މާފުށި ޖަލަށް ވައްދާ މަނާ ތަކެތި އަތުލައިގަތުމަށް އެ ޖަލުގެ ވަށައިގެން މޮނީޓަރކުރެވޭނެ ވަސީލަތްތައް ހަރުކުރުމަށް ހުށައެޅި ރިޕޯޓް ރައްޔިތުންގެ މަޖިލިހުން ފާސްކޮށްފިއެވެ.

މި ރިޕޯޓް ތައްޔާރުކޮށްފައިވަނީ ރައްޔިތުންގެ މަޖިލީހުގެ ޤައުމީ ސަލާމަތާއި ޚާރިޖީ ގުޅުންތަކުގެ ކޮމިޓީންނެވެ. ރިޕޯޓުގައި ވަނީ މޯލްޑިވްސް ކަރެކްޝަނަލް ސަރވިސްގެ ފަރާތުން ކ. މާފުށި ޖަލުގައި ސަލާމަތާއި ރައްކާތެރި ކަމަށްޓަކައި ޖަލަށް އެތެރެކުރުން މަނާތަކެތި ވެއްދުން ހުއްޓުވުމަށް އެދެވޭ ފިޔަވަޅުތަކެއް އެޅުމަށާއި ޖަލަށް ވައްދާ މަނާ ތަކެތި އަތުލައިގަތުމަށް ސްކްރީން ކުރެވޭނެ ވަސީލަތްތައް ނުވަތަ މެޝިނަރީޒް ހޯދައި ފޯނު ކޯލުތައް ޖޭމްކުރާ ފަދަ ޑިވައިސްތައް ޖަލުގައި ވަށައިގެން ހަރުކުރުމަށެވެ. މި ރިޕޯޓް ފާސްކޮށްފައިވަނީ، އަންގާރަ ދުވަހުގެ ޖަލްސާގައި ވޯޓުގައި ބައިވެރިވެވަޑައިގެންނެވި، 63 މެމްބަރުންގެ އިއްތިފާގުންނެވެ.

މި ރިޕޯޓަކީ، އެކިއެކި ކުށްތަކާ ގުޅޭގޮތުން ބަންދުކޮށްފައިވާ ފަރާތްތަކަށް ލިބެންޖެހޭ އަސާސީ ޚިދުމަތްތައް ލިބޭތޯއާއި އަދި އެ ފަރާތްތައް ބަންދުކޮށްފައިވަނީ އެކަށީގެންވާ ތަނެއްގައިތޯ ބެލުމަށްޓަކައި، ކ. މާފުށި ޖަލަށް ކޮމިޓީން ކުރި ދަތުރާ ގުޅޭގޮތުން ޤައުމީ ސަލަމަތާއި ޚާރިޖީ ގުޅުންތަކުގެ ކޮމިޓީން ދިރާސާކޮށް ނިންމިގޮތުގެ ރިޕޯޓެވެ.

އެކިއެކި ކުށްތަކާއި ގުޅިގެން ބަންދުކޮށްފައިވާ ފަރާތްތަކަށް ލިބެންޖެހޭ އަސާސީ ޚިދުމަތްތައް ލިބޭތޯ އާއި އަދި އެފަރާތްތައް ބަންދު ކޮށްފައިވަނީ އެކަށީގެންވާ ތަނެއްގައިތޯ ބެލުމަށްޓަކައި، ކ. މާފުށި ޖަލަށް ޤައުމީ ސަލާމަތާއި ޚާރިޖީ ގުޅުންތަކުގެ ކޮމިޓީން ދަތުރުކުރުމަށް ފަހު ވަނީ ތަފްސީލީ ރިޕޯޓެއް އެކުލަވާލާފައެވެ. މި ރިޕޯޓްގައި މާފުށީ ޖަލުގައި ގައިދީންނާއި ގުޅުންހުރި 8 ދާއިރާއަކުން ކޮމިޓީއަށް ފާހަގަކުރެވިފައިވާ ކަންކަން ވަނީ ހިމަނާފައެވެ.

މި 8 ކަމުގެ ތެރޭގައި ހިމެނެނީ ޖަލުގެ ސަލާމަތީ ކަންކަމާއި ޖަލު އޮފިސަރުންނާއި މުވައްޒަފުންނާއި ގުޅުންހުރި ކަންކަން އަދި ގައިދީން ބައިތިއްބާފައިވާ ގޮތާއި ޤައިދީންނަށް ފޯރުކޮށްދޭ އަސާސީ ޚިދުމަތްތަކާއި ޤައިދީންގެ އުފެއްދުންތެރިކަމުގެ މައުރަޒުތައް އަދި ޤައިދީންގެ ރިހެބިލިޓޭޝަން ޕްރޮގްރާމް އަދި ރިމާންޑް ޔުނިޓާއި ދިވެހިރާއްޖޭގެ ޖަލުތަކާއި ޕެރޯލްގެ ޤާނޫނު އިސްލާހު ކުރުމެވެ.

