އޮޅުވެލި ކަރަންޓީން ފެސިލިޓީގައި މީހަކު މަރެއް ނުވޭ، ދޮގު ޚަބަރު ފެތުރި ފަރާތްތަކަށް ގާނޫނީ ފިޔަވަޅު އަޅާނަން: ފުލުހުން
29 މެއި 2020 | ހުކުރު 03:31މި ދަނޑިވަޅުގައި ބިރުވެރިކަން އުފެދޭގޮތަށް ދޮގު މައުލޫމާތު ނުފެތުރުމަށް އިލްތިމާސްކުރަން
އޮޅުވެލި ބީޗް އެންޑް ސްޕާ މޯލްޑިވިސް | ގޫގުލް
އޮޅުވެލި ކަރަންޓީން ފެސިލިޓީގައި މީހަކު މަރުނުވާ ކަމަށާއި، އެތާނގައި މީހަކު މަރުވިކަމަށް ބުނެ ދޮގު ޚަބަރު ފެތުރި ފަރާތްތަކަށް ޤާނޫނީ ފިޔަވަޅު އަޅާނެކަމަށް މޯލްޑިވްސް ޕޮލިސް ސރވިސްއިން ބުނެފި އެވެ.
މިކަމާއި ގުޅިގެން ފުލުހުން ބުނެފައި ވަނީ، އޮޅުވެލި އައިސޮލޭޝަން ފެސިލިޓީގައި ހުރި ކޮވިޑް-19ށް ޕޮޒިޓިވް ވި މީހަކު ބާތު ޓަބެއްގައި މަރުވެފައިވާކަމަށް ބުނެ، މީސް މީޑިއާގައި ދައުރުވަމުން ދާ ފޮޓޮއަކީ ހަގީގަތާއި ޚިލާފު ވާހަކައެއް ކަމަށެވެ. އެގޮތުން މި ނާޒުކު ދަނޑިވަޅުގައި، ރައްޔިތުންގެ ހިތްތަކުގައި ބިރުވެރިކަން އުފެދޭ ގޮތަށް ދޮގު މައުލޫމާތު ފެތުރި މައްސަލަ ތަހުގީގުކޮށް ގާނޫނީ ގޮތުން އަޅަން ޖެހޭ ފިޔަވަޅުތައް އަޅާނެކަމަށް ފުލުހުން ވަނީ ބުނެފައެވެ.
އަދި މީސް މީޑިއާގައި އެ ޕޯސްޓް ޝެއަރ ކުރައްވާފައިވާ ފަރާތްތަކުން އެ ޕޯސްޓް ޑިލީޓްކޮށް އިތުރަށް ޝެއަރ ނުކުރުމަށް ފުލުހުން ވަނީ އިލްތިމާސްކޮށްފަ އެވެ.
ފުލުހުން އިތުރަށް ބުނެފައިވަނީ، ކޮވިޑް-19އާއި ގުޅިގެން ދޮގު މައުލޫމާތު ފަތުރާ މައްސަލަ ވަރަށް ސީރިއަސް މައްސަލައެއްގެ ގޮތުގައި ތަހުގީގު ކުރަމުން ދާނެކަމަށާއި މިފަދަ އަމަލުތައް ނުހިންގުމަށް އިލްތިމާސް ކުރާކަމަށެވެ.
