ބޭންކިންގެ ޚިދުމަތަށް ޕާރމިޓް ދެމުންދާނީ ބޭންކް މެދުވެރިކޮށް: ބީއެމްއެލް
ބޭންކިންގެ ޚިދުމަތަށް ވަކިން ޕޮލިސް ޕާރމިޓް ހޯދާކަން ނުޖެހޭ
ބޭންކް އޮފް މޯލްޑިވްސް
ބޭންކް އޮފް މޯލްޑިވްސް (ބީއެމްއެލް) ގެ ޚިދުމަތްތަކަށް ޕާރމިޓް ދެމުންދާނީ ބީއެމްއެލް މެދުވެރިކޮށް ކަމަށް އެ ބޭންކުން ބުނެފިއެވެ.
ކޮވިޑް-19 އާ ގުޅިގެން ރާއްޖެޓީވީން ގެނެސްދިން ޚާއްސަ ކަވަރޭޖަށް މައުލޫމާތުދެއްވަމުން ބީއެމްއެލްގެ ޕަބްލިކް ރިލެޝަންސް މެނޭޖަރ މުހައްމަދު ސައީދު ވިދާޅުވީ ބޭކިންގ ޚިދުމަތް ހޯދުމަށް ޕޮލިސް ސަރވިސްއިން ޕާރމިޓް ނަގަން ނުޖެހޭނެ ކަމަށެވެ. އަދި އެ އިންތިޒާމް ބޭންކުން ހަމަޖައްސާފައިވާކަން އޭނާ ފާހަގަ ކުރެއްވިއެވެ.
ބޭންކުން ވަކި އެޕޮއިންޓްމަންޓް ޕޯޓަލްއެއް ހަމަޖައްސާފައިވާ ކަމަށާއި އެހެނިހެން ޒަރޫރީ ބޭނުންތަކަށް ޕޮލިސް ޕާމިޓް ދޫކުރުމުންދާ ގޮތަށް ބޭކިންގެ ޚިދުމަތަށް އެދުމުން ކަސްޓަމަރުގެ ފޯނަށް އެސްއެމްއެސްއެއް ދާނެ ކަމަށް ސައީދު ވިދާޅުވިއެވެ. އެހެންކަމުން ބޭންކަށް ވަޑައިގަންނަވަން އިތުރަށް ޕޮލިސް ޕާރމިޓް ނަގަން ނުޖެހޭނެ ކަމަށް އޭނާ ވިދާޅުވިއެވެ.
ސައީދު ވިދާޅުވީ ކޮންމެ ކަސްޓަމަރަކަށްވެސް ދޫކުރަމުންދާނީ ދުވާލަކަށް އެއް އެޕޮއިންޓްމަންޓް ކަމަށާއި ޕާރމިޓް ލިބުމުން އެބްރާންޗުން ލިބެން ހުންނަ ހުރިހާ ޚިދުމަތެއް ލިބިގެންދާނެ ކަމަށެވެ.
ޕޯޓަލްގެ އިތުރުން އެސްއެމްއެސް މެދުވެރިކޮށް އެޕްއިންޓްމަންޓް ހަމަޖެއްސޭ އުސޫލެއް ފާއިތުވި ހަފްތާގައި ހަމަޖައްސާފައިވާނެ ކަމަށާއި ނަމަވެސް އެޕޮއިންޓްމަންޓް ޕޯޓަލް ބޭނުން ކުރުމަށް ވަނީ އިލްތިމާސް ކުރައްވާފައެވެ. ސައީދު ވިދާޅުވީ ޕޯޓަލް މެދުވެރިކޮށް ހުއްދަ ހޯދުމަށް އިލްތިމާސް ކުރައްވަނީ ކަސްޓަމަރުންނަށް ފަސޭހަކުރުމުގެ ގޮތުން ކަމަށެވެ. އެސްއެމްއެސް ފޮނުވުމުގައި ދަތިތައް ދިމާވެފައިވާކަމުގެ ޝަކުވާ ބައެއް ފަރާތްތަކުން ކުރަމުންދާކަމަށް އޭނާ ވިދާޅުވިއެވެ.
ހޯމަ ދުވަހުން ފެށިގެން މާލޭ ސިޓީގެ ބޭންކް އޮފް މޯލްޑިވްސް (ބީއެމްއެލް) ބްރާންޗުތަކާއި، ސަރވިސް ސެންޓަރުތައް ހުޅުވުމަށް އެ ބެންކުން ވަނީ ނިންމާފަ އެވެ.
އެކަމާ ގުޅޭގޮތުން ބީއެމްއެލްއިން ބުނީ، މާލޭ ސިޓީގެ ފުރަބަންދަށް ލުއިތަކެއް ލިބުމާއެކު އޮންލައިން އަދި ސެލްފް-ސަރވިސް ބޭންކިންގ މެދުވެރިކޮށް ލިބެން ނުހުންނަ ހިދުމަތްތައް ކަސްޓަމަރުންނަށް ފޯރުކޮށްދިނުމަށްޓަކައި ބީއެމްއެލްގެ ބްރާންޗުތަކާއި، ސަރވިސް ސެންޓަރުތައް ހުޅުވުމަށް ނިންމާފައިވާ ކަމަށެވެ.
އެގޮތުން ޚިދުމަތް ދިނުމަށް ހަމަޖެހިފައިވަނީ ހޯމަ، އަންގާރަ އަދި ބުރާސްފަތި ދުވަހުގެ ހެނދުނު 09:00ން ފެށިގެން މެންދުރުފަހު 2:00ށް ކަމަށް ބީއެމްއެލްއިން މައުލޫމާތު ދެއެވެ. އަދި ޚިދުމަތް ދިނުމަށް ހަމަޖެހިފައިވަނީ އެޕޮއިންޓްމަންޓް އުސޫލުންކަން ފާހަގަކޮށް ބީއެމްއެލްއިން ބުނީ، ހެލްތް ޕްރޮޓެކްޝަން އެޖެންސީ އިން ކަނޑައަޅާފައިވާ ގައިދުރުކަން ބެހެއްޓުމުގެ އުސޫލޫތަކާ އެއްގޮތްވާ ގޮތުގެ މަތިން ޚިދުމަތްދޭއިރު، ދުވާލަކަށް ޚިދުމަތް ދިނުމަށް ހަމަޖެހިފައިވަނީ ކަނޑައެޅިފައިވާ އަދަދެއްގެ ކަސްޓަމަރުންނަށް ކަމަށެވެ.
އޭގެ އިތުރުން، ކޮންމެ ދުވަހަކަށްވެސް އެޕޮއިންޓްމަންޓް ހެދުމުގެ ފުރުސަތު އެޕޮއިންޓްމަންޓް ޕޯރޓަލް ނުވަތަ އެސްއެމްއެސް މެދުވެރިކޮށް އެއް ދުވަސް ކުރިން ހަމަޖެއްސުމުގެ ފުރުސަތު ލިބޭނެކަމަށް ބީއެމްއެލް އިން ބުނެއެވެ. އެގޮތުން އެސްއެމްއެސް ކުރާނަމަ 455 އަށް އެސްއެމްއެސް ކުރުމަށާއި، ބްރާންޗް ނުވަތަ ސަރވިސް ސެންޓަރުގެ ކީވޯޑް، އައިޑީކާޑު ނަންބަރު، ބިދޭސީއެއް ނަމަ ޕާސްޕޯރޓް ނަންބަރު އަދި މިހާރު އުޅޭ އެޑްރެސް އެސްއެމްއެސްގައި ހިމެނުމަށްވެސް އެދިފައިވެއެވެ.