މިކަންކަމަށް ރިޢާޔަތް ކުރުމަށްފަހު ކޮމިޓީން ވަނީ 8 ހުށަހެޅުމެއް ހުށަހަޅާފަ އެވެ. ކޮންމެ ކަމަކަށް ހުށަހެޅުމެއް ހުށަހަޅާފައިވާއިރު މީގެތެރޭގައި ޖަލުގައި ބަންދުކޮށްފައިވާ މީހުން ޖަލުގެ ޖާގައަށްވުރެ ގިނައިން ތިބޭތީ ޖަލުގައި ގައިދީން މަދުކުރުމުގެ ގޮތުން ކުރިން އަމަލުކޮށްފައިވާ ޤާނޫނަކުން ދިގު މުއްދަތަށް ޖަލަށް ލުމަށް ހުކުމްކޮށްފައިވާ ގައިދީންގެ ތެރެއިން ކުށުގެ ރިކޯޑް ނެތް މީހުންނާއި ކުށަކުރުން މަދު މީހުން ފާހަގަކޮށް އެފަދަ މީހުންނަށް މަޢާފްދޭނެ ޚާއްސަ އުސޫލެއްގެ ދަށުން ރައީސް އެފަރާތްތަކުގެ އަދަދު މަޢާފްކޮށްދިނުމަށް ވަނީ ހުށަހަޅާފައެވެ.

ޖަލުގައި ތިބޭ ގައިދީން އިތުރުވަމުންދާ ދިޔުމާއި ގުޅިގެން އެކަން ހައްލުކުރުމަށް ކައުންސިލްތަކުގެ އެހީތެރިކަމާއެކު އެމީހުންގެ ރިކޯޑް ތައް ބެލުމަށްފަހު ކުށުގެ ރިކޯޑް ނެތް ނުވަތަ ކުށްކުރުން މަދު ގައިދީން ގޭ ބަންދަށް ނުވަތަ ރަށު ބަންދަށް އެމީހުން މޮނިޓަރ ކުރެވޭނެ އުސޫލެއްގެ ދަށުން ބަދަލުކުރެވޭނެ ނިޒާމެއް ގާއިމުކުރުމަށް ވެސް ވަނީ ހުށަހާޅާފައެވެ.

މީގެ އިތުރުން، މޯލްޑިވްސް ކަރެކްޝަނަލް ސަރވިސް އިން ގައިދީންނަށް ފޯރުކޮށްދޭ ޚިދުމަތްތަކާއި ގުޅޭގޮތުން އެމީހުންގެ ޝަކުވާތައް ގިނަ އަދަދަކަށް ކޮމިޓީއަށް ލިބިމުންދާތީ އެމީހުންނަށް ފޯރުކޮށްދޭންޖެހޭ އަސާސީ ޚިދުމަތްތައް ފަރުވާތެރިކަމާއި އިންސާފާއި ހަމަހަމަ ކަމާއެކު އެފަރާތްތަކަށް ފޯރުކޮށްދެމުން ދިޔުމަށް އެސަރވިސް އަށް އެންގުމަށް ކޮމިޓީން ވަނީ ހުށަހަޅާފައެވެ. އަދި ޝަރީޢަތުގެ މަރުހަލާ ފެށި ހުކުމްކުރުމުގެ ކުރިން ކޯޓު އަމުރެއްގެ ދަށުން ގިނަ އަދަދެއްގެ ބަޔަކު ޖަލުގައި ތިބޭތީ މިފަދަ މީހުންގެ މައްސަލަތައް އަވަސްކުރުމަށް ފުލުހުންނާއި، ޕްރޮސެކިޔުޓަރ ޖެނެރަލް އަދި ޝަރުޢީ ކޯޓުތަކަށް އިލްތިމާސްކުރުމަށްވެސް ކޮމިޓީން ވަނީ ހުށަހަޅާފަ އެވެ.

މޯލްޑިވްސް ކަރެކްޝަނަލް ސަރވިސް އިން ޖަލުތަކާއި ޕެރޯލްގެ ޤާނޫނަށް ގެންނަން ބޭނުންވާ ގިނަ އިސްލާހުތަކެއް ހުރިކަމަށް ފާހަގަކޮށްފައިވާތީ އެ ޤާނޫނަށް އިސްލާހު ގެނައުމަށް ބޭނުންވާ ބިލް ސަރުކާރު މެދުވެރިކޮށް މަޖިލީހަށް ހުށަހެޅުމަށްވެސް ކޮމިޓީން ވަނީ ނިންމާފައެވެ.