ކައުންސިލްގެ މެންޑޭޓުގައި ހިމެނޭ ކަންތައްތައް ބަލަމުންދާނަން: ސިޓީ ކައުންސިލް
3480 އެޕްލިކޭޝަން ވަނީ އިކޮނޮމިކް މިނިސްޓްރީ އަށް ފޮނުވާފައި
މާލެ ސިޓީ ކައުންސިލްގެ މޭޔަރު ޝިފާ މުހައްމަދު، ރައްޔިތުންގެ މަޖިލީހުގެ ކޮމިޓީއެއްގައި ވާހަކަ ދައްކަވަނީ
މާލޭ ސިޓީގެ ވިޔަފާރިކުރާ ތަންތަނާއި މަސައްކަތްކުރާ މީހުންނާއި, ހެދިފައިވާ ގަވާއިދުތަކާއި އެއްގޮތަށް މަސައްކަތްކުރަމުންދޭތޯ ބަލާނެ ކަމަށާއި، ކައުންސިލްގެ މެންޑޭޓުގައި ހިމެނޭ ހުރިހާ ކަމެއް ބަލަމުންދާނެ ކަމަށް މާލެ ސިޓީ ކައުންސިލުން ބުނެފި އެވެ.
ސިޓީ ކައުންސިލުން މިހެން ބުނެފައިވަނީ، ބިޒްނަސް ޕަރމިޓް ދޫކުރަން މާލެ ސިޓީ ކައުންސިލަށް އެދެން އޮތް އޮތުން ޕޮލިސް އޮންލައިން ޕޯރޓަލް ހުށައެޅޭނެ ގޮތަށް ނިންމުމާއި ގުޅިގެންނެވެ.
އެ ނޫސްބަޔާނުގައި ބުނީ، އެ މަސައްކަތް އޮތީ ލޮކްޑައުންގެ ހާލަތުގައި ވިޔަފާރިކުރުމާއި އާމްދަނީ ލިބޭ ޒާތުގެ ތަފާތު މަސައްކަތްތައް ކުރުމުގެ ހުއްދަ ދޫކުރުމަށް ސިޓީ ކައުންސިލަށް ހުށަހެޅުމުން، އެ ކައުންސިލުން އިކޮނޮމިކް މިނިސްޓްރީ އަށް ފޮނުވައި އެ މިނިސްޓްރީން އެ މައުލޫމާތު ވެރިފައި ކުރުމަށްފަހު ފުލުހުންނަށް ފޮނުވުމުން ހުއްދަ ދޫކުރާ ގޮތަށް ކަމަށެވެ.
ހުއްދަ ދިނުމަށް ހޯދަން ޖެހޭ މައުލޫމާތު ހޯދުމުގެ މަސައްކަތް ކުރުމަށް ކައުންސިލާއި ހަވާލުކޮށްފައިވަނީ މޭ މަހުގެ 29 ވަނަ ދުވަހު އެވެ. ކައުންސިލުގެ ބަޔާނުގައި ބުނީ، ހުއްދަ ހޯދުމަށް އެދޭ ފަރާތްތަކުން ހުށަހަޅަން ޖެހޭ މައުލޫމާތުތައް އެއްކުރެވޭނެ ގޮތަށް ކައުންސިލްގެ ވެބްސައިޓު ގައި އެކަމަށް ހާއްސަކޮށް ޕޯޓަލްއެއް ހެދި، އެ ޕޯޓަލް އަށް މި މަހުގެ އެއްވަނަ ދުވަހުގެ ރޭ 10:00 އާއި ހަމައަށް ހުށަހަޅާފައިވާ 3480 އެޕްލިކޭޝަން ބެލުމަށްފަހު ތަރުތީބުކޮށް ވެރިފައިކުރުމަށްޓަކައި އިކޮނޮމިކް މިނިސްޓްރީ އަށް ފޮނުވާފައިވާ ކަމަށްވެ.
ކައުންސިލުން ބުނީ، ހޯދި މައުލޫމާތުގެ އެހީގައި ލޮކްޑައުން އަށްފަހު ހުޅުވޭއިރު މާލޭގެ ވިޔަފާރިކުރާ ތަންތަނާއި މަސައްކަތްކުރާ މީހުންނާއި ކުރާގޮތް ހެދިފައިވާ ގަވާއިދުތަކާއި އެއްގޮތަށް މަސައްކަތްކުރަމުން ދޭތޯ ބަލާނެ ކަމަށެވެ. އަދި ކައުންސިލްގެ މަގުސަދަކީ ރައްޔިތުން ބޭނުންވާފަދަ ގަވާއިދުތަކާއި އެއްގޮތަަށް ތަރުތީބުން ހިނގާ ސިޓީއަކަށް މާލެސިޓީ ހެދުން ކަމަށް އެ ބަޔާނުގައި ބުންޏެވެ.
މެއި މަހުގެ 29 ވަނަ ދުވަހުން ފެށިގެން ލޮކްޑައުންގައި އަޅާފައިވާ ފިޔަވަޅުތަކަށް ލުއިތަކެއް ދިނުމަށް ފަށާއިރު ގިނަ ފިހާރަތަކެއް ހުޅުވާލުމުގެ ވަނީ ފުރުސަތު ދީފަ އެވެ. ސުޕަރމާކެޓްތަކާއި ބޭކަރީތަކާއި އާންމު ދިރިއުޅުމަށް ބޭނުންވާ އަސާސީ ތަކެތި ވިއްކާ ކަންމަތީ ފިހާރަތަކާއި ތަރުކާރީ އާއި މޭވާ ވިއްކާ ފިހާރަތަކައި، ފަރމަސީތައް، ދިވެހި ބޭސް ވިއްކާ ފިހާރަތައް، ބުކްޝޮޕްސް، ސްޓޭޝަނަރީ ވިއްކާ ފިހާރަތަކާއި، ކުޑަކުދިންގެ ސާމާނު ވިއްކާ ފިހާރަތައް އަދި ހާޑުވެއަރ ފިހާރަތައް ހުޅުވާލުމަށް ފުރުސަތު ދިނުމަށް ނިންމާފައިވެއެވެ.
އޭގެއިތުރުން އޮންލައިން ޑެލިވަރީ އަށް ބައެއް ތަންތަން ހުޅުވާލެވޭނެކަމަށް ސަރުކާރުން ހާމަކޮށްފައިވެއެވެ. އޭގެތެރޭގައި ހިމެނެނީ މޯބައިލް ފޯން ފިހާރަތަކާއި ކޮމްޕިޔުޓަރ ސާމާނު ވިއްކާ ފިހާރަތާއި ގޭގައި ބޭނުންކުރާ އިލެކްޓްރޯނިކްސް ސާމާނު ވިއްކާ ފިހާރަތަކާއި އަންނައުނު، ފޮތި، ފައިވާން އަދި ކުޅިވަރު ސާމާނު ވިއްކާ ފިހާރަތަކެވެ.
