ވެންޓިލޭޓަރ އުފެއްދި ޒުވާނާއަށް ފެނަކައިން ވަޒީފާގެ ފުރުސަތު ދީފި
5 ޖޫން 2020 | ހުކުރު 14:07ކުންފުނީޣެ މެނޭޖިންގް ޑިރެކްޓަރ ވަނީ އަޝްހަމްގެ މަސައްކަތައް ތައުރީފް ކުރައްވާފައި
ވެންޓިލޭޓަރ އުފެއްވި ޒުވާނާ
އަމިއްލަ ވެންޓިލޭޓަރެއް އުފެއްދި ށ. ގޮއިދޫއަށް ނިސްބަތްވާ އުމުރުން 19 އަހަރުގެ އަހްމަދު އަޝްހަމް އަށް ފެނަކަ ކޯޕަރޭޝަނުން ވަޒީފާގެ ފުރުސަތު ދީފިއެވެ.
މިކަން ހާމަކޮށް ފެނަކަ ކޯޕަރޭޝަންއިން ކޮށްފައިވާ ޓުވީޓެއްގައި ބުނެފައިވަނީ، އެ ކުންފުނީގެ މެނޭޖިންގް ޑިރެކްޓަރ އަހުމަދު ސައީދު އަޝްހަމް އަށް ފޯނުން ގުޅުއްވައި ވެންޓިލޭޓަރ އުފެއްދިކަމަށްޓަކައި އޭނާގެ ހުނަރުވެރި މަސައްކަތައް ތަޢުރީފްކުރައްވައި މަރުހަބާ ކިޔާފައިވާކަމަށެވެ. އަދި މިފަދަ މަސައްކަތް ކުރުމަށް ހިއްވަރުދެއްވައި، އެ ކުންފުނިން ވަޒީފާގެ ފުރުސަތު ދެއްވާފައެވެ.
ރާއްޖޭގެ އެކި ކަންކޮޅުތަކުގައި ތިބި ހުނަރުވެރި ގާބިލް ޒުވާނުންނަށް ފެނަކައިން ފުރުސަތު އޮންނާނެކަމަށް އެ ކުންފުނިން ކޮށްފައިވާ ޓުވީޓުގައި ވަނީ ފާހަގަކޮށްފައެވެ.
އަޝްހަމްގެ މި މަސައްކަތަށް ގިނަ ބައެއްގެ ތައުރީފް އޮހެމުން އަންނައިރު، ނައިބު ރައީސް ފައިސަލް ނަސީމްވެސް ވަނީ އަޝްހަމްއަށް ފޯނުން ގުޅުއްވާ އޭނާގެ މަސައްކަތްތަކަށް ތައުރީފްކުރައްވައި ހިއްވަރުދެއްވާފައެވެ.
