17 މިލިޔަން ރުފިޔާ ހޯދަން ފެނަކައިން ދައުވާ ކުރާ މައްސަލައިގެ އަޑުއެހުން ކެންސަލް ކޮށްފި

ލޯންޗްގެ ހިދުމަތް ދެމުން ގެންދާ ކޮންފުންޏެއް ކަމަށްވާ ޝަރޫ ލޯންޗް ސާވިސް އަތުން 17 މިލިޔަން ރުފިޔާ ހޯދުމަށް ފެނަކަ ކޯޕްރޭޝަނުން ދައުވާ ކުރާ މައްސަލައިގައި އަންގާރަ ދުވަހަށް ސިވިލް ކޯޓުގައި ތާވަލް ކުރި މައްސަލަ ފެނަކައިން އެދިގެން ކެންސަލް ކޮށްފިއެވެ.

ސިވިލް ކޯޓުން މައުލޫމާތު ދިން އޮފިޝަލް ވިދާޅުވީ އަންގާރަ ދުވަހު 11:30 އަށް ތާވަލް ކުރި މައްސލަ ކެންސަލް ކުރީ ދައުވާކުރާ ފަރާތުން އެދިގެން ކަމަށެވެ.

ފެނަކައިން ޝަރޫ ލޯންޗް ސާވިސްއާ ދެކޮޅަށް ދައުވާ ކުރާ މައްސަލަ މިހާރު ވަނީ ބަޔާންތައް ބަދަލުކޮށް ނިމި މައްސަލައިގެ އަޑުއެހުންތަށް ފެށަން ޖެހިފައެވެ. އެގޮތުން އަންގާރަ ދުވަހު ބޭއްވުމަށް ހަމަޖެހިފައި އޮތީ މައްސަލައިގެ ފުރަތަމަ އަޑުއެހުމެވެ.

ރާއްޖެއެމްވީ އަށް މައުލޫމާތު ދެއްވަމުން ފެނަކަ ކޯޕްރޭޝަންގެ މެނޭޖިން ޑައިރެކްޓަރު އަހުމަދު ޝަރީފް ވިދާޅުވެފައި ވަނީ ވާހަކަ ދައަކައިގެން މައްސަލަ އަށް ހައްލެއް ހޯދުމަށް ކުރި މަސައްކަތުގައި ޝަރޫ ލޯންޗް ސާވިސް އިން ހުށަހެޅީ އެ ކުންފުނިން ފެނަކަ އަށް ދޭން ޖެހޭ ފައިސާ 2030 ވަނަ އަހަރާ ހަމައަށް ދައްކައި ޚަލާސްކުރާ ގޮތަށް ކަމަށެވެ.

ނަމަވެސް ޝަރީފް ވިދާޅުވީ ޝަރޫ ލޯންޗް ސާވިސް އިން ހުށަހެޅި އެ ހުށަހެޅުން ފެނަކައިން ގަބޫލު ކޮށްފައި ނުވާ ކަމަށާއި އޭގެ ބަދަލުގައި ފެނަކަ އިން އެދުނީ އެ ކުންފުނިން ދީފައިވާ ތިން ޗެކަށް ތިން ޕޭމެންޓެއްގެ މަތިން ފައިސާ ދައްކާ ހަލާސް ކުރުމަށް ކަމަށެވެ. ނަމަވެސް ފެނަކައިގެ އެ ހުށަހެޅުމަށް ޝަރޫ ލޯންޗް ސާވިސް އިން އެގޮތަށް އެއްބަސްނުވުމުން މައްސަލަ ޝަރީޢަތަށް ފޮނުވީ ކަމަށް ޝަރީފް ވިދާޅުވިއެވެ.

ޝަރީފް ވިދާޅުވީ މައްސަލަ ކުރިއަށްދާ ގޮތަށް ބަލާއިރު މައްސަލަ ދިގުދަންމައި، މައްސަލަ ލަސްކުރުމަށް ޝަރޫ ލޯންޗް ސާވިސް އިން މަސައްކަތް ކުރަމުންދާކަން ފާހަގަ ކުރެވޭ ކަމަށެވެ. އެގޮތުން ތަފާތު އެކި އިޖުރާއީ ނުކުތާތަށް ނަގައިގެން މައްސަލަ ލަސްކުރަމުންދާ ކަމަށް ޝަރީފް ވިދާޅުވިއެވެ.

