ފ. ދަރަބޫދޫ ބަނދަރު ބޮޑު ކުރުމުގެ އަމަލީ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ން ފަށައިފިއެވެ.

އެމްޓީސީސީން ބުނީ ހޮނިހިރު ދުވަހު އަމަލީ މަސައްކަތް ފަށާފައިވާއިރު، މިމަޝްރޫއުގެ ދަށުން 410 މީޓަރު ބޭރު ތޮއްޓެއްލުމަށް ނިންމާފައިވާކަމަށެވެ. 196 މީޓަރުގެ އެއްގަމު ތޮއްޓެއް ވެސް ލާނެއެވެ. އަދި 42،600 މީޓަރުގެ ސަރަހައްދެއް ފުން ކުރާނެ ކަމަށް އެމްޓީސީސީން ބުނެއެވެ.

މި މަޝްރޫއަށް 38.2 މިލިއަން ރުފިޔާ ހަރަދުވާއިރު، 397 ދުވަސް ތެރޭގައި ނިންމަން ޖެހޭއެވެ.

ދަރަބޫދޫ ބަނދަރު ބޮޑު ކުރުމަށް އެމްޓީސީސީއާ ހަވާލުކޮށްފައިވަނީ 10 ޑިސެންބަރު 2019 ގައެވެ.

2019 ވަނަ އަހަރު ތަރައްގީގެ ގިނަ މަޝްރޫއުތަކެއް ޕްލޭނިން މިނިސްޓްރީން އެމްޓީސީސީއާ ހަވާލު ކުރިއެވެ. ސަރުކާރެއްގެ ފުރަތަމަ އަހަރު ތަރައްގީގެ އެންމެ ގިނަ މަޝްރޫއު ފަށާފައި ވަނީ މި ސަރުކާރުން ކަމަށްވާއިރު، ކޮވިޑް-19އާ ގުޅިގެންވެސް ތަރައްގީގެ މަޝްރޫއުތައް ހުއްޓާނުލާ ކުރިއަށް ގެންދާނެކަމުގެ ޔަގީންކަން ސަރުކާރުން ވަނީ ދީފައެވެ.