ކޮވިޑް-19 ގެ ސަބަބުން ދިރިއުޅުމުގެ އާންމު ޙާލަތަށް އަސަރުކޮށް، ޙާލުގައި ޖެހިފައިވާ ފަރާތްތަކަށް ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ)އާއި މޯލްޑިވްސް އިންޑަސްޓްރިއަލް ފިޝަރީޒް ކޯޕަރޭޝަން (މިފްކޯ)އިން އެހީތެރިކަން ފޯރުކޮށްދީފި އެވެ.
މިނިސްޓްރީ އޮފް ޖެންޑަރ ފެމިލީ އެންޑް ސޯޝަލް ސަރވިސަސް މެދުވެރިކޮށް އެ ދެ ކުންފުނިންވެސް އެހީތެރިކަން ފޯރުކޮށްދީފައި ވާއިރު، މިވަގުތަށް ބޭނުންވާ ޒަރޫރީ ތަކެތި ވަނީ ފޯރުކޮށްދީފައެވެ. އެގޮތުން ޖެންޑަރ މިނިސްޓްރީން ކުރި ޓްވީޓެއްގައި ބުނެފައި ވަނީ، 'ލޮކްޑައުން' ގެ މި މުއްދަތުގައި ބޭނުން ޖެހިފައިވާ އާއިލާތަކަށް ޒަރޫރީ ކާބޯތަކެއްޗާއި ކާޑުގެ ބާވަތްތައް ފޯރުކޮށްދިނުމަށް އެސްޓީއޯއާއި މިފްކޯއިން އެހީތެރިކަން ފޯރުކޮށްދީފައިވާ ކަމަށެވެ.
އަދި އެކަމަށްޓަކައި ޖެންޑަރ މިނިސްޓްރީން ވަނީ އެ ދެ ކުންފުންޏަށް ވެސް ޝުކުރު އަދާކޮށްފަ އެވެ.
ކޮވިޑް-19 ގެ ސަބަބުން ޙާލުގައި ޖެހިފައިވާ ފަރާތްތަކަށް ޖެންޑަރ މިނިސްޓްރީން ވަގުތީ ބޯހިޔާވަހިކަން ފޯރުކޮށްދީފައި ވާއިރު، 'ލޮކްޑައުން' ގެ ސަބަބުން ދިރިއުޅުމުގެ ޢާންމު ޙާލަތު ދަށް އާއިލާތަކަށްވެސް ވަނީ ބޮޑެތި ގޮންޖެހުންތަކާ ކުރިމަތިވެފަ އެވެ. އެގޮތުން އެސްޓީއޯއާއި މިފްކޯއިން ފޯރުކޮށްދިން އެހީތެރިކަމަކީ މިނިސްޓްރީއާ ގުޅިގެން އެފަދަ ޢާއިލާތަކަށް މި ދަނޑިވަޅުގައި އެހީވުމަށް ކޮށްފައިވާ މަސައްކަތެކެވެ.
