އަމިއްލަ ކްލިނިކްތަކަށް ހުއްދަ ދެވޭނީ ނުކަތާ އަދަދަކަށް ޓެސްޓު ހަދަން ޖެހިއްޖެ ނަމަ: އެންއީއޯސީ
ރާއްޖޭގައި މިހާރު ޓެސްޓު ކުރެވެނީ ތިން ތަނަކުން
ނެޝަނަލް އިމަރޖެންސީ އޮޕަރޭޝަން ސެންޓަރގެ ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާން މަބްރޫކް އަޒީޒް ވާހަކަދައްކަވަނީ
އަމިއްލަ ކްލިނިކްތަކަށް ކޮވިޑް-19އަށް ޓެސްޓު ކުރުމުގެ ހުއްދަ ދެވޭނީ ނުކަތާ އަދަދަކަށް ޓެސްޓު ހަދަންޖެހިއްޖެ ނަމަ ކަމަށް ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) އިން ބުނެފިއެވެ.
އެންއީއޯސީން ހޯމަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ސެންޓަރުގެ ތަރުޖަމާން މަބްރޫކް އަޒީޒް ވިދާޅުވީ ސަރުކާރާއި ގުޅިގެން ކޮވިޑަށް ޓެސްޓު ކުރުމުގެ ހުއްދަ އަށް އެދި އެކި ކްލިނިކްތަކުން ހުށަހަޅަމުންދާ ކަމަށެވެ.
އެހެންނަމަވެސް، އެ ފަރާތްތަކަށް ޓެސްޓު ކުރުމުގެ ހުއްދަ ދެވޭނީ ސަރުކާރުގެ ސިއްހީ މުއައްސަސާތަކުން އެ ވަރަށް ޓެސްޓު ނުކުރެވޭ ހާލަތުގައި ކަމަށެވެ. އަދި އެ ހާލަތުގައި އެތަންތަނާއި ގުޅިގެން ޓެސްޓު ކުރުމުގެ ވިސްނުން އެބަހުރި ކަމަށެވެ. މަބްރޫކް ވިދާޅުވީ އެންމެ ފުރަތަމަ ޓެސްޓު ކުރުމަށް ބޭނުން ކުރަމުންދާނީ ސަރުކާރުގެ އެކި އެކި ސިއްހީ ޚިދުމަތްދޭ ތަންތަން ކަމަށެވެ.
ނޫސްވެރިންގެ ބައްދަލުވުމުގައި މަބްރޫކް ވަނީ، މިހާތަނަށް ކޮވިޑަށް ކުރެވޭ އެންޓިބޮޑީ ޓެސްޓުގެ އިތުރުން، ޕީސީއާރު ޓެސްޓު ކުރުމުގެ ހުއްދައަށް އެދިފައިވާ ތަންތަނުގެ ތަފްސީލުތައް ހިއްސާކޮށްފައެވެ. މަބްރޫކް ވިދާޅުވީ ހުއްދައަށް އެދިފައިވާ ގިނަ ތަންތަނުން އެދިފައިވަނީ އެންޓިބޮޑީ ޓެސްޓު ކުރުމަށް ކަމަށެވެ.
މަބްރޫކް ވިދާޅުވީ ޓެސްޓު ކުރުމުގެ އިންތިޒާމްތަކުގެ ތަފްސީލުތައް ފޮނުވުމަށް އެ ފަރާތްތަކަށް އަންގާފައިވާނެ ކަމަށެވެ.
ރާއްޖޭގައި ކޮވިޑް-19 އަށް ދުވާލެއްގެ މައްޗަށް 1100 ޓެސްޓު ކުރުމުގެ ކެޕޭސިޓީ އެބަހުރި ކަމަށް ހެލްތް މިނިސްޓަރު އަބްދުﷲ އަމީން ވަނީ މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި ވިދާޅުވެފައެވެ. އެއީ އައިޖީއެމްއެޗްގެ ލެބޯރެޓްރީ، ފުލުހުންގެ ފޮރެންސިކް ލެބޯރެޓަރީގެ އިތުރުން އޭޑީކޭއިން ކުރެވޭ ޓެސްޓުތަކާއި އެކުއެވެ.
