ތ. ގުރައިދޫގައި ބިދޭސީ މީހާ މަރާލި މައްސަލާގައި މީހަކު ހައްޔަރުކޮށްފި
30 މެއި 2020 | ހޮނިހިރު 18:51ހައްޔަރުކޮށްފައިވަނީ 22 އަހަރުގެ ބަންގްލަދޭޝްގެ މީހެއް
ތ. ގުރައިދޫ - އެ ރަށުގައި ބިދޭސީއަކު ގަޔަށް ވަޅިހަރާ މަރާލި މައްސަލާގައި މީހަކު ވަނީ ހައްުޔަރު ކޮށްފައި
ތ. ގުރައިދޫގައި ބިދޭސީއެއްގެ ގަޔަށް ވަޅި ހަރާލި މައްސަލާގައި މީހަކު ހައްޔަރުކޮށްފި އެވެ.
ހޮނިހިރު ދުވަހު މީޑިއާތަކަށް ފޮނުވި މެސެޖެއްގައި ފުލުހުން ބުނީ، މި މަހުގެ 21 ވަނަ ދުވަހު ގުރައިދޫގައި ބިދޭސީއަކު މަރާލި މައްސަލާއާ ގުޅިގެން 22 އަހަރުގެ ބަންގްލަދޭޝް މީހަކު ހައްޔަރުކޮށްފައިވާ ކަމަށެވެ.
އެ މީހާ މަރާލާފައިވަނީ ދެ މީހުންގެ ތެރޭގައި ހިނގި ހަމަނުޖެހުމެއްގެ ތެރެއިންކަން މިހާތަނަށް ތަހުގީގަށް ހާމަވެފައިވާ ކަމަށް ފުލުހުން ބުންޏެވެ.
ފުލުހުންގެ އިދާރާއިން ބުނީ، އެ މައްސަލައާ ގުޅިގެން ފުލުހުން ހޯދަން ޖެހޭ ފޮރެންސިކް ހެކި ހޯދައި ތަހުގީގުގައި ފުރިހަމަކުރަންޖެހޭ ކަންކަން ފުރިހަމަކުރުމުގެ މަސައްކަތް ކުރިޔަށްދާ ކަމަށެވެ. އަދި ތުހުމަތުކުރެވޭ މީހާ މި މަހުގެ 21 ވަނަ ދުވަހުން ފެށިގެން ފުލުހުންގެ ހައްޔަރަށް ގެންގޮސްފައިވާ ކަމަށްވެސް ފުލުހުން ބުންޏެވެ.
ގުރައިދޫ ކައުންސިލުން "ރާއްޖެއެމްވީ"އަށް މައުލޫމާތު ދީފައިވާގޮތުން، ބިދޭސީ މީހާގެ ހަށިގަނޑުގެ ދެތިން ތަނަކަށް ވަޅިން ވަނީ ހަމަލާދީފަ އެވެ. އެ ބިދޭސީ މީހާ އެއްލާލާފައި އޮއްވައި ފެނުނީ އޭނާ މަސައްކަތް ކުރަމުންދިޔަ ސައިޓުގެ ކުރިމަތީގައި އޮންނަ ސަރަހައްދުން ކަމަށް ކައުންސިލުން ވަނީ ބުނެފަ އެވެ.
