ކޮވިޑް-19އާ ގުޅިގެން 45،000ށް ވުރެ ގިނަ ރިސޯޓު މުވައްޒަފުންގެ ދިރިއުޅުމަށް ނޭދެވޭ އަސަރު ކޮށްފައިވޭ

ކޮވިޑް-19އާ ގުޅިގެން 45،000ށް ވުރެ ގިނަ ރިސޯޓު މުވައްޒަފުންގެ ދިރިއުޅުމަށް ނޭދެވޭ އަސަރު ކޮށްފި އެވެ.

މުޅި ދުނިޔެއަށް ކުރިމަތިވެފައިވާ ކޮވިޑް-19އާ ގުޅިގެން ދިވެހިންގެ ދިރިއުޅުމަށް ކުރާ އަސަރު ދެނެގަތުމަށް އިކޮނޮމިކް މިނިސްޓްރީ އަދި ޔޫއެންޑީޕީން ގުޅިގެން ވަނީ ދިރާސާއެއް ހަދާފައެވެ. އަދި މިcދާރާސާގެ މައްޗަށް ބިނާކޮށް ޔޫއެންޑީޕީން ވަނީ ޚާއްސަ ރިޕޯޓެއް އާންމު ކޮށްފަ އެވެ.

Advertisement

ޔޫއެންޑީޕީގެ މިރިޕޯޓުން ދައްކާ ގޮތުގައި ރިސޯޓުތަކުގައި މަސައްކަތް ކުރާ ގާތްގަނޑަކަށް 22،000 ށްވުރެ ގިނަ ދިވެހި މުވައްޒަފުންގެ ދިރިއުޅުމަށް ސީދާ އަސަރު ވަނީ ކޮށްފައެވެ. އަދި ދިވެހިންނާއި ބިދޭސީން ހިމެނޭ ގޮތަށް 45،000 ށް ވުރެ ގިނަ ރިސޯޓު މުވައްޒަފުންގެ ދިރިއުޅުމަށް ނޭދެވޭ އަސަރު ކޮށްފައި ވެއެވެ.

ވަޒީފާއިން ވަކިކޮށްފައިވާ މައްސަލައަށް އަލިއަޅުވާލައި ޔޫއެންޑީޕީން ބުނީ ރިސޯޓުތަކާ ގުޅިގެން ވިޔަފާރި ކުރާ ގިނަ ބަޔަކަށް ވެސް ކޮވިޑް-19ގެ ސަބަބުން ބޮޑެތި ގޮންޖެހުންތަކާ ކުރިމަތިވެފައިވާ ކަމަށެވެ. އަދި ރިސޯޓު މުވައްޒަފުންގެ ތެރެއިން އެންމެ ގިނައިން ވަޒީފާ އިން ވަކިކޮށްފައި ވަނީ ޕްރޮބޭޝަންގައި ތިބި މުވައްޒަފުން ކަމަށެވެ.

މީގެ އިތުރުން ރިސޯޓުތަކުގެ ބައެއް މުވައްޒަފުން ވަޒީފާ އިން ވަކިކޮށް، މުސާރައިގެ ބޮޑު ބައެއް ކަނޑާލާ ގިނަ އަދަދެއްގެ މުވައްޒަފުން މުސާރަ ނުލިބޭ ގޮތައް ޗުއްޓީއަށް ފޮނުވާލާފައި ވެއެވެ. އަދި އޭޕްރިލް، މެއި އަދި ޖޫން މަހު އާމްދަނީ ލިބޭނެ އެއްވެސް ގޮތެއް ނެތް މުވައްޒަފުން ތިބިކަން ޔޫއެންޑީޕީގެ ރިޕޯޓުގައި ފާހަގަކޮށްފަ އެވެ.

މީގެ އިތުރުން ޔޫއެންޑީޕީން ބުނީ ރިސޯޓުތައް އަލުން ހުޅުވައި އޮޕަރޭޝަނަށް ދެވޭނެ ސީދާ މުއްދަތެއް ނޭނގޭތީ ރިސޯޓު މުވައްޒަފުންނަށް ވަޒީފާ ކަށަވަރު ކުރެވިފައިނުވާކަން ވެސް ރިޕޯޓުގައި ފާހަގަކޮށްފައި ވެއެވެ.

ޔޫއެންޑީޕީން ވަނީ ފަތުރުވެރިކަމުގެ ސިނާއަތުގެ އިސްވެރިންނާއި، ސަރުކާރު ގުޅިގެން މި ސިނާއަތް އަލުން އިއާދަކޮށް ކުރީގެ ހާލަތަށް ދިއުމަށް ޕްލޭން ތައްޔާރު ކުރުމާއި ބައިނަލްއަޤުވާމީ އެކި ފެންވަރުގައި ނަގާފައިވާ އެންމެ ރަނގަޅު ފިޔަވަޅުތަކަށް ބަލައި މުވައްޒަފުންނަށް ވެސް ނިކަމެތިކަން ނުލިބޭ ގޮތަށް ނިންމުމަށް އިރުޝާދު ދީފައެވެ.