ލޮކްޑައުންއަށް ދިން ލުއިތަކާއެކު ސްޓެލްކޯގެ ބައެއް ޚިދުމަތްތައް ފަށަނީ
30 މެއި 2020 | ހޮނިހިރު 14:18ސްޓެލްކޯގެ ސޭލްސް ސެންޓަރު އާދިއްތަ ދުވަހު ހުޅުވާނެ
ސްޓޭޓް އިލެކްޓްރިކް ކޮމްޕެނީ ލިމިޓެޑުން ކޮވިޑް-19އާ ގުޅިގެން ގިނަ މަސައްކަތްތަކެއް ކޮށްފައިވޭ
ލޮކްޑައުންނަށް ސަރުކާރުން ދިން ލުއިތަކާއެކު ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ބައެއް އިތުރު ޚިދުމަތްތައް ދިނުމަށް ނިންމައިފިއެވެ.
ހޮނިހިރު ދުވަހު ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) އިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ސްޓެލްކޯގެ މެނޭޖިންގ ޑިރެކްޓަރ ހަސަން މުގުނީ ވިދާޅުވީ ކޮވިޑް-19އާ ގުޅިގެން ފުލް ލޮކްޑައުންއަކަށް ދިއުމުން ސްޓެލްކޯގެ ބައެއް ޚިދުމަތްތައް މެދުކެނޑިގެން ދިޔަ ކަމަށެވެ. ނަމަވެސް މިހާރު ލޮކްޑައުންނަށް ލުއި ދީފައިވާތީ، މެދުކެނޑިފައިވާ ބައެއް ޚިދުމަތްތައް ދިނުމަށް ނިންމާފައިވާ ކަމަށް މުގުނީ ވިދާޅުވިއެވެ.
މުގުނީ ވިދާޅުވީ ސްޓެލްކޯގެ ސޭލްސް ސެންޓަރު އާދިއްތަ ދުވަހު ހުޅުވައި ހެނދުނު 10:00 ން މެންދުރު 14:00 ށް ޚިދުމަތް ދިނުމަށް ނިންމާފައިވާ ކަމަށެވެ. އަދި އޮންލައިންގެ ޚިދުމަތް ވެސް ލިބޭނެ ކަމަށް މުގުނީ ވިދާޅުވިއެވެ.
މީގެ އިތުރުން މުގުނީ ވިދާޅުވީ ކައުންޓަރުތަކުން ބިލް ދެއްކުމުގެ ޚިދުމަތް ނުލިބުނު ނަމަވެސް ބޮޑެތި އަދަދުން ފައިސާ ދައްކާ ފަރާތްތަކަށް ޗެކު އަދި އޮންލައިން މުއާމަލާތްތައް މެދުވެރިކޮށް ފައިސާ ދެއްކޭނެ އިންތިޒާމު ހަމަޖައްސާފައިވާ ކަމަށެވެ.
މަގުނީ ވިދާޅުވީ ގޭގެއަށް ކަރަންޓު ލުމާއި ވަޔަރު ޓެސްޓު ކުރުމުގެ މަސައްކަތްތައް ކުރިއަށްދާނެ ކަމަށެވެ.
