ގޮތްނޭންގޭ ގޮތަށް ފެތުރޭ ބަލިތައް މިހާރަށްވުރެ ބޮަޑަށް މޮނިޓަރ ކުރަންޖެހޭ ކަމަށް ޗައިނާގެ ރައީސް ވިދާޅުވެއްޖެ

ގޮތްނޭންގޭ ގޮތަށް ފެތުރެމުންދާ ބަލިތަކާއި އެބަލިތައް ފެތުރެން ދިމާވާ ސަބަބުތައް މޮނިޓަރ ކުރުމުގައި ހަރުދަނާ އުސޫލުތަކެއް ޗައިނާއިން ގެންގުޅެން ޖެހޭކަމަށް ޗައިނާގެ ރައީސް ޝީ ޖިންޕިންގ އެ ގައުމުގެ ސްޓޭޓް ޓީވީގައި ވިދާޅުވެއްޖެ އެވެ.

އަންގާރަ ދުވަހު ކަމާގުޅޭ މާހިރުންނާއި އިލްމުވެރިންނާއެކު ކުރިޔަށް ގެންދިޔަ ވަށްމޭޒު ބައްދަލުވުމެއްގައި ވާހަކަ ދައްކަވަމުން ޝީ ވިދާޅުވީ މިވަގުތުން ވަގުތަށްވެސް ގައިން ގަޔަށް އަރާ ބަލިތަކާއި، ސިއްހީ ނިޒާމަށް ކުއްލިއަކަށް ދިމާވާ ހާލަތްތައް މޮނިޓަރ ކުރުމުގެ ކަންކަން އިތުރަށް ހަރުދަނާ ކުރުމުގެ ކަންކަން ކުރިޔަށް ގެންދަންޖެހޭ ކަމަށެވެ.

އަދި މޮނިޓަރކުރެވޭ ނިޒާމު މިހާރަށްވުރެ ރަނގަޅުވެ އަދަދުތައް ދިމާވާން ޖެހޭ ކަމަށާއި ލިބޭ އަދަދުތައް ދިރާސާކޮށް ވަގުތުން ވަގުތަށް ފިޔަވަޅު އެޅުމުގެ ގާބިލުކަން ލިބޭ މިންވަރަށް އެކަން ކުރެވެން ޖެހޭ ކަމަށް ޝީ ވިދާޅުވި އެވެ. އަދި ކުރިޔަށް އޮތްތަނުގައި ޗައިނާގެ ގަދީމީ ބޭސްވެރިކަން މިހާރަށްވުރެ ބޮޑަށް ތަރައްޤީކޮށް އައު ގޮތްތައް ތަރައްޤީކުރުމުގެ ކަންކަން ކުރުމަށްޓަކައި ދިރާސާތައް ފުޅާކުރާނެ ކަމަށް ޝީ ވިދާޅުވި އެވެ.

މިހާރު ދުނިޔޭގައި ހަލުވިކަމާއެކު ފެތުރެމުންދާ ނޮވެލް ރޯނާވައިރަސް ނުވަތަ ކޮވިޑް-19 އަކީ ޗައިނާގެ ވުހާން އިން އެންމެ ފުރަތަމަ ފެނުނު ވައިރަސް އެކެވެ. މިވައިރަސް އެންމެ ފުރަތަމަ ފެނުނު ތަނާއި މި ފެތުރުނު ގޮތްތަކަށް އެކި ގޮތްގޮތަށް ވާހަކަތައް ދައްކަމުން ދާއިރު ޗައިނާ އިން ބުނަމުން އަންނަނީ އެކަންކަން ބަލަމުން އަންނަކަމަށެވެ.