ސައުދީ އަރަބިޔާގައި ކޮވިޑް-19 އިތުުރު އައުޓްބްރޭކް އައިސްދާނެތީ މި އަހަރުގެ ހައްޖުގެ އަޅުކަމަށްދާ މީހުންގެ އަދަދު މަދުކުރުމުގެ ވިސްނުން ސައުދީ ސަރުކާރުން ގެންގުޅޭ ކަމަށް ރިޕޯޓްތައް ބުނެފި އެވެ.

ކޮވިޑް-19 ގެ ކަންތައްތައް ހަމަޔަކަށް އެޅެންދެން ހައްޖަށްދާން ރާވަމުންދާ ފަރާތްތަކުން އެކަން މަޑުޖައްސާލަން ސައުދީ އަރަބިއްޔާގެ ހައްޖު އަދި އުމްރާ މިނިސްޓަރު ވަނީ މާޗް މަހު އިލްތިމާސް ކުރައްވާފަ އެވެ. ބަލި ފެތުރެމުންދާތީ އުމުރާގެ އަޅުކަން ވަނީ މީގެކުރިން މަޑުޖައްސާލާފަ އެވެ.

އިތުބާރު ހުރި މަސްދަރުތަކަކާއި ހަވާލާދީ ރޮއިޓާސް އިން ރިޕޯޓްކޮށްފައިވާ ގޮތުން، ސައުދީ ސަރުކާރުން ދަނީ މި އަހަރުގެ ހައްޖުގެ އަޅުކަމަށް ދެވޭ މީހުންގެ އަދަދު މަދުކުރުމަށް ވިސްނަމުންނެވެ. އެގޮތުން ކުރިން ހައްޖުގެ އަޅުކަން އަދާކޮށްފައިވާ ފަރާތްތަކަށް ނާދެވޭ ގޮތަށް ހަމަޖައްސަމުންދާ ކަމަށްވެސް ރިޕޯޓްތައް ބުނެ އެވެ.

ހަރުކަށި ފިޔަވަޅުތަކާއިއެކު މި ފަހަރު ހައްޖުގެ ކޯޓާ ދޫކޮށްފައިވާ ގައުމުތަކުގެ 20 އިންސައްތަ މީހުންނަށް އަޅުކަން އަދާކުރެވޭ ގޮތަށް މަޝްވަރާކުރެވެމުންދާ ކަމަށްވެސް ރިޕޯޓްތައް ބުނެ އެވެ.

ތިން މަސްދަރަކާއި ހަވާލާދީ ރޮއިޓާސް އިން ރިޕޯޓްކޮށްފައިވާ ގޮތުން ހައްޖު ކެންސަލް ކުރުމުގެ މަސައްކަތްވެސް ދަނީ ކުރަމުންނެވެ. ނަމަވެސް ސައުދީ ސަރުކާރުން މިކަމާއި ގުޅިގެން ރަސްމީކޮށް އަދި އެއްވެސް އެއްޗެއް ހާމަކޮށްފައެއް ނުވެއެވެ.

ސައުދީ ވަލީ އަހުދު މުހައްމަދު ބިން ސަލްމާންގެ އިގްތިސާދީ ރިފޯމް އެޖެންޑާގެ ދަށުން ހައްޖުގެ އަޅުކަމަށްދާ ފަރާތްތަކުން ސައުދީގެ އިގްތިސާދަށް ބޮޑު ފައިދާއެއް ކޮންމެ އަހަރަކުވެސް ވަމުން އަންނަ ކަމެކެވެ. ހައްޖުގެ އަޅުކަމަށް ކޮންމެ އަހަރަކުވެސް ގިނަ އަދަދެއްގެ މުސްލިމުން އަންނައިރު، އޭގެ ސަބަބުން ސައުދީގެ އިގްތިސާދަށް އަހަރަކަށްވުރެ އަހަރެއް ލިބޭ އާމްދަނީ އަންނަނީ ބޮޑުވަމުންނެވެ.

ހައްޖުގެ އަޅުކަން މަޑުޖައްސާލައިފިނަމަ، އެކަން ވެގެންދާނީ މި ފަހުގެ ތާރީހެއްގައި ހައްޖުގެ އަޅުކަން މަޑުޖައްސާލާ ފުރަތަމަ ފަހަރަށެވެ. މީގެ ކުރިން ހަލުވިކަމާއި އެކު އެބޯލާގެ ނުރައްކާ ބަލިމަޑުކަން ފެތުރުނުއިރުވެސް އެފަދަ ނިންމުންތަކެއް ސައުދީ ސަރުކާރުން ނިންމާފައެއް ނުވެއެވެ.

ބަލިތައް ފެތުރުމަކީ އަބަދުވެސް ހައްޖުގެ ދުވަސްވަރު އަންނަ ކަންބޮޑުވުމެކެވެ.

މީގެ ކުރިން މެލޭރިޔާ ފެތުރިގެން ދިޔަ ދުވަސްވަރު 632 ހައްޖާޖިން ވަނީ މަރުވެފައެވެ. 1821 ވަނަ އަހަރު ކޮލެރާގެ ބަލިމަޑުކަމުގައި ގާތްގަނޑަކަށް 20،000 ހާސް ހައްޖާޖީން މަރުވިއެވެ.