ހދ. ހަނިމާދޫ ބަނދަރު ބޮޑުކުރުމުގެ އަމަލީ މަސައްކަތް ފަށައިފި
7 ޖޫން 2020 | އާދީއްތަ 07:49ކޮވިޑް-19 އާއި ގުޅިގެން ލޮޖިސްޓިކަލް މައްސަލަތައް ދިމާވޭ
ހަނިމާދޫ ބަނދަރުގެ ފުން ކުރުމުގެ މަސައްކަތް ކުރަނީ
ހދ. ހަނިމާދޫ ބަނދަރު ބޮޑުކުރުމުގެ އަމަލީ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮންމްޕެނީ (އެމްޓީސީސީ)އިން ފަށައިފިއެވެ.
ހުކުރު ދުވަހު އެމްޓީސީސީ އިން ބުނީ ހަނިމާދޫ ބަނދަރުގެ ބޮޑުކުރުމުގެ މަސައްކަތުގެ އެންވަޔަރަމަންޓް އިމްޕެކްޓް އެސެސްމެންޓް އެޕްރޫވް ވުމާއެކު، އަމަލީ މަސައްކަތް ފަށާފައިވާ ކަމަށެވެ.
ކޮވިޑް-19 އާއި ގުޅިގެން ލޮޖިސްޓިކަލް މައްސަލަތައް ދިމާވާ ކަމަށާއި، ނަމަވެސް މައްސަލަތައް ހައްލުކޮށް ޕްރިކޯޝަނަރީ ފިޔަވަޅުތަކާއެކު މަސައްކަތްތައް ކުރިއަށް ގެންދާކަން އެމްޓީސީސީން ފާހަގަކުރިއެވެ.
ހަނިމާދޫ ބަނދަރު ބޮޑު ކުރުމުގެ މަޝްރޫއުގެ ތެރެއިން 355 މީޓަރުގެ ބޮޑު ހިލައިގެ ބޭރު ތޮށްޓެއް ލުމާއި، 270 މީޓަރުގެ އެއްގަމު ތޮށި ލުމާއި، ދެ ނެރު ބައްތި ޖެހުމާއި، 20 ބަނދަރު ބައްތި ޖެހުމާއި، ރޭމްޕް ހެދުމާއި، 2583 ސްކެއާ މީޓަރުގެ ޕޭވްމަންޓެއް ހެދުމާއި 10 މޫރިން ބްލޮކް ހަރުކުރާނެއެވެ. އަދި 53،523 ކިޔުބިކް މީޓަރުގެ ސަރަހައްދެއްގެ ފަޅު ހިއްކައި ފުންކުރާއިރު، 50 މީޓަރުގެ ރިވެޓްމަންޓް ޖަހާނެ ކަމަށް އެމްޓީސީސީން ބުނެއެވެ.
ބަނދަރު އަޕްގްރޭޑް ކުރަން އެމްޓީސީސީއާ ހަވާލު ކޮށްފައިވަނީ 24 ސެޕްޓެންބަރު 2019 ގައެވެ.
ހަނިމާދޫ ބަނދަރުގެ މަސައްކަތް ހަވާލުކޮށްފައި ވަނީ 57.1 މިލިއަން ރުފިޔާއަށް، 425 ދުވަހުގެ ތެރޭގައި މަސައްކަތް ނިންމާ ގޮތަށެވެ. މި ޕްރޮޖެކްޓު ދުވަހަށް ނިންމުމަށް މަސައްކަތްތައް ކުރަމުންދާ ކަމަށް އެމްޓީސީސީން ބުނެއެވެ.
