅޭ ކަމަށް ވިދާޅުވެ, ދަނގެތި ދާއިރާގެ މެމްބަރު މުހައްމަދު ނާޒިމް (ކާނަލް ނާޒިމް) ކަންބޮޑުވުން ފާޅުކުރައްވައިފިއެވެ.
ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީއަށް ނިސްބަށްވެ ވަޑައިގަންނަވާ ނާޒިމް ކުރެއްވި ޓްވީޓެއްގައި ވަނީ، މައިނޯރިޓީގެ އަޑުނެތި މަޖިލީސް ހިންގަވަން މަޖިލީހުގެ ރައީސް އުޅުއްވާ ކަމަށް ތުހުމަތުކުރައްވާފައެވެ. އަދި އެކަމާއި މެދު ކަންބޮޑުވުންތައް ހުރި ކަމަށް ކުރީގެ ޑިފެންސް މިނިސްޓަރުކަން ވެސް ކުރައްވާފައިވާ ނާޒިމް ވިދާޅުވިއެވެ. ނަމަވެސް އެހެން ވިދާޅުވާން ޖެހުނު ސަބަބެއް ނާޒިމް ހާމައެއް ނުކުރައްވައެވެ. ނާޒިމްގެ ޓްވީޓް ނިންމަވާލެއްވީ މަހަތްމާ ގަންދީގެ ވިދާޅުވެފައިވާ ބަސްފުޅެއް ހިއްސާ ކުރައްވަމުންނެވެ. އެއީ ''ތިބާ އަހަރެން މައިނޯރިޓީގެ ތެރޭގައި ހިމެނުނަސް ހައްގުތެދު ވަނީ ތެދަށް'' މިހެންނެވެ.
މެމްބަރު ނާޒިމްގެ ހުރި ކަންބޮޑުވުންތަކާއި ގުޅިގެން މަޖިލީހުގެ މެޖޯރިޓީ ޕާޓީ އެމްޑީޕީގެ ޕާލިމެންޓަރީ ގްރޫޕްގެ ލީޑަރު އަލީ އާޒިމްއަށް ގުޅާލުމުން އޭނާ ވިދާޅުވީ، މައިނޯރިޓީ ޕާޓީތަކުގެ މެމްބަރުންނަށް މަޖިލީހުގެ ތަޅުމުގައި އަޑު އިއްވުމުގެ ފުރުސަތު ނުލިބޭ ކަމަށް ވިދާޅުވާން ޖެހުނު ސަބަބެއް އެނގިވަޑައި ނުގެންނެވި ކަމަށެވެ. މަޖިލީހުގެ ރައީސް ހުރިހާ ޕާޓީތަކަށްވެސް ހަމަ ހަމައިން ފުރުސަތު ދެއްވާ ކަމަށް އާޒިމް ފާހަގަކުރެއްވިއެވެ.
މައިނޯރިޓީގެ އަޑު އިއްވުމަށް ފުުރުސަތު ނުލިބޭ ކަމަށް ނާޒިމް ވިދާޅުވެފައިވާއިރު، ޖުމްހޫރީ ޕާޓީން ޖަލްސާތައް ބޮއިކޮޓް ކޮށްފައިވާކަން ފާހަގަކުރެވިފައިވާ ކަމަށް މަޖިލީހުގެ ރައީސް ވަނީ އަންގާރަ ދުވަހު ވިދާޅުވެފައި އެވެ. އެކަމަކު ޖަލްސާތައް ބޮއިކޮޓް ނުކުރާކަމަށް ޖޭޕީން ބުނެއެވެ.
ޖޭޕީ އަކީ ސަރުކާރު ކޯލިޝަންގައި ހިމެނޭ ޕާޓީއަކަށްވިޔަސް 19 މަޖިލީހުގެ ގޮނޑިތައް ބެހިގޮތުން ޖޭޕީއާ އެމްޑީޕީއާ ދެމެދު ވަނީ ނުތަނަވަސްކަން އިތުރުވެފައިއެވެ. ޖޭޕީގެ ލީޑަރު ގާސިމް އިބްރާހިމްއާ އެމްޑީޕީގެ ރައީސް ނަޝީދާ ދެ ބޭފުޅުން ދެމެދު ދޭތެރެ ދޭތެރެއިން ބަހުގެ ހޫނު ހަމަލާތައް ދަނީ ބަދަލު ކުރެވެމުންނެވެ. އެ ދެބޭފުޅުންގެ ދެމެދުގައި ދެބަސްވުން އުފެދުނު ކަމަށްވިޔަސް ކޯލިޝަލް ރޫޅާލުމުގެ ވިސްނުމެއް ނުގެންގުޅުއްވާ ކަމަށް ރައީސް އިބްރާހިމް މުހައްމަދު ސޯލިހު ވަނީ ތަކުރާރުކޮށް ވިދާޅުވެފައެވެ. ރައީސް ނަޝީދާ ކަންތައްތަކުގައި ހިޔާލު ތަފާތުވިޔަސް ޖޭޕީގެ ލީޑަރު ވިދާޅުވަނީ، ރައީސް ސޯލިހުއާ އެކު ދެމި ހުންނަވާނެ ކަމަށެވެ.
