ކޮވިޑަށް ޓެސްޓުކުރަން ހުއްދަ ދެެވެން ނެތް ކަމަށް ހެލްތުން އެއިމްސް އަށް އަންގައިފި
4 ޖޫން 2020 | ބުރާސްފަތި 14:29ޖަވާބު ދީފައިވަނީ އަނގަ ބަހުން: އިހުސާން
އެއިމްސް ކްލިނިކް: ކޮވިޑް-19 އަށް ޓެސްޓުކުރަންވަމުން ދިޔަ ތައްޔާރީތައް ވަނީ މަޑު ޖައްސާލަފައި
އައްޑޫ ސިޓީ ފޭދޫގައި ހުންނަ އެއިމްސް ޑައިގްނޯސްޓިކް ކެއަރ (އެއިމްސް) ގައި ކޮވިޑް-19ށް ޓެސްޓުކުރުމަށް ހުއްދަ ދެވެން ނެތް ކަމަށް ހެލްތް މިނިސްޓްރީން އަނގަ ބަހުން ޖަވާބު ދީފައިވާކަމަށް އެ ކްލިނިކް ހިންގަމުން އަންނަ ރާއްޖޭގެ މަޝްހޫރު ވިޔަފާރި ކުންފުނި ހެޕީ މަރކެޓްގެ ސީއީއޯ އަލީ އިހުސާން ވިދާޅުވެއްޖެ އެވެ.
އެއިމްސްގައި ކޮވިޑަށް ޓެސްޓް ކުރެވޭނެ އިންތިޒާމު މި ހަފުތާ ތެރޭގައި ގާއިމު ކުރެވޭނެކަމަށް އިހުސާން ވަނީ މީގެ ކުރިން ވިދާޅުވެފައެވެ. އަދި ހިދުމަތް ރައްޔިތުންނަށް ފޯރުކޮށް ދިނުމަށް ސަރުކާރުން ހޯދަންޖެހޭ ހުއްދަތައް ހޯދުމަށް ކަމާބެހޭ އިދާރާތަކުގައި އެެއިމްސް އިން ވަނީ އެދިފައެވެ.
އިހުސާން ކުރެއްވި ޓްވީޓެއްގައި ވިދާޅުވީ، ކޮވިޑް-19 އަށް ޓެސްޓު ކުރުމުގެ ހުއްދަ ދެެވެން ނެތް ކަމަށް ހެލްތް މިނިސްޓްރީން ދީފައިވާތީ އެ ހިދުމަތް ދޭންވެގެން ކުރަމުން އައި މަސައްކަތް ހުއްޓާލާފައިވާ ކަމަށެވެ.
އިހުސާންގެ ޓްވީޓަށް މީހަކު ކުރި ސުވާލަކަށް ޖަވާބު ދެއްވަމުން އޭނާ ވިދާޅުވީ، ހުއްދަ އަށް ހެލްތް މިނިސްޓްރީގައި އެދިފައިވަނީ ރަސްމީ ސިޓީއަކުން ކަމަށެވެ. އަދި ޓެސްޓު ހެދެން ނެތް ސަބަބު ބަޔާންކޮށް ރަސްމީ ސިޓީއެއް ލިބޭނެ ކަމުގެ އިންތިޒާރު ކުރަމުންދާ ކަމަށެވެ.
އެކަމާއި ގުޅޭ ގޮތުން ހެލްތް މިނިސްޓްރީން އަދި މިހާތަނަށް އެއްވެސް އެއްޗެއް ބުނެފައެއް ނުވެއެވެ.
ރާއްޖޭގައި ކޮވިޑަށް ޓެސްޓު ކުރެވެނީ އައިޖީއެމްއެޗް އަދި އޭޑީކޭގެ އިތުރުން ފުލުހުންގެ ލެބޯރަޓަރީގައެވެ.
