ޗައިނާއިން އާދިއްތަ ދުވަހު ވައިރަސް އަށް ޕޮޒިޓިވްވި އެކަކީ ޖަރުމަނުގެ ފްލައިޓުން އައި މީހެއް
31 މެއި 2020 | އާދީއްތަ 23:11ޖަރުމަނުގެ ޗާޓަރު ފްލައިޓަކުން ވަނީ 200 ފަސިންޖަރުން ޗައިނާ އަށް އައިސްފައި
ބެއިޖިންގ ގެ އެއަރޕޯޓް ގައި ފަސިންޖަރަކު މާސްކު އަޅައިގެން
ޗައިނާ އިން އާދިއްތަ ދުވަހު އަލަށް ކޮވިޑް-19 ޖެހިގެން ރިޕޯޓްކުރީ ދެ މީހުން ކަމަށާއި އަލާމާތްތައް ނުފެނި ޕޮޒިޓިވްވި 4 މީހުންގެ ތެރެއިން އެކަކީ ޖަރުމަނުވިލާތުން ޗާޓަރު ފްލައިޓެއްގައި އެ ގައުމަށް އައި މީހެއް ކަމަށް ޗައިނާގެ ނޭޝަނަލް ހެލްތު ކޮމިޝަނުން ބުނެފި އެވެ.
އަލާމާތްތައް ފެނިގެން ރިޕޯޓްކުރި ދެ މީހުން ފެނިފައިވަނީ ޝަންޑުންގ ޕްރޮވިންސުންނެވެ. އޭގެކުރީ ދުވަހު އަލާމާތްތައް ފެނިފައިވާ ހަތަރު މީހަކު ވަނީ ވައިރަސް އަށް ޕޮޒިޓިވްވެފަ އެވެ.
ޖަރުމަނުގެ ފްރަންކްފަޓް އިން ލުފްތަންސާގެ ފްލައިޓަކުން ޗައިނާގެ ޓިއަންޖެން އައި މީހެއްގެ ގައިން ވައިރަސް ހުރި ކަމުގެ ނިޝާނެއް ނެތި ވައިރަސް އަށް ޕޮޒިޓިވްވެފައިވާ ކަމަށް އެސިޓީން ވަނީ ބުނެފަ އެވެ. ޖަރުމަނުން މި އަންނަ ޗާޓަރ ފްލައިޓްތަކަކީ ލޮކްޑައުން އާ ގުޅިގެން ހުއްޓިފައިވާ އިގްތިޞާދު އަލުން ހުޅުވާލުމަށް ޗައިނާ އާއި ޖަރމަނީން އެއްބަސްވެގެން ކުރިޔަށް ގެންދާ ފްލައިޓްތަކެކެވެ. އެގޮތުން 200 ޕަސިންޖަރުން ގެނެސްފައިވާއިރު މީގެތެރޭގައި ބޮޑަށް ހިމެނެނީ ވިޔަފާރިތަކުގެ އިސްސަފުގައި ހަރަކާތްތެރިވާ މީހުންނެވެ.
ލުފްތަންސާއިން ބުދަ ދުވަހު ޝަންހާއީ އަށް ފްލައިޓެއް ދަތުރުކުމަށް ވަނީ ހަމަޖެހިފަ އެވެ. ވައިރަސް ޖެހުނު މީހާ މިހާރު ހޮސްޕިޓަލަށް ގެންގޮސްފައިވާ ކަމަށާއި އޭނާގެ ހާލަތު ގާތުން ބަލަމުންދާ ކަމަށް ޓިއަންޖެން އިން ބުނެ އެވެ.
ޗައިނާގައި ވައިރަސް ޖެހިފައިވާ މީހުން ގެ އަދަދު ވަނީ 83،001 އަށް އަރާފަ އެވެ. ވައިރަސް ޖެހިގެން މަރު ވެފައިވަނީ 4634 މީހުންނެވެ.