މީގެ އިތުރުން މި މައްސަލައާ ގުޅިގެން އިތުރު ބަޔަކާ ދެކޮޅަށް ދައުވާ ކުރަން ޖެހޭތޯ ބެލުމަށާއި ފައިސާ ނުލިބުމުގެ ސަބަބުން ކުންފުންޏަށް ލިބިފައިވާ ގެއްލުން ދެނެގަތުމަށް ފައިނޭންޝަލް ޑެމޭޖް އެސެސްމެންޓެއް ހަދައިދިނުމަށް އެދި އޮޑިޓާ ޖެނެރަލްގެ އޮފީހުގައި އެދިފައިވާނެ ކަމަށް ޝަރީފް ވިދާޅުވި އެވެ.

ޝަރީފް ވިދާޅުވީ އެ އެސެސްމެންޓުން އިތުރު ބަޔަކާ ދެކޮޅަށް ދައުވާ ކުރަންޖެހޭ ކަމަށް ފާހަގަކުރެވިއްޖެ ނަމަ އެކަން ކުރައްވާނެ ކަމަށެވެ.

ފެނަކައިން 17 މިލިއަން ރުފިޔާގެ ޗެކެއް، ޝަރޫ ލޯންޗް ސާވިސަސް އަށް ދޫކުރީ 15.42 ގެ ރޭޓުން ޑޮލަރު ގަތުމަށެވެ. އަދި ހަމަޖެހިފައިވާ އުސޫލުތަކުގެ ތެރެއިން ފެނަކައަށް ޑޮލަރު ދޭން އެއްބަސްވެފައި އޮތީ 30 ދުވަހުގެ ތެރޭގައެވެ. އެ މުއާމަލާތަކީ އޮޅުވާލުމެއްކަން ފަޅާއެރީ 30 ދުވަސް ހަމަވެ، ޑޮލަރު ދިން ޗެކު ބައުންސްވި ހިސާބުންނެވެ.

ފެނަކައިގެ 17 މިލިއަން ރުފިޔާގެ މައްސަލައާ ގުޅިގެން ޝަރޫ ލޯންޗް ސާވިސްގެ މެނޭޖިންގ ޑިރެކްޓަރު ފުލުހުން ހައްޔަރުކޮށް ތަހުގީގު ހިންގާފައި ވެއެވެ.

އެންޓި ކޮރަޕްޝަން ކޮމިޝަން (އޭސީސީ) އިން ވެސް ދަނީ އެ މައްސަލަ ތަހުގީގު ކުރަމުންނެވެ. އޭސީސިން ބަލަމުން އަންނަނީ އެ ފައިސާ ދިނުމުގައި ނުފޫޒު ބޭނުންކޮށްގެން ކޮރަޕްޝަންގެ އެއްވެސް ކަމެއް ހިންގާފައި ވޭތޯ އެވެ.

މި މައްސަލަ ފެންމަތިވުމާ އެކު ފެނަކައިގެ މެނޭޖިންގ ޑިރެކްޓަރު ކަމުގައި ހުންނެވި މުހައްމަދު ނިމާލް މަގާމުން ވަކިކޮށް އެ މަގާމަށް ޝަރީފް ހަމަޖެއްސެވި އެވެ. އޭގެ ފަހުން ރައީސް އަބްދުﷲ ޔާމީން ވަނީ ޓޫރިޒަމް މިނިސްޓްރީގެ ނައިބުގެ މަގާމަށް ނިމާލް އައްޔަން ކުރައްވާފަ އެވެ. އަދި އޭގެ ފަހުން އެމްއާރުޑީސީގެ އެމްޑީގެ މަގާމަށް ވަނީ ބަދަލުކުރައްވާފައެވެ