ކޮވިޑް-19 އާ ގުޅިގެން ކަރަންޓީން ނުވަތަ މޮނީޓަރިންގ ޙާލަތަށް ގެނެވިފައިވާ ގޭތަކުގައި އިތުރު ދެ މެންބަރުން ތިއްބެވި ކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ ބުދަ ދުވަހުގެ ޖަލްސާ ފެށުމުގެ ގޮތުން، މަޖިލީހުގެ ބުދަ ދުވަހުގެ ޖަލްސާގެ ހާޟިރީ އިއްވަވާ ދެއްވަމުން މަޖިލީހުގެ ރައީސް މުޙައްމަދު ނަޝީދު ވިދާޅުވީ، ޖަލްސާ ފެށިއިރު، 29 މެންބަރުން ޖަލްސާއަށް ހާޟިރު ވެވަޑައިގަންނަވާ ފައިވާ ކަމަށެވެ. އަދި ކަރަންޓީން ނުވަތަ މޮނީޓަރިންގގެ ޙާލަތަށް ގެނެވިފައިވާ ގޭތަކުގައި 7 މެންބަރުން އެބަ ތިއްބެވި ކަމަށާއި އެ 7 މެންބަރުންނަށް އަންގާރަ ދުވަހުގެ ޖަލްސާއަށް ވަޑައި ނުގެންނެވޭ ކަމަށެވެ. އަދި 4 މެންބަރަކު ސަލާމުގައިވާ ކަމަށެވެ.

އަންގާރަ ދުވަހުގެ ޖަލްސާއަށް ކަރަންޓީން އަދި މޮނީޓަރިންގގެ ހާލަތުގައިވާ ގޭތަކުގައި 5 މެންބަރުން ތިއްބެވި އެވެ. އެހެންކަމުން ބުދަ ދުވަހުގެ ޖަލްސާއަށް ހާޟިރުނުވެވޭ މެންބަރުންގެ ޢަދަދު މިވަނީ 7ށް އަރާފަ އެވެ.

ކަރަންޓީން ނުވަތަ މޮނީޓަރިންގގެ ޙާލަތުގައިވާ ގޭގައި ތިއްބެވި 7 މެންބަރުންގެ ނަންފުޅުތަކެއް މަޖިލީހުގެ ރައީސް ވިދާޅުވެފައެއް ނުވެއެވެ.

ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގެ އެޖެންޑާގައި އޮތީ، ޤާނޫނު ނަންބަރު 22/2019 (ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް 5 ވަނަ އިޞްލާޙު ގެނައުމުގެ ޤާނޫނު) އަށް އިޞްލާޙު ގެނައުމުގެ ބިލަށް ބަހުޘް ކުރުމާއި، ހެންވޭރު ހުޅަނގު ދާއިރާގެ މެންބަރު ޙަސަން ލަޠީފް ހުށަހަޅުއްވާފައިވާ، "ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުން ކަށަވަރުކުރުމުގެ ޚާއްޞަ ބިލު 2020" ލާމަރުކަޒީ ކޮމެޓީން ނިންނި ގޮތުގެ ރިޕޯޓެވެ.

މަޖިލީހުގައި ވަނީ މި ދެ ބިލާ ގުޅޭގޮތުން ވަރަށް ބޮޑަށް ޚިޔާލު ތަފާތުވުން އުފެދިފަ އެވެ.

ޤާނޫނުއަސާސީއަށް އިޞްލާޙު ގެނައުމުގެ ބިލަށް ބަހުޘް ކުރަން ފަށާފައިވަނީ އަންގާރަ ދުވަހުގެ ޖަލްސާގަ އެވެ.

ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާ ބާއްވާފައި ވަނީ މާލެ ޞަރަޙައްދު ފުރަަބަންދު ކުރުމާ ގުޅިގެން މަޖިލީހުގެ އިދާރާގައި ބޭއްވި ފުރަތަމަ ޖަލްސާގަ އެވެ. ކޮވިޑް-19 އާ ގުޅިގެން، ޢާންމު ޞިއްޙަތުގެ ނުރައްކަލުގެ ޙާލަތު އިޢުލާނު ކުރުމާ ގުޅިގެން މަޖިލީހުގެ ޖަލްސާތައް މިދިޔަ މާރޗު މަހުގެ 30 ވަނަ ދުވަހުން ފެށިގެން ބާއްވަމުން ގެންދިޔައީ ވެބް ކޮންފަރެންސް މެދުވެރިކޮށެވެ. މިއީ އެ މެންބަރަކު ބޭނުން ތަނެއްގައި ހުރެވަޑައިގެން އޮންލައިންގެ ޒަރީއާއިން މަޖިލީހުގެ ޖަލްސާތަކުގައި ބައިވެރިވަޑައިގެންނެވޭ ގޮތައް އިންތިޒާމުކޮށްގެން ބޭއްވި ބައްދަލުވުންތަކެވެ.