ވިސްނުންތެރިކަމާއި އެކު ދިވެހިރާއްޖެ ހިންގަން ފެށުމަކީ އެންމެންގެ ވާޖިބެއް: ރައީސް ނަޝީދު
3 ޖޫން 2020 | ބުދަ 02:37ޤާނޫނު އަސާސީއަށް ގެނެވުނު އިސްލާހް ރައީސް ސޯލިހް ވަނީ ތަސްދީޤްކުރައްވާފަ
ރައީސް މުހައްމަދު ނަޝީދު، ރައްޔިތުންގެ މަޖިލީހުގެ ރިޔާސަތުގައި
ވިސްނުންތެރިކަމާއި އެކު ދިވެހިރާއްޖެ ހިންގަން ފެށުމަކީ އެންމެންގެ ވާޖިބެއްކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ކައުންސިލްތަކުގެ އިންތިޚާބެއް ބޭއްވެންދެން މިހާރު އޮތް ކައުންސިލްތަކުގެ ދައުރު ދެމިގެންދާ ގޮތަށް ޤާނޫނުއަސާސީއަށް ގެނެސްފައިވާ އިޞްލާޙު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ތަޞްދިޤު ކުރެއްވުމާއި ގުޅިގެން އެމަނިކުފާނަށް ޝުކުރު އަދާކުރައްވައި އަންގާރަ ދުވަހުގެ ރައީސް ނަޝީދު ކުރެއްވި ޓްވީޓުގައި ވަނީ ކައުންސިލްތައް ހިންގަމުން ގެންދިއުމުގެ ފުރުސަތު އޮތީ ބޮޑުކޮށް ކަމަށެވެ. އަދި މި ހިންގުމަކީ މި ރޯގާއިން، މި ރާއްޖެ އަރައިގަނެ އާންމު ދިރިއުޅުމެއް ހޯދުމަށް އެޅުނު މުހިއްމު ފިޔަވަޅެއް ކަމަށެވެ.
ޤާނޫނު ނަންބަރު 22/2019 (ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް 5 ވަނަ އިޞްލާޙު ގެނައުމުގެ ޤާނޫނު) އަށް އިޞްލާޙު ގެނައުމުގެ ބިލު، ރައްޔިތުންގެ މަޖިލީހުން ފާސްކުރައްވައި އަދި ރައީސުލްޖުމްހޫރިއްޔާ އެ ބިލު ތަޞްދީޤު ކުރުމާއެކު، މިހާރު ހިނގަމުންދާ ކައުންސިލްތަކުގެ ދައުރު ވަނީ، އައު ކައުންސިލްތަކުގެ އިންތިޚާބު ބޭއްވެންދެން ދިގު ދައްމާލެވިފަ އެވެ.
ހޯމަ ދުވަހުގެ ދަންވަރު ބޭއްވި ރައްޔިތުންގެ މަޖިލީހުގެ ދެ ވަނަ ދައުރުގެ ދެ ވަނަ ޖަލްސާގައި ޤާނޫނުއަސާސީއަށް އިޞްލާޙު ގެނައުމަށް ފާސްކޮށްފައި ވަނީ ވޯޓުގައި ބައިވެރިވެ ވަޑައިގެންނެވި 74 މެންބަރުންގެ އިއްތިފާޤުންނެވެ.
ކޮވިޑް-19 އާ ގުޅިގެން އޭޕްރީލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ ކައުންސިލްތަކުގެ އިންތިޚާބު ވަނީ ފަސް ކުރެވިފަ އެވެ. އެއާއެކު މިހާރު އިންތިޚާބު ކުރެވިފައިވާ ކައުންސިލްތަކުގެ މުއްދަތު ޖޫން މަހުގެ 3 ވަނަ ދުވަހު ހަމަވާތީ އެކަމަށް ޤާނޫނީ ޙައްލެއް ގެނައުމުގެ ގޮތުން، ޤާނޫނުއަސާސީއަށް އިޞްލާޙު ގެނައުމަށް ހުށަހެޅުއްވީ، ސަރުކާރުގެ ފަރާތުން ބިލެއްދޫ ދާއިރާގެ މެންބަރު އަޙްމަދު ހަލީމެވެ.
