ނިއު ބޯރން އަދި ޕްރިމެޗުއަރ ކުދިންނަށް ފަރުވާދޭ ޔުނިޓުގައި ބޭނުންވާ ވަރަށް ވަޞީލަތްތައް ނެތް: ކުޅުދުއްފުށީ ހޮސްޕިޓަލް

ކުޅުދުއްފުށި ސިޓީ ހޮސްޕިޓަލުގެ ވެއިޓިން ކެޕޭސިޓީގެ ދަތިތަކާއި، ޖާގައިގެ ދަތިކަން އެބަހުރިކަމަށާއި ނިއޯނޭޓަލް އިންޓެންސިވް ކެއަރ ޔުނިޓް (އެންއައިސީޔޫ)ގައި ބޭނުންވާ ވަރަށް ވަޞީލަތްތައް ނެތްކަމަށް ކުޅުދުއްފުށީ ސިޓީ ހޮސްޕިޓަލުން ބުނެފިއެވެ.

ކޯވިޑް-19 އާއި ގުޅިގެން ކުޅުދުއްފުށީ ސިޓީއަށް ދިމާވާދަތިތަކާއި، އެ ސިޓީގެ ހޮސްޕިޓަލަށް ކުރިމަތިވަމުންދާ ގޮންޖެހުންތަކާއި އެކަންކަން ހައްލުކުރުމަށް އެޅެންހުރި ފިޔަވަޅުތަކާ ގުޅޭގޮތުން އެސިޓީގެ ރައްޔިތުން މަޖިލީހުގެ 2 މެންބަރުންނާއި، އެ ސިޓީގެ ކައުންސިލް މެންބަރުންނާއި، ހޮސްޕިޓަލުގެ އިސްވެރިންނާއި ނައިބު ރައީސް ފައިސަލް ނަސީމް ވަނީ ބައްދަލުކުރައްވާފައެވެ.

އޮންލައިންކޮށް ބޭއްވި މަޝްވަރާ ބައްދަލުވުމުގައި، ހޮސްޕިޓަލުގެ އިސްވެރިން ވަނީ އެބޭފުޅުންނަށް ދިމާވާ ދަތިތައް ޙިއްޞާކުރައްވާފައެވެ. އެގޮތުން ބައެއް މުހިންމު މަޝްރޫޢުތައް ހުއްޓިފައިވާތީ އެކަމާ ކަންބޮޑުވުން ފާޅުކުރައްވާފައިވާއިރު ހޮސްޕިޓަލުގެ ވެއިޓިން ކެޕޭސިޓީގެ ދަތިތަކާއި، ޖާގައިގެ ދަތިކަން ފާޅުކުރައްވާފައިވެއެވެ. އަދި ދުވަސްނުފުރި ވިހާ ކުދިންނަށް ފަރުވާ ދިނުމަށާއި އަލަށް ވިހާ ކުދިންނަށް ފަރުވާ ދިނުމަށް ބޭނުންކުރާ އެންއައިސީޔޫގައި ބޭނުންވާވަރަށް ވަޞީލަތްތައް ނެތްކަމަށް ވަނީ ފާހަގަކޮށްފައެވެ.

މި ބައްދަލުވުމުގައި ސަރުކާރުގެ ފަރާތުން ޞިއްޙީ ދާއިރާގެ މަޢުލޫމާތު ދެއްވުމަށް މިނިސްޓަރ އޮފް ހެލްތް ޢަބްދުﷲ އަމީން ބައިވެރިވެވަޑައިގެންފައިވާއިރު، މިނިސްޓަރ ވަނީ ކުޅުދުއްފުށީ ހޮސްޕިޓަލަށް ކުރިމަތިވާ ގޮންޖެހުންތައް ހައްލުކުރުމަށް މަސައްކަތްކުރައްވާނެކަމަށާއި ކޯވިޑް-19 އާ ގުޅިގެން ހުއްޓިފައިވާ ޕްރޮޖެކްޓްތައް އަލުން ފެށުމަށް މަސައްކަތް ކުރައްވާނެކަމަށް ވިދާޅުވެފައެވެ. އަދި ޞިއްޙީ ދާއިރާއަށް ކުރިމަތިވާ ފައިސާގެ ދަތިތައް ޙައްލުކުރުމަށް މިނިސްޓަރ އޮފް ފައިނޭންސް މަޝްވަރާ ކުރައްވާނެ ކަމުގައި މިނިސްޓަރ ވިދާޅުވިއެވެ.

ކުޅުދުއްފުށީ ސިޓީގައި ހުރި މައްސަލަތަކަށް އަވަސް ހައްލެއް ހޯއްދަވައިދެއްވުމަށް އެސިޓީގެ އެކި ދާއިރާތަކުގެ ރައްޔިތުންގެ މަޖިލިސް މެންބަރުން އެދިވަޑައިގެންފައިވާއިރު، ކުރިމަތިވެފައިވާ މައްސަލަތައް ހައްލުކުރެއްވުމަށް ސަރުކާރުން މަސައްކަތްކުރައްވާނެކަމުގައި ވިދާޅުވެފައެވެ.