ދެ އުޅަނދެއް ޖެހި ހިނގި އެކްސިޑެންޓެއްގައި ގިނަ ބަޔަކަށް އަނިޔާވެ، އޭޑީކޭ ހޮސްޕިޓަލުގައި ފަރުވާދޭން ފަށައިފި އެވެ.

އެމްއެންޑީއެފްގެ މީޑިއާ އޮފިޝަލް އިބްރާހިމް އާޒިމް ވިދާޅުވީ އެކްސިޑެންޓް ވެފައިވަނީ ސަމަރ އައިލެންޑް ރިސޯޓުން ފުރައިގެން ދަތުރުކުރި އުޅަނދެއް ރީތިރަށް ރިސޯޓް ކައިރީ އޮތް އުޅަނދަކާ ޖެހިކަމުގެން ކަމަށެވެ.

މި ހާދިސާގައި ދެ މީހަކަށް ވަރަށް ބޮޑަށް އަނިޔާވެފައިވާކަމަށް އެމްއެންޑީއެފުން ބުނެ އެވެ. އެމްއެންޑީއެފްއިން ބުނި ގޮތުގައި މި އެކްސިޑެންޓްގައި ގާތްގަނޑަކަށް 15 ވަރަކަށް މީހުން ޒަހަމްވެފައިވާއިރު، ބައެއް މީހުން ވަރަށް ބޮޑެތި އަނިޔާތައް ލިބިފައިވެ އެވެ. އެންމެންވެސް މާލެ ގެނެސް، ހޮސްޕިޓަލުގައި ގެންދަނީ ފަރުވާދަމުންނެވެ.

އަނިޔާވި އެންމެންނަކީ ވެސް ސަމާ އައިލެންޑްގެ މުވައްޒަފުންކަމަށް މައުލޫމާތު ލިބެ އެވެ. އޭގެ ތެރެއިން ބައެއް މީހުން ހާލަތު ސީރިއަސް ކަމަށް ވެސް ވަނީ މައުލުމާތު ލިބިފަ އެވެ.

ނޫސްވެރިންނަށް މައުލޫމާތުދެއްވަމުން އޭޑީކޭ ހޮސްޕިޓަލްގެ މެނޭޖިން ޑިރެކްޓަރ އަހުމަދު އަފްއާލް ވިދާޅުވީ، ބައެއް މީހުންގެ ހާލު ވަރަށް ސީރިއަސް ކަމަށެވެ. އެގޮތުން ތިން މީހަކަށް އައިސީޔޫގައި ފަރުވާދެމުން އަންނަކަމަށް އަފްއާލް ވިދާޅުވި އެވެ. އޭގެއިތުރުން އިމެޖެންސީގައި ހަތަރު މީހަކަށް އަދި އޮބްޒަވޭޝަމްގައި ހަތް މީހަކަށް ފަރުވާދެމުން އަންނަ ކަމަށާއި، އޭގެ ތެރޭގައި ދެ ބިދޭސީންވެސް ހިމެނޭކަމަށް އަފްއާލް ވިދާޅުވި އެވެ.

އަފްއާލް ވިދާޅުވިގޮތުގައި އައިސީޔޫގައި ފަރުވާދެމުން އަންނަ މީހުންގެ ތެރެއިން އެކަކެއްގެ ހާލު ވަރަށް ސީރިއަސް އެވެ. 

އަނިޔާވި މީހުން ސަލާމަތްކުރަން އެ ސަރަހައްދަށް ފުރަތަމަ ދިޔަ ލޯންޗްގެ ކްރޫއަކު ބުނި ގޮތުގައި، ސަމާ އައިލެންޑްގެ ލޯންޗް އޮތީ އެއްކޮށް ކަހަލަ ގޮތަކަށް ހަލާކުވެފަ އެވެ. އެ ހާދިސާގައި، ލޯންޗްގައި ތިބި އެންމެންނަށް އެކިވަރުގެ އަނިޔާ ލިބިފައިވާ ކަމަށާއި އެކެއްގެ ކޮނޑުހުޅު ނެތްޓިފައިވާ ކަމަށް އޭނާ ބުންޏެވެ. ބައެއް މީހުންގެ ބޯ ފަޅައިގެން ގޮސްފައިވާ ކަމަށް ވެސް އޭނާ މައުލޫމާތު ދިނެވެ. 

އެމްއެންޑީއެފުން ބުނިގޮތުގައި ސަމާ އައިލެންޑް ރިސޯޓްގެ ލޯންޗް ގޮސް ޖެހުނު ދޯނީގެ ލައިޓް ހުރީ ނުދިއްލަ އެވެ. އެހެންވެ، ރީތި ރަށް ރިސޯޓް ކައިރީގައި އަޅާފައި އޮތް އެ ދޯނި، ލޯންޗުގެ ކެޕްޓަނަށް ނުފެނުމުގެ ސަބަބުން ގޮސް އޭގައި ޖެހި އެކްސިޑެންޓް ހިނގީ ކަމަށް ކޯސްޓް ގާޑުން ބުންޏެވެ.

މި އެކްސިޑެންޓްގެ މައްސަލަ މިހާރު ދަނީ ފުލުހުން ތަހްގީގު ކުރަމުންނެވެ.