ޑަބްލިއުއެޗްއޯއިން ރާއްޖެއަށް މިހާތަނަށް 41،000 ޓެސްޓު ކިޓް ހަދިޔާކޮށްފި
މިނިސްޓަރު އަމީން ވަނީ ޑަބްލިއުއެޗްއޯ އަށް ޝުކުރު އަދާކުރައްވާފައި
ޑަބްލިއުއެޗްއޯ އިން ރާއްޖެއަށް އިތުރު ޓެސްޓު ކިޓް ހަވާލުކުރުމުގެ ތެރެއިން
ރާއްޖެއިން ކޮވިޑް-19 އާ ދެކޮޅަށް ކުރެވެމުންދާ މަސައްކަތައް އެހީތެރިވުމުގެ ގޮތުން ދުނިޔޭގެ ސިއްހަތު، ޑަބްލިއުއެޗްއޯ އިން ރާއްޖެ އަށް މިހާތަނަށް 41،000 ޓެސްޓްކިޓް ހަދިޔާކޮށްފައިވާ ކަމަށް ހެލްތް މިނިސްޓްރީން ބުނެފިއެވެ.
މި ކިޓްތަކުގެ ތެރޭގައި، ހޯމަ ދުވަހު ޑަބްލިއުއެޗްއޯ އިން ރަސްމީކޮށް ހަވާލުކުރި 10،000 ޓެސްޓުކިޓް ހިމެނެއެވެ. ރާއްޖެއަށް ޓެސްޓު ކިޓް ހަވާލުކޮށްފައިވަނީ ޑަބްލިއުއެޗްއޯ އިން ރާއްޖެއަށް ކަނޑައަޅުއްވާފައިވާ މަންދޫބު ޑރ. އަރުވިންދު މާތުރެވެ. އެ ތަކެއްޗާއި ރާއްޖޭގެ ފަރާތުން ހަވާލުވެވަޑައިގެންނެވީ ހެލްތް މިނިސްޓަރު އަބްދުﷲ އަމީންއެވެ.
ހޯމަ ދުވަހު އެންއީއޯސީގައި ބޭއްވި ރަސްމިއްޔާތުގައި އަމީން ވަނީ އެ ޖަމިއްޔާގެ ފަރާތުން ލިބެމުންދާ އެހީތެރިކަމާއި އެއްބާރުލެއްވުން ފާހަގަކުރައްވައި ޝުކުރު އަދާކުރައްވާފައެވެ. އަދި ކުރިއަށް އޮތް ތަނުގައިވެސް މެދުކެނޑުމެއް ނެތި ރާއްޖެއަށް ޓެސްޓްކިޓް ލިބެމުންދާނެ ކަމަށާއި، ޓެސްޓް ކިޓްގެ އަދަދު އިތުރު ކުރުމަށް މަސައްކަތް ކުރަމުންދާ ކަމަށްވެސް ޑަބްލިއުއެޗްއޯއިން ވަނީ ބުނެފައެވެ.
ރާއްޖޭގެ އެކި ސަރަހައްދު ތަކުގައި ކޮވިޑަށް ޓެސްޓުކުރުމުގެ އިންތިޒާމްތައް ހަމަޖެއްސުމަށް ވާންޖެހޭ އެހީތެރިކަމާއި، އެކި ކަހަލަ އާލާތްތައް ހޯދުމާއި އެހެން ޖަމާއަތްތަކުގެ އެހީ ރާއްޖެއަށް ހޯދުމުގައިވެސް ޑަބްލިޔުއެޗްއޯއިން ދަނީ މުހިންމު ދައުރެއް އަދާކުރަމުންނެވެ.
ރާއްޖޭގައި މިހާތަށް 30 ހާހަށްވުރެ ގިނަ ޓެސްޓު ވަނީ ކޮށްފައެވެ. މިހާރު ކޮވިޑަށް ޓެސްޓު ކުރެވެނީ އައިޖީއެމްއެޗް، އޭޑީކޭގެ އިތުރުން ފުލުހުންގެ ލެބޯރަޓަރީގައިއެވެ. މިހާރު ދުވާލެއްގެ މައްޗަށް 1000ށް ވުރެ ގިނަ ޓެސްޓް ހެދޭނެ ކަމަށް ސަރުކާރުން ވަނީ ހާމަކޮށްފައެވެ.
