ރިސޯޓްތަކަށް ވަޒީފާއަށް ދާން ބޭނުންވާ މުވައްޒަފުންނަށް ރިސޯޓަށް ދެވޭގޮތަށް ހަމަޖައްސައިފި
މޮނިޓަރިންގެ ހާލަތު ނެގިފަހުން 14 ދުވަސް ހަމަވެފައިވާ ރަށްރަށުން ދާ މީހުންވެސް ހިމެނޭ
ރިސޯޓެއްގައި މަސައްކަތްކުރާ މުވައްޒަފުންތަކެއް: މަސައްކަތަށް ނިކުމެވެނީ 14 ދުވަސް އެކަހެރިވުމަށް ފަހު
ރިސޯޓްތަކަށް ވަޒީފާއަށް ދާން ބޭނުންވާ މުވައްޒަފުންނަށް ސީދާ ރިސޯޓަށް ދެވޭނެގޮތް ހަމަޖައްސައިފިއެވެ.
ބުދަ ދުވަހުގެ ރޭ މިނިސްޓްރީ އޮފް ޓޫރިޒަމުން ނެރެފައިވާ ބަޔާނެއްގައި ވަނީ ކޮވިޑް-19 އާ ގުޅިގެން މޮނިޓަރިންގެ ހާލަތުގައި ނެތް ރަށްރަށުންނާއި، މޮނިޓަރިންގެ ހާލަތު ނެގިފަހުން 14 ދުވަސް ހަމަވެފައިވާ ރަށްރަށުން ރިސޯޓްތަކަށް ވަޒީފާއަށް ދާން ބޭނުންވާ މުވައްޒަފުންނަށް އެ ރިސޯޓަކަށް ދިއުމުގައި އެއްވެސް ހުރަހެއް ނެތްކަމަށް އެޗްޕީއޭއިން ނިންމާފައިވާ ކަމަށެވެ.
މޮނިޓަރިންގެ ހާލަތަށް ލެވިފައިވާ ރަށްރަށުންނާއި މޮނިޓަރިންގެ ހާލަތު ނެގިފަހުން 14 ދުވަސް ހަމަނުވާ ރަށްރަށުން ރިސޯޓްތަކަށް ވަޒީފާއަށް ދާން ބޭނުންވާ މުވައްޒަފުންނަށް އެ ރިޒޯޓެއްގައި 14 ދުވަހުގެ މުއްދަތަށް ކަރަންޓީން ވުމަށްފަހު، ވަޒީފާއަށް ނުކުންނަން އެންމެ ރަނގަޅު ކަމަށްވެސް އެޗްޕީއޭއިން ނިންމާފައިވާ ކަމަށް ބަޔާނުގައި ބުނެފައިވެއެވެ.
އޭގެ އިތުރުން، ރަށްރަށުން ރިސޯޓްތަކަށްދާ މުވައްޒަފުންގެ މައުލޫމާތު އެޗްޕީއޭއަށް އެންގުމަށް އެ އެޖެންސީން އަންގާފައިވާތީ ރިޒޯޓްތަކަށް ވަޒީފާއަށްދާން ބޭނުންވާ މުވައްޒަފުންގެ މައުލޫމާތު މިނިސްޓްރީގެ ހޮޓްލައިން 7223131 ނުވަތަsmu@tourism.gov.mvއަށް ފޮނުވުމަށްވެސް ވަނީ އެދިފައެވެ.
