ޒުވާން ޖީލު ގައުމީ ހިދުމަތައް ނިކުތުމުގައި ސްކައުޓް މޫވްމަންޓުން މުހިންމު ރޯލެއް އަދާކުރޭ: ރައީސް
30 މެއި 2020 | ހޮނިހިރު 08:56މިއަދަކީ 64 ވަނަ ގައުމީ ސްކައުޓް ދުވަސް
ސްކައުޓް އެސޯސިއޭޝަނުން ބޭއްވި ޖަލްސާއެއްގައި ރައީސް ސޯލިހު ބައިވެރިވެވަޑައިގަތުން
ޒުވާން ޖީލު ގައުމީ ހިދުމަތައް ނިކުތުމުގައި ސްކައުޓް މޫވްމަންޓް މުހިންމު ރޯލެއް އަދާކުރާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
64 ވަނަ ގައުމީ ސްކައުޓް ދުވަހުގެ މުނާސަބަތާއި ގުޅިގެން ރައީސް ވަނީ ހުރިހާ ސްކައުޓުންނާއި، ސްކައުޓް ލީޑަރުންނަށް ދުވަހުގެ ތަހުނިޔާ އަރިސްކުރައްވާފައެވެ. ރައީސް ވިދާޅުވީ، ފުރާވަރު ކުދިން ގައުމީ އަދި އިޖްތިމާއީ ހިދުމަތައް ނިކުތުމުގެ ފަހަތުގައި ސްކައުޓް މޫވްމަންޓުން ވަރަށް ބޮޑު ރޯލެއް އަދާކުރާކަމަށެވެ.
ސްކައުޓް އެސޯސިއޭޝަނުން އަންނަނީ އެކި އުމުރު ފުރައިގެ ކުދިންނަށް ތަމްރީން ކޭމްޕްތަކެއް ހިންގަމުންނެވެ. އެގޮތުން މި ކޭމްޕްތަކުގައި، ލީޑަރޝިޕް ހުނަރުތަކާއި، ޕެޓްރޯލް ސިސްޓަމާއި، އެކި ހާލަތްތަކުގައި ސްކައުޓުން އަމަލު ކުރަންޖެހޭ ގޮތްތައް ދަސްކޮށްދެއެވެ. އެގޮތުން ގުޅިގެން މަސައްކަތް ކުރުމާއި، މުހިއްމު ނިންމުތައް ނިންމާނެ ގޮތާއި ކަންކަމަށް ފާޑު ކިޔުމާއި ކަންތައްތަކުގައި އިސްނެގުމަށް ސްކައުޓުންނަށް ދަސްކޮށްދެއެވެ.
