މިނިވަން މުއައްސަސާތަކުން ކުރަމުންދާ މަސައްކަތް ކޮންމެ ދެ ހަފްތާއަކުން މަޖިލީހަށް ހިއްސާކުރުމަށް އަންގައިފި
2 ޖޫން 2020 | އަންގާރަ 02:15ރިޕޯޓު ފާސްކުރުމަށް ވޯޓު ދެއްވީ މަޖިލީހުގެ 73 މެމްބަރުން
ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގެ ބައްދަލުވުމެއްގެ ތެރެއިން
ކޮވިޑް-19އާ ގުޅިގެން ސަރުކާރުގެ އޮފީސްތައް ބަންދުކުރުމަށް ނިންމާފައިވާ މި ދުވަސްވަރުގައި މިނިވަން މުއައްސަސާތަކުން ކުރަމުންދާ މަސައްކަތްތައް ރައްޔިތުންގެ މަޖިލީހާއި ހިއްސާ ކުރުމަށް އަންގަން ހުށަހަޅާފައިވާ ރިޕޯޓު ފާސްކޮށްފިއެވެ.
ކޮވިޑް-19 އާ ގުޅިގެން އަޅާ ފިޔަވަޅުތަކުގެ ސަބަބުން ސަރުކާރުން ހިންގުމަށް ނިންމާފައިވާ ޕްރޮގްރާމް ތަންފީޒުކުރުމަށް ރައްޔިތުންގެ މަޖިލީހުން ދެކޭގޮތް ކަނޑައެޅުމާ ގުޅޭގޮތުން ހުށަހަޅުއްވާފައިވާ މައްސަލައިގައި މިނިވަން މުއައްސަސާތަކުގެ ކޮމިޓީއާ ޙަވާލުކޮށްފައިވާ މަސައްކަތްތައް ދިރާސާކޮށް ނިންމިގޮތުގެ ރިޕޯޓު ފާސްކުރުމަށް ވޯޓު ދެއްވީ މަޖިލީހުގެ 73 މެމްބަރުންނެވެ.
މިނިވަން މުއައްސަސާތަކުގެ ކޮމިޓީގެ ރިޕޯޓުގައި ވަނީ ކޮމިޓީން ހުށަހަޅާ ކަންކަމުގެ ތެރޭގައި ކޮވިޑް-19އާ ގުޅިގެން ސަރުކާރުގެ އޮފީސްތައް ބަންދުކުރުމަށް ނިންމާފައިވާ މި ދުވަސްވަރުގައި، އެ އޮފީހުން ކުރަމުންދާ މަސައްކަތުގެ ތަފްޞީލު ކޮންމެ ދެ ހަފްތާއަކުން ކޮމިޓީއާ ހިއްސާކުރުމަށް އެންގުމަށް ހިމަނާފައެވެ.
ކޮމިޓީން މިގޮތަށް ހުށަހަޅާފައިވަނީ މިނިވަން މުއައްސަސާތަކަށް ޤާނޫނުން މަތިކޮށްފައިވާ ޒިންމާތައް އަދާކުރުންމަތީ ދެމިތިބުމާއެކު، މެދުކެނޑުމެއްނެތި އެ މުއައްސަސާތަކުގެ ޚިދުމަތް ރައްޔިތުންނަށާއި ދައުލަތަށް ލިބިގެން ދިއުމަކީ ޤާނޫނުގެ ވެރިކަމުގެ އެންމެ އަސާސީ ސިފަ ކަމުގައިވާތީ، އެ ފަދައިން އެ މުއައްސަސާތަކުން ޢަމަލުކުރަމުން ގެންދާކަން ކަށަވަރު ކުރުމަށެވެ.
