އިންގްލޭންޑުގައި އާންމު ދަތުރުފަތުރު ބޭނުންކުރާ އިރު މާސްކް ބޭނުން ކުރުން މަޖުބޫރުކުރަނީ

ކޮވިޑް-19 އާއި ގުޅިގެން އިންގްލޭންޑުގެ އާންމު ދަތުރުފަތުރު ބޭނުންކުރާ ފަރާތްތައް މާސްކް ބޭނުންކުރަން މަޖުބޫރުކުރަން ނިންމައިފިއެވެ.

މިގޮތަށް ނިންމަފައިވަނީ ކޮވިޑް-19 އާއި ގުޅިގެން އިންގްލޭންޑުގައި އަޅާފައިވާ ލޮކްޑައުންގެ ފިޔަވަޅުތަކަށް ލުއި ދޭން ނިންމާފައިވާތީއެވެ. އެގޮތުން އާންމު ދަތުރުފަތުރު ބޭނުންކުރާ ފަރާތްތަކުން މާސްކް ބޭނުންކުރަން މަޖްބޫރުކުރަން ނިންމާފައިވަނީ މި މަހުގެ 15 ވަނަ ދުވަހުން ފެށިގެންނެވެ.

ނަމަވެސް މި ނިންމުމުގެ ދަށުން ކުޑަކުދިންނާއި، އުމުރުން ދުވަސްވީ މީހުން އަދި ނޭވާލާ ނިޒާމުގެ ބަލިތައް ހުންނަ ފަރާތްތައް މި ނިންމުމުގެ ދަށުން އިސްތިސްނާ ވާނެއެވެ. އަދި އެކަންކަން ބަލަމުން ގެންދާނީ ބްރިޓިޝް ޓްރާންސްޕޯޓް ޕޮލިހުންނެވެ.

ބްރިޓެންގެ ޓްރާންސްޕޯޓް މިނިސްޓަރު ގްރާންޓް ޝައްޕްސް ވިދާޅުވީ އާންމު ދަތުރުފަތުރު ކުރުމުގައި ބޭނުންކުރާ ރޭލާއި، ބަސް އަދި ސަބްވޭސްތައް ބޭނުންކުރެވޭ މިންވަރު އިތުރުކުރައްވާނެ ކަމަށެވެ. އަދި އެގޮތަށް ނިންމާފައިވަނީ ވަޒީފާއަށްދާ ފަރާތްތައް ވީހާވެސް ބޮޑަށް ތޮއްޖެހުން ކުޑަކުރުމަށް ކަމަށް ގްރާންޓް ވަނީ ވިދާޅުވެފައެވެ.

އާންމު ދަތުރުފަތުރުގެ ހިދުމަތް އިތުރަށް ފުޅާކުރަން ނިންމާފައިވާ އިރު، ސްޓޭޝަން ތަކުގައި ވޮލެންޓިއަރުން މާސްކް ބަހަމުންދާނެ ކަމަށް ގްރާންޓް ވިދާޅުވިއެވެ. އަދި އެންގުންތަކާ ހިލާފުވާނަމަ އެ މީހަކު ޖޫރިމަނާކުރައްވާނެ ކަމަށް ވެސް ގްރާންޓް ވިދާޅުވިއެވެ. މާސްކް ނާޅުއްވާނަމަ އެމީހަކަށް ދަތުރު ނުކުރެއްވޭނެކަމަށް ވެސް އޭނާ ވިދާޅުވިއެވެ.

މި ހިނގަމުންދާ 24 ގަޑިއިރުގެ ތެރޭގައި ޔޫކޭއިން ވަނީ 176 މީހަކު ކޮވިޑް-19 ޖެހިގެން މަރުވެފައެވެ. އަދި މިއާއެކު މަރުވި މީހުންގެ އަދަދު ވަނީ 39،000ށް ވުރެ މައްޗަށް އަރާފައެވެ. މިހާތަނަށް އެގައުމުގައި 281,661 (ދެލައްކަ އަށްޑިހަ އެއްހާސް ހަސަތޭކަ ފަސްދޮޅަށް އެއް) މީހަކު ވަނީ ކޮވިޑް-19 އަށް ޕޮޒިޓިވްވެގެން ރިޕޯޓްކޮށްފައެވެ.