ސީޒަން ނިމެންދެން މުސާރަ ކުޑަކުރަން ބަޔާންގެ ކުޅުންތެރިން އެއްބަސްވެއްޖެ

ކޮރޯނާވައިރަސް (ކޮވިޑް-19) ގެ ސަބަބުން ދިމާވާ މާލީ ގޮންޖެހުންތަކުން ސަލާމަތްވުމަށް، މި ސީޒަން ނިމެންދެން މުސާރަ ކުޑަކުރަން ޖަރުމަންގެ ބަޔާން މިއުނިކްގެ ކުޅުންތެރިން އެއްބަސްވެއްޖެ އެވެ.

ކޮވިޑް-19 ގެ ސަބަބުން އެކި ކްލަބުތަކަށް މާލީ ގޮތުން ވަނީ ގޮންޖެހުންތަކަކާ ކުރިމަތިލާން ޖެހިފައެވެ. ކޮވިޑް-19 އާ ގުޅިގެން މާޗު މަހު ޖަރުމަން ލީގު މެދުކަނޑާލިއިރު، މެއި މަހުގެ 16 ވަނަ ދުވަހު ޖަރުމަން ލީގުގެ ކުޅުން ވަނީ އަލުން ފަށާފައެވެ. އެކަމަކު މެޗުތައް ކުރިއަށްދަނީ ދަނޑަށް ސަޕޯޓަރުން ނުވައްދައެވެ.

މީގެ ކުރިން ޖަރުމަންގެ އެންމެ ބޮޑު އެއް ކްލަބު ކަމަށްވާ ބަޔާން މިޔުނިކުން ވަނީ އޭޕްރީލް މަހުގެ ތެރޭގައި އެޓީމުގެ ކުޅުންތެރިންނާއި އޮފިޝަލުންގެ މުސާރައިން 20 އިންސައްތަ އުނިކުރަން ނިންމާފައެވެ. އަދި ދާދި ފަހުން ވަނީ މި ސީޒަން ނިމެންދެން ކުޅުންތެރިންނާއި އޮފިޝަލުންގެ މުސާރާ ކުޑަކުރަން ނިންމިކަން ހާމަކޮށްފައެވެ. އެކަމަކު މިފަހަރު މުސާރަ ކުޑަކުރި ވަކި އަދަދެއް ހާމަކޮށްފައެއް ނުވެއެވެ.

ޖަރުމަން ލީގުގެ ކުޅުން އަލުން ފަށާފައިވާއިރު، ބަޔާން އޮތީ ލީގުގެ އެއްވަނައިގައި 7 ޕޮއިންޓުގެ ލީޑަކާއެކު އެވެ. އެޓީމަށް ވަނީ ކުޅުނު 29 މެޗުން 67 ޕޮއިންޓު ލިބިފައެވެ.

ޖަރުމަން ލީގުގެ ކުޅުން ޖޫން މަހުގެ 27 ވަނަ ދުވަހު ނިމެން އޮތް ނަމަވެސް، ޖަރުމަން ކަޕްގެ ފައިނަލް މެޗު ވަނީ ޖުލައި މަހުގެ 4 ވަނަ ދުވަހަށް ތާވަލުކޮށްފައެވެ.

އަދި ކޮވިޑް-19 އާ ގުޅިގެން ޔުއެފާ ޗެމްޕިއަންސް ލީގު ވެސް މެދުކަނޑާލާފައިވާއިރު، އޮގަސްޓް މަހު ޗެމްޕިއަންސް ލީގު އަލުން ފަށަން ޔުއެފާ އިން އަންނަނީ މަސައްކަތް ކުރަމުންނެވެ. ޗެމްޕިއަންސް ލީގުގެ ގަދަ 16 ގެ ބައެއް މެޗުތައް މީގެ ކުރިން ކުޅެފައިވާއިރު، ބަޔާން ވަނީ ފުރަތަމަ ލެގުގައި ޗެލްސީން އަތުން 3-0 ން މޮޅުވެފައެވެ.