ނައިފަރު ދާއިރާގެ މެންބަރ ޝިޔާމްގެ ނަން އިއްވުމުން މަޖިލީހުގެ ތަޅުން ހޫނު ވެއްޖެ

ރައްޔިތުންގެ މަޖިލީހުގެ ނައިފަރު ދާއިރާގެ ޕީޕީއެމް މެމްބަރ އަހުމަދު ޝިޔާމްގެ ނަން އިއްވުމާއެކު މަޖިލީހުގެ ތަޅުން ހޫނުވެއްޖެ އެވެ.

މަޖިލީހުގެ މިއަހަރުގެ ދެވަނަ ދައުރުގެ ދެ ވަނަ ޖަލްސާގައި ޤާނޫނު އަސާސީ އިސްލާހުކުރުމަށް އެޖެންޑާ ކޮށްފައިވާއިރު އެޖަލްސާ ކުރިޔަށް ގެންދިޔުމަށް އެޖެންޑާކޮށްފައިވަނީ ހޯމަ ދުވަހުގެ ރޭ ދަންވަރު 1:30 ގައެވެ. އެއާއެކު ޖަލްސާ ފައްޓަވަމުން, ރައްޔިތުންގެ މަޖިލީހުގެ ރައީސް، މުހައްމަދު ނަޝީދު ވިދާޅުވީ ޖަލްސާ ދަންވަރު ގަޑީގައި ބާއްވަން ޖެހިވަޑައިގަތީ އެނޫން ގޮތެއް ނެތުމުން ކަމަށެވެ. ރިޔާސަތުން އަންގާ އެންގުމުގެ ދަށުން މަޖިލީހުގެ ރައީސް ވާހަކަފުޅު ދައްކަވަމުން ވިދާޅުވީ ރާއްޖޭގެ ރައްޔިތުންގެ އަރިހުން ވަރަށް ބޮޑަށް މަޢާފަށް އެދިވަޑައިގަންނަވާ ކަމަށެވެ.

މަޖިލީހުގެ ރައީސް މިވާހަކަފުޅު ދައްކަވަން ފެއްޓެވުމުން ޝިޔާމް ވަނީ އަޑުގަދަ ކުރައްވާފަ އެވެ. އެގޮތުން ޤާނޫނު އަސާސީއާ ޚިލާފަށް ހިނގާ ޖަލްސާއެއް ކަމަށް ވިދާޅުވެ ވާހަކަ ދައްކަވަން ފެއްޓެވިއެވެ. އެއާއެކު ރައީސް ވަނީ ޝިޔާމްގެ ނަން އިއްވާ މަޖިލީހުގެ ތަޅުމުން ނިކުންނަވަން އެދިވަޑައިގަންފަ އެވެ.

އެއާއެކު ތަޅުން ހޫނުވެގެން ދިޔަ އެވެ. އަދި މެމްބަރުން އެއް މެމްބަރަކު އަނެއް މެމްބަރަކު ކޮއްޕަވާލައްވާ އަޑުގަދަ ކުރައްވަމުން ގެންދެވި މަންޒަރު ވަނީ ފެނިފަ އެވެ. ގާތްގަޑަކަށް 7 މިނެޓް ވަންދެން މަޖިލީހުގެ ތަޅުން ހޫނުވެ ދިޔުމަށްފަހު ޖލްސާ އަނެއްކާވެސް ވަނީ ފަށާފަ އެވެ.