ފަސްވަނަ ބުރުން ޕޮޒިޓިވް ކޭސް އެއް ފެނުނީ ޓޮޓެންހަމުން

އިނގިރޭސި ޕްރިމިއަރ ލީގުގެ ކުޅުންތެރިންނާއި، އޮފިޝަލުން ނޮވެލް ކޮރޯނާވައިރަސް (ކޮވިޑް-19)ށް ޓެސްޓު ކުރުމަށް ކުރިއަށް ގެންދިޔަ ފަސްވަނަ ބުރުން ޕޮޒިޓިވް ކޭސް އެއް ފެނުނީ ޓޮޓެންހަމް ހޮޓްސްޕާ އިން ކަން، އެ ކްލަބުން ހާމަކޮށްފި އެވެ.

ޕްރިމިއރ ލީގުގެ ކުޅުންތެރިންނާއި، އޮފިޝަލުން ކޮވިޑް-19ށް ޓެސްޓު ކުރުމަށް ފަސް ބުރެއް ވަނީ ކުރިއަށް ގެންގޮސްފަ އެވެ. ފުރަތަމަ ބުރުގައި 748 މީހުން ޓެސްޓު ކުރިއިރު، ދެވަނަ ބުރުގައި 996 މީހުން ވަނީ ޓެސްޓު ކޮށްފަ އެވެ. އަދި ތިންވަނަ ބުރުގައި 1،008 މީހުން ޓެސްޓު ކުރިއިރު، ހަތަރުވަނަ ބުރުގައި 1،130 މީހުން ވަނީ ޓެސްޓު ކޮށްފަ އެވެ.

އަދި ބުދަ ދުވަހު ހާމަކުރި ފަސްވަނަ ބުރުގައި 1،197 މީހަކު ވަނީ ކޮވިޑް-19ށް ޓެސްޓު ކޮށްފަ އެވެ. ޕްރިމިއަރ ލީގުން ބުދަ ދުވަހު ވަނީ ފަސްވަނަ ބުރުން ޕޮޒޓިވް އެއް ކޭސް ފެނުނުކަން ހާމަކޮށްފަ އެވެ. އެއާއެކު ޓޮޓެންހަމުން ފަސްވަނަ ބުރުން ފެނުނު ޕޮޒިޓިވް ކޭސް ނިސްބަތް ވަނީ އެ ކްލަބަށް ކަން ހާމަކޮށްފަ އެވެ. އެކަމަކު އެ މީހެއްގެ ނަން ހާމަކޮށްފައެއް ނުވެއެވެ.

ޓޮޓެންހަމުން ކޮވިޑް-19ށް ޕޮޒިޓިވްވީ އެ ކްލަބުގެ ކުޅުންތެރިއެއް ކަން ނުވަތަ އޮފިޝަލެއް ކަން ހާމަކޮށްފައި ނުވި ނަމަވެސް، އެ ކްލަބުން ވަނީ ވައިރަހަށް ޕޮޒިޓިވްވި މީހާގެ ހާލު ރަނގަޅު ކަމަށް ބުނެފައެވެ. އަދި އޭނާ ވައިރަހަށް ޕޮޒިޓިވް ވިއިރު، ހަށިގަނޑުން ވައިރަހުގެ އެއްވެސް އަލާމާތެއް ފެނިފައި ނުވާ ކަމަށް ވެސް ޓޮޓެންހަމުން ބުނެފައި ވެއެވެ.

ޕްރިމިއަރ ލީގުގެ ކުޅުންތެރިންނާއި އޮފިޝަލުން ކޮވިޑް-19ށް ޓެސްޓު ކުރަމުން އަންނައިރު، މިހާތަނަށް ޖުމުލަ 13 މީހަކު ވަނީ ޕޮޒިޓިވް ވެފައެވެ. އެކަމަކު ވައިރަހަށް ޕޮޒިޓިވް ވިކަން ހާމަކުރި ކުޅުންތެރިންގެ ތެރެއިން ބޯންމަތުގެ ގޯލްކީޕަރު އާރޮން ރާމްސްޑޭލް މިހާރު ވަނީ ވައިރަހުން ސަލާމަތްވެފަ އެވެ.

މިމަހުގެ 17 ވަނަ ދުވަހު ޕްރިމިއަރ ލީގު އަލުން ފެށުމަށް މިހާރު ތާވަލުކޮށްފައި ވާއިރު، މިދިޔަ ހަފުތާގައި ވަނީ ކުޅުންތެރިން ކޮންޓެކްޓް ވެވޭ ގޮތަށް ފަރިތަކުރަން ހުއްދަ ދީފައެވެ. އަދި އަންގާރަ ދުވަހު ވަނީ ކްލަބުތަކުން އެކުވެރިކަމުގެ މެޗުތައް ކުޅެންވެސް ހުއްދަ ދީފައެވެ.